1 Oshu ni agbo ni wo Okristi ni ngmaha ni! Ala hagye byase ni ayuwa ngma oko ni, ala ka shiyi kala bita byoshe kelo. 2 Ala pwo! Ami Obulus pini ya kadala ma, owoni ala kyogwu mana shala ofu, olema byo Okristi gboko ipu kala lo kpiri-kpiri oma. 3 Nyya rala mo ase ni ya ko ono kofu shoshe, owotiri ko ko Ono kpiri oma. 4 Ala ni ba yimu ko wase neshi obutu ko Owuso bwebe ko ko Ono ni, ala yiyikala ngma sho Okristi oma. Ala bose shipu keshi ko Owuso oma. 5 Aha ke, atotuse mo Owuso ya yaha wase neshi obutu nu; omani pini woza ni aha ba gbeyi bwebe koshu ko Omaku ko Owuso ni ya yoko ipu kotuse kaha ni. 6 Owoni abipu ko Okristi Oyesu, kaha shofu kaha shofu lo, owojije lo; oza ni shoshi ni ase na gege ko yotuso Okristi, ni ya yoko bwebe kimu ni. 7 Ala ba gohobu neneshi! Anoho wa walobi ko geyagye do okwokwoshi? 8 Egya ni aba gyala ni bwebe ko Owuso ni yala ogwu ni lalo. 9 Byoni aba ka ni, <<Oyisi gbayayi pini ya yikyoga ya nu la.>> 10 Kwikyikyeni nyya rala mo ntotusala. Ema kaha kpa Adole yun yotusala mala ba zela oye gogo lo, kweyi ase ni gyalegya ni Owuso ya gbogagye.

11 Ayene hin, owoni nyya tono kofu shoshe la, ojiya ni ase ba damowe? Owoni nbiya kamo owotiri ko shofu la onototu hin ikweyi kikwu ko Okristi ikweyi koshi biya woza yeye! 12 Nbi ya yimu mawo tawashu oni bi ga yiyiwa bwu!

13 Ala ke, ayene hin, Owuso yala ogwu shini ala ka wo oshe lo. Ala ka yabo bo shini na woza ko yala yo ozalabi lo, ala ke yoko diyikala ipu kimu. 14 Ono kpiri abyo wa ikweyi kela oye: <<Yimu kase byoni oya yimu kiyo ni.>> 15 Owoni ala ke ba rotu kiyi kala, ala gbera la lo, ala ba yiyikala ngmo.

16 Nyya kamo ala sho Omaku bita na kpala ogwu, owoni ala ya mani ala ba gbimu kikpiye lo. 17 Ikweyi koni oko ki ikpiye ya tela koko ko Omaku, oko Omaku ke ya gbayi kpa ki kpiye lo, pepa wa wo monyekwotu kiyiwa, omani ya shiyaha mo oya yoza ni oya yimu ko yani lo. 18 Owoni Omaku yo kpawo, ono gboshu oyoye ikweyi wo lo. 19 Oko kikpiye ya teba lo: ebaboba, obwa, ozayoya shushuku, 20 geyagye deka, oloha rore, onu, afu yoya, otu yoya, yimu kiyo, awashu tota, ikpo koko 21 kpa anya yoya; inyi gwogwa, igiga kowu yoya, kpa ashini koza mani. Nyya pyala akpaha byoni nkwobonu pyala akpaha ni: awino yawoza mani ba rogwu ko obula ko Owuso lo.

22 Ozani Omaku ke ya ma ni yoma: imu yoya, otunehe, omene, otuzoze, oneshi yoya, oza neshi, okwokwoshi, 23 otumene, kpo yase kwiyinu; ono yikweyi kawoza mani lo. 24 Awase ni wa ko Okristi Oyesu ni kwobonu yikpiye wa kozalabi yi ngmo oshi kpoza kpiri ni ikpiye ya yimu ni. 25 Omaku pini daha olayi la; owotiri shini ona kpaha ogwu. 26 An ka zikweyi iso kwe an yotu kiyikaha na bya kwe an yafu kiyikaha lo.