1 Taɗuku kuneꞋe ku nu a̱ ka̱ca̱pa̱,

adama a na vi ta̱ o kuciya̱ i ɗa ayin a̱ kuta̱wa̱.

2 Pecuku i na vi ni ɗa ugboku cindere, ali kunla̱i,

adama a na vu yeve ma̱dukpa̱ ma na i a̱ kuta̱wa̱ a iɗika ya ba.

3 Eleshu a shana baci m mini,

o ci yoꞋo ta̱ mini a iɗika.

ko maɗanga ma̱ yikpa̱ a uɓonɗakai ko uɓongaɗi,

maɗanga ma mi ta̱ a kuvaku a̱ ubuta̱ u na u yikpa̱i.

4 Vuza na baci dem wi a kuzuwaka n wunla̱i wi a kuyaꞋan vica̱Ꞌa̱ ba,

vuza na dem wi a kinda eleshu wi a kuyaꞋan makapa ba.

5 Tsu na vu yeve uye u wunla̱i u ba,

ko tsu na a yaꞋin maku a vuka vu ka̱tsuma̱ ba,

ta feu nannai yi a kufuɗa kuyeve kuyaꞋan ku Ka̱shile ba,

kayaꞋin ki ili ra̱ka̱.

6 Ca̱Ꞌa̱ icuꞋu i nu n usana,

ka̱ta̱ tana vu ka̱sukpa̱ ulinga ba n kulivi ka̱ta̱ vu uvuka ba,

adama a na vu yeve vuza na a̱ kuyaꞋan ba,

ko a̱yi nampa ko a̱yi nanɗe,

ko kpamu dem vu le uta̱ mayin.

7 Kutashi ki ta̱ n ugaꞋin,

kpamu ili i singai i ɗa a̱shi inda kutashi ku kanna.

8 Ko a̱ya̱ a yaꞋin a ɗa baci vuma u kuyongo,

yaꞋan u pana uyoꞋo u le dem.

ama yaꞋan u ciɓa n ayin a̱ ka̱yimbi,

adama a na aɗa feu i ta̱ a kuyimkpa.

Ili ra̱ka̱ i na yi a̱ kuta̱wa̱ gbani ɗa.

9 YaꞋan ma̱za̱nga̱ avu ka̱ɗa̱nga̱ni, avu biꞋi kenu,

yaꞋan ka̱ɗu ka̱ nu ka pana uyoꞋo a ayin o tsuloboi a̱ nu.

Tono kusheshe ku ka̱ɗu ku nu

n ili i na a̱shi a̱ nu enei,

ama ka̱ta̱ vu yeve a̱ ka̱tsa̱ma̱ ki ili nampa ra̱ka̱

Ka̱shile ki ta̱ a kuyaꞋanka wu afada.

10 Adama a na ka̱ta̱ vu oꞋuso ka̱ɗu ka̱ nu ba.

vu varuku ili i na yi o ku oꞋuso wuma u nu ra̱ka̱,

adama a na tsu lobo-lobo n utsura gbani ɗa.