Ema Ipu ki Ikpiye ko Okristi
1 Ni olemani oni, ami ni ayun shetu ikweyi koni nyya yoko ka Adole ni, ya ba ala mala bagye neshi gyogye kpogwu ni Owuso yalo ogwu ni. 2 Ipu ki ishi kpiri ala ka zikweyi iso lo, ala gbo otumene, ala zotu. Ala sayi kimu yoya kala bwebe ko gbotu kpi iyikala. 3 Ala takirikwu shala bipu kema kpo Omaku bwebe ko omene ni kpala gbayi ni. 4 Ikpiye woye kponu, Omaku woye kponu, byoni otuse woye kponu ni Owuso yalogwu gipu nu ni. 5 Adole woye kponu, otuse woye kponu, obatisma woye kponu; 6 Owuso woye Ada kase kpiri, ni wa Adole kase kpiri, ni ya yoko kpase kpiri kweyi yipu kase kpiri ni.
7 Ananoho kaha nyeshi gyogye kpo oza ni Okristi daha ni. 8 Byoni Okpa ko Owuso ka ni,
<<Ishini otoshi gisiso ni,
obya awase nwashika ni bo oruduru ni ga kpanu;
oda ase eshi.>>
9 Anani, owoni amo <ogiso> ase nu lemoji? Ela mani sayi mo ikyikyo osa weyeye kese. 10 Mani oni anu ni sa bwiso ni ananu pini toshi giso la, ogiso kweyi gwawiso ta, shini ona yese kpiri na nwonwu kpi iyinu. 11 Anu pini da ase eshi la; oyase shishini wa ayikoko ko Oyesu, ase shishini wa awinobane, ase shishini wa awotono, ase shishini wa awosapa kpa awofoza. 12 Oya mani ko kyase ko Owuso kpiri tu ko yoko ka awogboso, shini ikpiye ko Okristi na gye gohobu.