1 Ala bi gbo otumene kpami koni nwwikyo gbayayi ni, nyya bala! 2 Nyya kpipu dala byoni Owuso ya ya ni; ala wisonya ni nshokoyi ko do ongo oye kpokponu ni, ongo oni wo Okristi abiyinu. 3 Nyya yoshi ela koni aba yalotu pya kweyi ala ba ziyikala kpiri-kpiri do Okristi lo, byoni egwa gya Awawu egya kpokame nu ni. 4 Ikweyi koni ala ba zase kpiri ni webe kala wa tono ko Oyesu oye hoha ni kpo otunehe, wanu ni aha tono nu ni lalo; kweyi ala nyo omaku oye kpo oshu neshi oye gogo kpo Omaku kpo oshu neshi ni ala nye ebe kaha ni! 5 Nke mamo ayikoko nyakwu kala ni shun lo! 6 Oye lo nwwase ni tayoyo ya fela koka ni la, oke webe koza gyogye lalo; agwoza mani kpiri dala ishi kpiri owe wonyonya.

7 Owo ozalabi ni nyya byiyun wokpagye shini na zala iso bwebe ko tono koshu neshi ko Owuso dala yeye ni la? 8 Ishi ni nyya yoko ipu kala ni, awoda ko Owuso ashini pini ba sumore la. Na kamo nzuwoza oshu ko talabo. 9 Kweyi ishini nyyebe kala ni, ishini nyya yimu koje, nwwegye da ashishe kala ko tumabo lo, ayene ni wa bwo Omasedoniya ni ba dami ojoji ni nyya yimu ni. Byoni nwwegye dala ishi oni lo ni, nki ya wegye dala ohobu lo. 10 Bwebe kokwokwoshi ko Okristi ni yipu hin ni, ashishe ipu ka agye ka Akaya ya gege ya wumobi ko gwabotu kpoza mani lo. 11 Nyya kela mani ikweyi koni nyya yimu kala lo ni la? Owuso gye mo nyya yimu kala! 12 Nyya gohobu ko yoza ni nyya ya anani, shini ayikoko oni naka pyoshu ko gwabotu mawa gyogye kpa aha ipu koko naba yani lo. 13 Koni awa ayikoko ko okame la, oko wa wako gyasegya, ba yiyiwa pya bya ayikoko ko Okristi kokwokwoshi. 14 Ogbigbashi lo, owoni Ibiri ya yiyinu pya byo oyoleho ke ebe yoyu! 15 Mani oni owojije lalo, owoni ayole nu yi iyiwa pya bya ayole koza neshi. Okweyi wa ya gyogye kpoza ni aya ni.

16 Nki ya kyanu ka: ashishe naka mun byikyo lo. Owoni ala ke ma mani, ala zun byoni ala ba zikyo ni, shini na pyoza gbayayi ni nyya gwabotu kpanu ni. 17 Kokwokwoshi ela ni nyya ka mani wela ni Adole ya yimu shini na ka ni lalo, ipu kela ko gwabotu mani nke ya kela byikyo kwokwoshi. 18 Ikweyi koni ase ashini ba gwabotu ikweyi kela kasuse shishi ni, ami ya gwabotu mamani. 19 Ala ba zotu kpa awikyo kpotunehe, ikweyi koni ala mala ziyi ni! 20 Ala ba zotu kpa awase ni jalabo ni, kpawase ni ba gyalegya ni, kpawase ni ba zeda dala kwe awase ni ba mala gyiyi lo ni, kwe awase ni ba lalabo akpaha ni. 21 Nyya yiweyi ko kyogwu maha yoshi ko ya mani!

Oza kpiri ni ashe ke ya gwabotu ikweyi nu, nyya kela byikyo la, ami ya gwabotu ikweyi nu mamani. 22 Owoni awase ki Ibru la, ami we mamani. Owoni awase ki Izrayila la, ami we mamani. Owoni awayi ki Ibirayi la, ami we mamani. 23 Owoni ayole ko Okristi la, nyya kela byo onyoza, nwwo oyole neshi shuwa! Nyyoko shuwa, nggo oruduru shuwa, ayuma aboshi ko otata shuwa, kweyi nmi ikwu iyi shuwa. 24 Igbeho Ase ko Oyahuda yuma aboshi aweta ayahane; 25 ase ko Oroma yuma aboshi igbeta; kweyi atuma akyo igbo oye, owu kinyo kya kpami igbeta, nngmeno oye ipu kinyo. 26 Nyyipu kiyawu ishi kpiri, inyo bi yun re, awi bi yun ngmo, awase hin abiyiwa tiyi ko yun ngmo, awase ni wase ko Oyahuda lo ni tiyi ko yun ngmo; nmikwu ipu kogya, nmikwu ipu kakyashi, nmikwu ipu ki ishu, nmikwu ebe kayene kokame. 27 Nyyoko lono-lono, ishi nwashika ngbola lo; emye ngmun, igini ngmun, ishi nwashika ozarore yaba dami lo; ole yaba dami lo, kweyi ngbiyo ko shoko lo. 28 Oza shishini wa ko koka lo, ngbo otubyobya kurutu ikweyi ka awogboso Oyesu kpiri. 29 Owoni ashe gboshu lo, ami ya gboshu lo mamani; owoni ashe gbo ipu kozalabi, otu hin ya fo.

30 Owoni nyya gwabotu, nyya gwabotu ikweyi kawoza ni sayi mo ngboshu lo ni. 31 Owuso, Ada ka Adole Oyesu an shaniye ko gbogbo-gbogbo! Gye kamo nyya kokame lalo. 32 Ishini nyyo Odamasko ni, ogbolamaga ni yo otu ko ose Areta ni sha awogbeho gofunu-oba mo ana ga yun kwu. 33 Ake yun teba ipu ko ogwugwu kweyi tun bwowu oye ipu kokpe ome npa shabo wa la.