1 Aza a Isaraila i ta̱ tsu maɗanga mi itacishi,

ma na ma tsu neke umaci n a̱bunda̱i.

a makyan ma na muku n le mi o kudoku,

Ta feu atali alyuka a̱ma̱li e le o kudokusu nannai.

a makyan ma na uciyi wi iɗika i le wi o kudoku n ka̱bunda̱i,

ta feu tsuloboi tsu katalikalyuka ka ki a kuyimkpa nannai.

2 A̱ɗu e le e pecei kure,

ama gogo na mayun ɗa a isa atakaci a unushi u le.

Vuzavaguɗu wi ta̱ o kuɓososo atali alyuka ele ra̱ka̱

ka̱ ta̱ kpamu u la̱nga̱sa̱ atali a na a tsu yaꞋan ka alyuka.

3 Gogo na i ta̱ a kudana, <<Tsu buwa n mogono ba,

adama a na tsu pana wovon u Vuzavaguɗu ba.

Ko cishi baci n mogono,

ama yiɗa̱i mogono mi a kufuɗa kuyaꞋan ka tsu?>>

4 Motonu maꞋan koci i a kuyaꞋan,

a kuyaꞋan a uzuwakpani wa aꞋuwa,

adama a nannai afada aꞋuwa a̱ ka̱na̱i kuɗa̱nga̱,

tsu mita̱ ma gbani-gbani mo tsukono a kashina.

5 Aza a na i a ida̱shi a Samariya e jeꞋekei ikyamba adama o wovon,

adama a̱ ka̱ma̱li ke medendem ma Betu-avin,

uma i ta̱ a kuyaꞋan kpalu adama a̱ ni.

anan ganu vu ka̱ma̱li va, i ta̱ a̱ ku na̱mgba̱, ka̱tsuma̱ adama a̱ ni,

adama a na tsugbayin tsu ka̱ma̱li ka tsu ka̱sukpa̱ yi ta̱.

6 I ta̱ a kubanka m medendem ma Asiriya

adama a na a tsupaka mogono ma gbayin utafu.

I ta̱ e kuneke Ifiraimu wono,

Aza a Isaraila tana i ta̱ a kupana wono, adama odoki a na o tonoi.

7 Mogono ma aza a Samariya mi ta̱ a̱ ku puwa̱nka̱,

tsu kapufu a gaɗi vu mini.

8 Ubuta̱ wa avasa a gaɗi vu aginda a Avin,

a uɓon u na aza a Isaraila a tsu yaꞋan unushi,

ra̱ka̱ i ta̱ o kuɓoso le,

Awana i ta̱ o ku gbonguro a gaɗi vu atali alyuka ele,

Uma i ta̱ a kudana nsasan m gbagbaꞋin ma, <<palai tsu,>>

wa nsasan n kenkeꞋen kpamu, <<Yikpa̱i a gaɗi vu tsu>>

Vuzavaguɗu u kiɗaka ta̱ aza a Isaraila afada.

9 Vuzavaguɗu u danai, ali a̱ ugiti wu unushi u ɗa̱ a Gibiya,

i ka̱sukpa̱ ba

kuvon tana ki ta̱ a kulyaꞋa le a Gibiya?

10 Mi ta̱ a kutakacika uma a nanlo aza a unushi,

ka̱ ta̱ o ɓolongu uduniyan a yaꞋan tsurala n e le,

i ta̱ a kutakacika ɗa̱ adama a unushi wa̱ a̱bunda̱i u ɗa̱.

11 Kumaci ka aza a Ifiraimu ki ta̱ tsu kanaka ka na a piꞋisakai kunima,

ka na kpamu ka tsu pana uyoꞋo u kuyaꞋan kuyelyukpu.

gogo na n zuwaka ta̱ Isaraila kogboro ka̱ a̱miki e kuɗeku ku singai ku ni.

n zuwai kumaci ku Yahuda ku rono ma̱ba̱ri ma kulima.

kumaci ku Yakubu tankpamu ki ta̱ a kucimba ka ka̱ci ka̱ ni.

12 YaꞋankai ka̱ci ka̱ ɗa̱ vica̱Ꞌa̱ vu singai,

ka̱ ta̱ i kyaꞋa ili i na i cigai,

adama a na makyan ma kula̱nsa̱ Vuzavaguɗu ma yawa ta̱,

adama a na u ta̱wa̱ u tsuwa̱nka̱ tsu una̱singai.

13 Ama ɗa i kucukpai i ca̱Ꞌi kawuya,

ɗa kpamu i kyaꞋi kawuya,

i lyaꞋi katsupu ka aꞋuwa.

Adama a na i neke ta̱ a̱ɗu a uye u ka̱ci ka̱ ɗa̱,

koɓolo kpamu n ka̱bunda̱i ko ovonshi a̱ ɗa̱.

14 Adama a nannai yoroli i kuvon yi ta̱ a̱ kuɗa̱nga̱ a̱ ka̱tsuma̱ ka uma a̱ nu,

a̱ likuci yi ukanji i ɗa̱ ra̱ka̱, i ta̱ o kuɓoso le.

uteku tsu na Shalmanezer wu unai Betarbel a kanna ka kuvon,

ɗa kpamu u ɓasangi aci a̱ma̱ci koɓolo n a̱ muku a iɗika.

15 Ta feu a kuyaꞋanka ɗa̱ nannai, A̱ɗa̱ aza e Betelu,

adama a ka gbani-gbani ka̱ a̱bunda̱i ka̱ ɗa̱.

n ugiti u kuvon i ta̱ a ku una mogono mi Israila.