1 Okpa mani bwebe ko Obulus, Oyikoko ko Okristi Oyesu byoni Owuso yimu ni, kpo oyene ka aha Otimoti.

Nyya toleho ko okpa mani gebe ka awogboso Oyesu ni bo Okorentus ni, kpase ko Owuso kpiri ni bo okpagye ka Akaya ni.

2 Owuso Ada kaha kpa Adole Oyesu Okristi na dalo oneshi kpo omene.

3 Ahan shotunehe do Owuso Ada ka Adole kaha Oyesu Okristi, Ada kiyinyiynyi, Owuso ni ya kase otu agye ni! 4 Anu tahabo ipu ko owe kaha kpiri, shini ahan ta ashini kase ni bipu ko owe moma wonyonya ni abo, byoni Owuso tahabo ni. 5 Byoni aha gbingbo ipu kowe moma ko Okristi ni, mamani bwebe ko Okristi aha gbingbo ipu ko otabo ko Owuso. 6 Owoni aha mowe, owikweyi kabo tota kala kpo ongmongma kala la; owoni Owuso tahabo, mani oni aha ba talabo ki daloshu ko zotu kpo omene kedo ko owe oyekponu ni aha ba ma ni. 7 Mani oni, iyitagye kaha ikweyi kala ya ja lo; ikweyi koni aha gye kamo byoni ala ba mowe kpa aha ni, mamani ala Owuso ya talabo kpaha dudu.

8 Ayene kaha, aba yimu ko ra la, kowe ni aha ma okpagye ka Asiya ni. Iyo ni agwo saha ni gyokwu kweyi olenu shahoshu, gbishini agye kamo aba gbolayi kelo. 9 Ama byo akwaha epwo kikwu la. Omani ke gbodagye shini an ka totu siyikaha lo, oke gbodagye shini an totuso Owuso la, anu ni ya yokwu ya nyiso ni. 10 Ongma aha shi ikwu mani, oki ya ngma aha; kweyi aha totuso mo oki ya ngmaha, 11 byoni ala ba tahabo kpi inarigwu ni ala bata daha ni. Ebeni Owuso ya pwinarigwu kala kpiri ni ala ba ta daha ni, kweyi Owuso ya saha aboneshi; kweyi ase nwashika ba zoko giso danu ko shotunehe do Owuso ikweyi kaha.

12 Aha ba gwabotu koni otu kaha ka daha mo oyagye kaha ese mani kpema rore kaha kpala, aha yojoji ipu kokwokwoshi kpotu neshi bwebe koshu keshi ko Owuso, woziyi kasuse lalo. 13 Aha tokpa koza ni ala ba maka kyi bagye ni la. Kweyi aha yotuse kamo, 14 koni ala ke gye kweyi lo ni, ayotuse mala bawa gye kpiri-kpiri, shini ala gwabotu kpaha byoni aba wa gwabotu kpala eno ka Adole Oyesu ni.

15 Ngye mani kpiri, pini ngbomu ko webe kala ikyikyo la, shini ala pya abola igbepa. 16 Ngbomu ko bwebe kala ishini nyyowe ko Omasedoniya kpishi ni nyya kwikye ni, shini ala tumabo owe kiyawu ko go Oyahudiya. 17 Ishini ngbomu mani ni, nzo kpigiga la? Kwe ngbomu hin byase kese la, ko kyogwu mo <<Olemani, olemani kpo aayi, aayi,>> ishi oye kponu la? 18 Byoni Owuso ya kokwokwoshi ni, okoyi hin dala wo <<Olemani>> kpo <<Aayi>> la lo. 19 Koni Oyesu Okristi, Oyi ko Owuso, ni ya tono ebe kala kpo Osila Otimoti kpami abiyun Obulus, kada la ikweyi nu ni wolamu ni wo <<Nalemani kpo aayi,>> la lo, ke woye gogo, owo <<Nalemani>> ko Owuso la; 20 Koni anu pini wo <<Nalemani>> koyi Owuso kpiri. Omani pini ya bwebe ko Oyesu Okristi <<Nalemani>> ka aba ka digyashi ko Owuso la. 21 Owuso abwenu pini yaha la, dudu kpa ala, gyokwoshi ka ipu ko dudu kpo Okristi; Owuso abwenu pini kpaha shaka la, 22 anu ni kyi myoyi kinoza ikpiye ka, kweyi kamo aha wa kaka nu. Okyi daha Omaku ko Owuso ipu kotu ka byoni oshokoyi kpaha mo oya daha oza kpiri ni shagye daha ni. 23 Nyya yo Owuso ogwu na wiwene hin, ogyotu hin! Ikweyi kala pini nggo Okorentus ke lo la, shini naka wegye dala lo. 24 Aba yimu ko yala shini ala kyogwu koshu lo. Aha ke ba yoko kpala dudu ikweyi kotunehe kala la, ikweyi koni aha gye mo ala hagye loshu ipu kotuse ni.