1 Ala bama byo aki ba ba gwabotu ikweyi kiyi kaha? Kwe ala bama mo ale byase ashini, ni ba doka ko okpa ko olobene ko dala kwe ala ko daha la? 2 Ala abiyikala pini wo okpa kaha la, tota ipu kotu kaha, ase kpiri gye kweyi aba maka.

3 Owokwokwoshi Okristi abiyinu pini tokpa mani kweyi toleho daha la. Otokpa mani kpinyi kenena lalo, oke ta kpo Omaku ko Owuso la, ikweyi kikyikpo lalo, ipu kotu kasuse la.

4 Aka mani ikweyi koni atotuso Owuso bwebe ko Okristi ni. 5 Ojije yipu kaha ni ya yaha ziyikala mo aba gege ko yoko mani lo. Oshu kaha ke bwebe ko Owuso la; 6 anu pini yaha gboshu ko yawo oko ko okoyi pepe mani la. Okoyi pepe mani wako ono ni ayitota ni la lo, oke wa ko Omaku ko Owuso la. Ono ni ayitota ni ya byikwu wa, Omaku ko Owuso ke ya dase olayi.

7 Ayo Ono tota we enena ikweyi ki ikyikpo, kweyi igyashi ko Owuso ke bose loshu loshu ishini ado Omusa ni. Oyoyu kaheyi ko Omusa kwotu ko gebi, kwikikyeni oloshu shoshu koni ase ki Izrayila ba ayiyi kwo ni, owoni ono ni ya byi ikwu wa ni, wa kpi igyashi mani, 8 oshu kigyashi koko ko Omaku ko Owuso ya she mani lo? 9 Owoni oko ni ya ngmase ni gbigyashi, oko kigyashi ni yaha waseneshi ni ya lemoji? 10 Aba gege ko ka mani ikweyi kigyashi ni yayu kotata anani shigyashi ni yayu nekye-nekye ni. 11 Owoni oza ni yaba kishi gbayayi ni gbigyashi, igyashi koza ni ya rese kogbogbo-gbogbo ni ya lemoji?

12 Ikweyi koni ayotuse mani, ikpiye kaha loshu neshi. 13 Alema byo Omusa la lo, ni ya yakyi kiyi nu shini ase ki Izrayila naka mo sosa koyoyu kweyi gebi ni. 14 Otu wa, gwu, kwokwoshi; kweyi kwikyikyeni otu wa gwogwu kpayikyi oye ishini aba kokpa ko okoyi nekye ni, aki oni ya gwa kin ishini ase mani yipu ko dudu kpo Okristi la. 15 Kwikyikyeni, ishi kpiri akokpa ko Ono ko Omusa, akyi yoyo yuwotu gwu. 16 Oke ya gwa, byoni Okpa ko Owuso ka ikweyi ko Omusa mo: <<Akyi ko Omusa gwa ishini opya wobutu ka Adole.>> 17 Anani, Adole ipu kela mani pini wo Omaku la; kweyi ebe ni Omaku ka Adole yanu, Adole ya ngmaha. 18 Kweyi kpiri kaha ba mi igyashi ka Adole kpa aheyi kaha gwogwa; kpi igyashi bwebe ka Adole, ni wo Omaku ni, ko yaha pya le byanu ipu kigyashi nu ni shi igyashi kpiri ni.