1 Ɗa me enei kawuya ko yoku punu aduniyan, ɗa tana ka yimkpai a uma. 2 Ka̱shile ke ci neke ta̱ vuma uciyi, n ili yi ekiye n tsugbayin, adama a na ka̱ta̱ u namba i na ka̱ɗu ka̱ ni ka cikalai ba. Ama ka̱ta̱ Ka̱shile ka̱ sa̱nka̱ yi u pana uyoꞋo wi ɗa. Ka̱ta̱ komoci ka kucikpa ka pana uyoꞋo wi ɗa. Nava gbani ɗa, ili i gbani-gbani i ɗa.

3 Vuma wi ta̱ a kufuɗa kumatsa muku amangatawun, ka̱ta̱ u yaꞋan a̱ya̱ n a̱bunda̱i, ko a na u geshei n wuma, ɗa baci u panai uyoꞋo wu uciyi u ni ba, kpamu u ciya̱ uciɗa̱ngi u singai ba, maku ma na a matsai ukpa̱ ma laꞋa yi ta̱. 4 Gbani ɗa kumatsa maku ukpa̱, adama a na a̱ ka̱yimbi kaꞋa u ta̱wa̱i, a̱ ka̱yimbi ka kpamu u bonoi a̱ ubuta̱ u na a cinukpai n a̱yi. 5 Ko a na wo okpoi u ciya̱ we ene kutashi ba, u yeve kpamu ili i yoku ba, n nannai dem wu uvuka ta̱, u laꞋa ta̱ vuma vu na u panai uyoꞋo wu uciyi u ni ba, 6 ko ɗa baci u yaꞋin a̱ya̱ a̱kpa̱n e re, ama u pana uyoꞋo wu uciyi u ni ba. A̱ ubuta̱ ute u ɗa i a kubana ba?

7 Kataci ka vuma dem adama a una̱ u ni u ɗa,

N nannai dem ili i na wi a mali i ci yawa yi ba.

8 Yiɗa̱i vuza vu ugboji u laꞋakai kalau?

Yiɗa̱i vuza vu unambi u ci ciya̱i

a na u yevei kuyongo n uma?

9 U laꞋa ta̱ n kugaꞋan vu pana uyoꞋo n ili i na vi n i ɗa

n a̱shi awuya a na vu ciya̱ n a̱bunda̱i.

na lo gbani ɗa

kutono ku wunla̱i ku ɗa koci.

10 Dem ili i na yu uta̱i ɗe, yi ta̱ n kula,

kpamu tsu na vuma wi, e yeve yi ta̱ ɗe,

babu vuza na u kufuɗa kudoku

ili i na i laꞋi ni utsura.

11 Kadanshi n a̱bunda̱i,

ka̱ tsu tuka̱ ta̱ n kakpawawa,

yiɗa̱i vuza u kuciya̱ a kadanshi ka̱ a̱bunda̱i? 12 Yayi u yevei ili na i gaꞋin vuma a̱ ka̱tsuma̱ ka ayin e kenu a gbani a na a tsu laza tsu kululu? Yayi wa kudana yi ili na i kugita̱ aduniyan ayin a na u kuwa̱i?