1 Oshu koni nyya ta dala ikweyi koza ko tabo ko toleho ga dase ko Owuso ipu Oyahudiya kelo. 2 Ngye mala gbimu ko tuwabo, kweyi ngwabotu ikweyi kala dase ko Omasedoniya. Ya ka dawa mo, <<Ayene ka kokpagye ka Akaya ba yimu ko tabo bwi ishayi ni ga ni.>> Kweyi imu ko tabo kala tase lewa ipu wa otugbagba ko ya mamani. 3 Nke ya tayene mani oleho ebe kala shini ogwabotu kaha ikweyi kala naka woyeye lo. Byoni nke ka ni, ala ba wiyikala shu kpoza ni ala gbo ko tabo ni. 4 Owoni ase ko Omasedoniya wa kpami kweyi wa mala wiyikalashu lo, aha ba gbowuru, owuru gbogbo kala ki ya shakaka, ikweyi koni aha gwabotu kpala kotata ni. 5 Mani oni nmamo oshu koni nyya tayene mani oleho ohobu hin gebe kala ome, shini ana ga kyo ojoji tu ikweyi keshi ko otukyokye ni ala shokoyi ni. Shini nawa tojoji yo gyogye ishini nwwa, kweyi oya sayi mala zeshi mani kotukyokye kala la, ayala ze koshu lalo.

6 Ala ra kamo aseni tizire gbayayi oya kye gbayayi, aseni ke tizire nwashika oya kye nwashika. 7 Ananoho na zo oza ni ogbo ipu kotu nu ko ze ni, woza ko zobigye kwe ako oshu lalo; koni Owuso ya yimu kaseni ya zeshi kpotunehe ni. 8 Kweyi Owuso ya gege ko dala shoza ni ala ba doka ni, kweyi ipu kishi kpiri ala ba gbojoji ni ala ba doka ni, kiyikala kpako yoko neshi kpiri. 9 Byoni Okpa ko Owuso ka ni,

<<Ozeshi nu otu oyekponu da awoleha;

iyinyinyi nu yaba ko gbobgo-gbogbo.>>

10 Kweyi Owuso ni ya do osheho edo kizire kpo ozarore ni, oya dala edo koza kpiri ni ala ba doka ni, kweyi yayo ya gye shini ala kyizire nwashika ikweyi koza neshi kala ni ala ya ni. 11 Oya yala ba gbodu shini ala wawo zeshi ishi kpiri, kweyi ase nwashika ba shotunehe do Owuso ikweyi keshi kala ni anye ni.

12 Oko ni ala ya mani dase ko Owuso oza kin lalo, oki yotunehe do Owuso ya kyokye bwipu wa. 13 Bwebe ko oko ni ala ya mani, ni sayi koza neshi kala ni, ase nwashika ba sho Owuso iye koni ala geyagye do Oshu Neshi ko Okristi ni ala ba ka ni, kpeshi ni ala yuwa kpase ashini ni. 14 Kweyi aba tinarigwu dala kpimu yoya nwashika ikweyi ke eshi ko Owuso ni sheyi gagye ipu kala ni. 15 An shotunehe do Owuso ikweyi ke eshi nu ni gbo koka lo ni!