1 Foɓongu ka̱ci ka̱ nu ayin a na baci vu banai a kpaꞋa ku Ka̱shile. U laꞋa ta̱ vu bana vu pana, an va kubanka n kuneꞋe tsu kalau, aza a na e yevei a na a̱ nusai ba.

2 Sheshe biꞋi kafu vu dansa, Ka̱ta̱ vu yaꞋan moloko kadanshi ba, Ka̱shile ba.

Ka̱shile ki ta̱ gaɗi

avu tamkpamu na iɗika,

adama a nannai ka̱ta̱ vu dansa wuntsukpi.

3 Ka̱bunda̱i ka kataci ka̱ tsu tuka̱ ta̱ n alatani,

ta feu nannai ka̱bunda̱i ka kadanshi ka̱ tsu tuka̱ ta̱ n tsulau.

4 Ɗa baci vu yaꞋin uzuwakpani ɗa kucinai kuneke Ka̱shile ili, ka̱ta̱ vu geshe ba vu tsupa ili i na vu kucinai kuneke. Adama na a̱yi u tsu pana uyo wa a alau ba. tsupa i li i na vu kucinai kuneke. 5 U laꞋa ta̱ n kugaꞋan vu kpa̱ɗa̱ ku kucina, an va kukpa̱ɗa̱ ku tsupa ili i na vu kucinai. 6 Ka̱ta̱ vu ka̱sukpa̱ una̱ u nu u zuwa wu kunusa ba. Ka̱ta̱ kpamu vu dana kalingata ka̱ AꞋisa̱ a gbayin vu dana, <<Uzuwakpani u na vu yaꞋin va unushi u ɗa.>> Yiɗa̱i i zuwai Ka̱shile ki a wupa n kadanshi ka̱ nu ali u la̱nga̱sa̱ ulinga we ekiye a̱ nu? 7 Ka̱bunda̱i ka alatani n kadanshi ka̱ a̱bunda̱i ili i gbani i ɗa. Adama nannai pana wovon u Ka̱shile.

8 Ɗa baci ve enei i a kutakacika vuza vu unambi a uɓon u yoku, i a kuyaꞋan usuɓi mejege ba, kpamu i ta̱ o modoruko ka̱ta̱ vu yaꞋan mereve ba, adama a na vuza kelime dem u tsu yongo ta̱ n vuzagbayin e kelime ka̱ ni. Kpamu e kelime ke le ra̱ka̱ i ta̱ ɗe n vuzana u laꞋi le kpamu. 9 Yaba dem u tsu ci ciya̱ ta̱ ili i na iɗika ya i ci neke, ali m mogono feu, u tsu ciya̱ ta̱ i na ashina a matsai.

10 Vuza na wi n ucigi ikebe dem, i ci yawa yi ba.

Vuza na u cigai uciyi n a̱bunda̱i u tsu ciya̱ tsu na u cigai ba.

Nava feu gbani ɗa.

11 Tsu na uciyi u yimkpai,

ta feu aza a kulyaꞋa i nannai.

Yiɗa̱i uciyi wa u kudoku vuza vu ɗa,

ɗaɗa u zuwaka u ɗa a̱shi ba?

12 Alavu a zamalinga o ci yokpo ta̱,

ko u lyaꞋa kenu ko n a̱bunda̱i,

ama ka̱bunda̱i ki ili i vuza vu uciyi

ka̱ tsu sa̱nka̱ yi ta̱ alavu.

13 Me ene ta̱ ili i gbani-gbani yoku aduniyan.

Uciyi u na vuza vu u ɗa u foɓoi u zuwa yi ta̱ una̱mgbuka̱tsuma̱,

14 ko ma̱da̱ka̱ ma̱ ka̱na̱ yi uciyi wa u na̱mgba̱,

ali wo okpo ayin na baci u ciya̱i maku

ka̱ta̱ u namba ili i na u ku ka̱sukpa̱ka̱ yi.

15 Koshomboɗi ka vuma wu uta̱i a̱ ka̱tsuma̱ ka̱ a̱na̱ku a̱ ni,

ta feu wi o kubono nannai tsu na u ta̱wa̱i.

Ko ili wi a kuɗika ekiye a̱ ni

a̱ ka̱tsuma̱ ka kataci ka̱ ni,

a na u kuɓa̱na̱ ekiye a̱ ni.

16 Nava feu ili i gbani-gbani i ɗa.

Tsu na vuma u ta̱wa̱i, ta u kubanaꞋa nannai,

yiɗa̱i u ciya̱i punu,

kataci kaꞋa o kutono wunla̱i.

17 Wuma u ni ra̱ka̱ a̱ ka̱yimbi kaꞋa wi a kulyaꞋa ilikulya,

n ka̱bunda̱i ka atakaci n una̱mgbuka̱tsuma̱ n wupa.

18 Ɗa n yevei, a na ugan ta̱ kpamu u yotso ta̱ vuma u lyaꞋa u soꞋo, u pana uyoꞋo u kataci ku ulinga u ni, a̱ ka̱tsuma̱ ka ayin a na Ka̱shile ke nekei ni aduniyan. Adama a na ɗaɗa upecu u ni. 19 Vuza na baci Ka̱shile ke nekei udukuyan n uciyi, ɗa kpamu u nekei ni kofon u pana uyoꞋo wu u ɗa. Wu ushuki n upecu u ni, u yaꞋan ma̱za̱nga̱ a kataci ka̱ ni, kuneꞋe ku Ka̱shile ku ɗa. 20 VicuꞋu vu vuma vu nanlo va u tsu ciɓa n ayin a wuma a̱ ni ba, adama a na Ka̱shile ka zuwa yi ta̱ u yongo m ma̱za̱nga̱ a̱ ka̱ɗu ka̱ ni.