1 Uteku tsu na ayun a na a̱ kuwa̱i a tsu zuwa ili i ma̱gula̱ni i shama,

ta feu tsulau kenu tsu tsu la̱nga̱sa̱ ugboji n tsugbayin nannai.

2 Ka̱ɗu ka vuza vu ugboji ka tsu zuwa yi ta̱ kuyaꞋan ili derere,

ama ka̱ɗu ka kalau ki ta̱ tsugula̱

3 Ko wi baci a nwalu a uye,

kalau ko ci yotsongu ta̱ a na wi m ma̱riki ba,

u yotsongu yaba dem tsulau ci ni.

4 Ɗa baci vuza tsugono u yaꞋin wupa n avu,

ka̱ta̱ vu yaꞋan moloko vu laza ba,

adama a na uvaꞋanki u ka̱ɗu tsu zuwa ta̱ a cinukpa n unushi u gbayin.

5 Me ene ta̱ ka gbani-gbani ko yoku aduniyan,

unushi u gbayin u na ngono n ci yaꞋan sa,

6 ɗaɗa e ci neke ta̱ alau tsugbayin,

aza a uciyi tamkpamu a zuwa le ɗaka.

7 N saꞋawa ta̱ ku ene agbashi gaɗi vo odoku,

muku mu ngono tamkpamu a ku dasa a ene a na agbashi.

8 Vuza na u ga̱va̱i kpenle a̱yi ɗa wi a̱ kuyikpa̱ punu a ku ɗa,

vuza na baci dem u fa̱da̱i mashilya a̱yi ɗa koko ki a kuluma.

9 Vuza na wi o kuɓoso atali a̱yi ɗa u tsu uka usa̱n,

vuza na wi a kuɓatsa nɗanga, a̱yi ɗa mo tsu foro.

10 Kogovu ki baci n alyu ba,

ɗa kpamu e temgbei kaꞋa ba,

kuyaꞋan ulinga n kaꞋa, mayun sai n utsura ka̱u.

ama ugboji u tsu zuwa ta̱ a̱ ciya̱ ulyaꞋi.

11 Ɗa baci koko ka lumai vuma babu biꞋi u soꞋo makpaɓu.

ulinga u makpaɓu wo okpo ta̱ gbani.

12 Kadanshi a una̱ u vuza vu ugboji kasingai kaꞋa,

ama kadanshi ka kalau ka tsu una yi ta̱.

13 Ugiti u kadanshi ka̱ ni tsumici tsu ɗa,

ukocishi wa kpamu u tsu okpo ta̱ ujari u gbani-gbani.

14 Kalau ko ci yongo ta̱ kadanshi kpawawa.

Ko vuza u yeve ili i na yi a̱ kuta̱wa̱ ba,

yayi wa kufuɗa kudana yi ili i na i kugita̱ ɗa baci u kuwa̱i. 15 Ulinga u kalau u tsu oꞋuso yi ta̱,

ali u namba uye u kubana a̱ likuci.

16 Ili ya atakaci a iɗika i na mogono ma̱ nu mi n yakpa,

ɗa aza o tsugono a̱ nu a̱ ka̱na̱i kuyaꞋan ka̱ɗiva̱ n usana.

17 Una̱singai a kubana a iɗika

i na mogono ma̱ nu a matsa yi ta̱

a kpaꞋa ku tsugono,

iɗika i na aza o tsugono a̱ tsu ciya̱ ilikulyaꞋa a makyan ma na ma untsai,

adama a na a̱ ciya̱ utsura, ba adama o kusoꞋo ba.

18 Ukpa̱ɗi u tsu zuwa ta̱ nɗanga n kushankpu m gba̱ɗa̱sa̱,

ekiye a vuza vu ukparuma a tsu zuwa ta̱ kunu ku uwa mini.

19 O tsu foɓo ta̱ ka̱ɗiva̱ adama a kupana ku uyoꞋo,

ma̱kya̱n tankpamu adama a na ma zuwa ka̱ɗu ma̱za̱nga̱,

ama ikebe i ɗa i tsu ushuki n ili ra̱ka̱.

20 Ka̱ta̱ vu shika mogono ko a̱ ka̱ɗu ka̱ nu ba,

ko vu shika vuza vu uciyi ba ko a̱ kunu ku nu,

adama a na ko manunu mi ta̱ a kubanka n kadanshi ka̱ nu,

ko ili yi evelyu i yoku yi ta̱ a kufuɗa kusala ili i na vu dansai.