1 Ami Obulus abiyun, ni ase ba mo ishini ni nyyebe kala ni, nyya ya byo nyya yoshi, kweyi ishi ni nshebe kala bita, nyya yoshi kelo. Ipu kiye ko Okristi ni gbotumene kpiyinyinyi ni, 2 nyya bala mo ala ka yun na gbapwo kpala lo ishini nwwa; ngye kwokwoshi mo nyya gege ya gbapwo kpawase ni kamo aha ba yoza owe ni ase kese ba ya ni. 3 Ko kwokwoshi aha bese mani, aha ke ba kpefu byoni ase kese ba kpo ni lalo. 4 Iyo kefu ni aba kpefu kpanu ni wa kese lalo, ake wiyo kefu ko Owuso ni loshu ni la, aba yoko kpawa ko yawole koshu kye, aba yawashu kokame kye; 5 aba yojoji ni ya gwakya ko yase owe gwu ko gyo Owuso ni kye; aba yotu wonyonya shetu ko yuwa na geyagye do Okristi. 6 Kweyi ishini ogeyagye kala wa gya, aba gbawase ni geyagye lo ni ogo agye.

7 Ala ba moza byoni awe iyi kpiyi ni kin la. Owoni ase ashini kala kamo awa wako Okristi, ana kyi kyanu ma neneshi, ikweyi koni aha wa ko Okristi byoni awa we ni. 8 Owoni ngwabotu shoshu ikweyi koshu ni Adole daha ni, nyya yiweyi lo, oshu ko zala iso, wako yala gbo lalo. 9 Nyya yimu shini naka lebyo nyya taloshi kpo awokpa ni nta ni lo. 10 Ashe ya kamo, <<Okpa kikpiye ko Obulus senu ki loshu. Ishini oke yo kpaha ni oya kela loshu-loshu mani lo, kweyi ela nu wojije!>> 11 Ase mani na gye kamo ozoza ni ata ipu kokpa kaha ni pini aba wa ya ishini abebe kala la.

12 Kokwokwoshi, aba kiyikaha lo ake ba myi iyikaha kpase ni ba miyiwa wojoji ni lo. Awikyo la! Aba myiyiwa kpoza ni shuwotu ni, kweyi aba ziyiwa soza ni ama mo oshoshi ni! 13 Aha ke ba gwabotu shoza ni awe ni lo, aba gwabotu ikweyi koko ni Owuso daha koya ni kin la, oko ni aha ya gebebe kala ni. 14 Aha gwabotu shoshu lo koni awebe kala ni, ko byo Oshu Neshi ko Okristi wa dala. Abi webe kala lo abi ba maha gwabotu shoshu. 15 Ake ba gwabotu ikweyi koko ni ase ashini ya ni ko gwebe ni Owuso she daha ni ta lalo. Abishi koni, aha kpiyi shagye mo otuse kala ya gye, shini an gege ko ki yoko shoshe ebe kala, ipu kishi kpiri aba gwoyi ni Owuso myi daha ni ta lo. 16 Ebeni aba pyo oshu ko tono ko Oshu Neshi go okpagye ashini ni gwala ta ni shini an ka gwabotu kpoko ni akwobonu ya agbabo kashe hoha ni lo. 17 Okpa ko Owuso ke kamo, <<Aseni ya gwabotu na gwabotu ipu ka Adole.>> 18 Koni ase ni kiyinu ni pini ya pya abokpa lalo, Ase ni Adole ke kela neshi ikweyi nu pini ya pya abokpa la.