1 Panai ka nampa, a̱ɗa̱ anan ganu,

kira̱nga̱i, a̱ɗa̱ uma a Isaraila,

zuwai atsuvu, aza a kpaꞋa ku tsugono,

i ta̱ a kuyaꞋanka ɗa̱ afada,

adama a na yi okpo ta̱ maza a Mizipa,

a̱ ubuta̱ u kucikpa a̱ma̱li ɗe a Taboru.

2 Ɗa i ga̱va̱ka̱i le kpenle ku uga̱vi adama a na ya aza le,

mi ta̱ a kutakacika yaba dem vu ɗa̱.

3 Mpa n yeve ta̱ ka̱ɗu ka Ifirayimu,

Aza a Isaraila i usokongi a̱ va̱ ba.

a̱ɗa̱ kumaci ku Ifirayimu, i yaꞋan ta̱ cishakanlai,

Aza a Isaraila tankpamu a natukpa ta̱.

4 Ka gbani-gbani ke le ka̱ ka̱sukpa̱ le o bono u Ka̱shile ke le ba,

adama a na i ta̱ n a̱ɗu a cishakanlai,

adama a nannai e yeve Vuzavaguɗu kpamu ba.

5 Ugbamukaci wa aza a Isaraila wu uta̱ ta̱ e keteshe,

Aza a Ifirayimu i ta̱ a̱ kuta̱ɗa̱tsa̱ adama a unushi u le,

aza a Yahuda feu a̱ kuta̱ɗa̱tsa̱ n ele.

6 N ushiga wu nlala n wa anaka,

i ta̱ a kubana kula̱nsa̱ Vuzavaguɗu,

ama i a̱ kuciya̱ yi ba,

adama a na u ka̱sukpa̱ le ta̱.

7 A yaꞋanka ta̱ Vuzavaguɗu unambi wu usuɓi,

a matsai muku n na mi n ni ba.

a̱ ka̱ɗiva̱ ko wotoi u savu,

i ta̱ a ku una le n ili i kashina i le.

8 Lika̱i kavana a Gibiya,

i lika̱ vushari a Rama.

yaꞋin yoroli i kuvon a Betu-avin,

yaꞋin kujeꞋe ku kuvon kumaci ku Bayami.

9 Iɗika i Ifirayimu yi ta̱ o kokpo agali, a kanna ka atakaci,

a̱ ka̱tsuma̱ ka kumaci ki Isaraila,

n dansa ta̱ ili i na yi a̱ kugita̱ mayun.

10 Aza e kelime a Yahuda,

okpoi tsu aza a na a tsu takpa atali e kureꞋe ku kashina,

mi ta̱ a̱ kutsuwa̱n ka̱ le wupa u va̱,

tsu na mini ma tsu aya.

11 Aza a Ifirayimu i ta̱ a̱ ka̱tsuma̱ ka atakaci,

afada a lyaꞋa le ta̱,

adama a na e sheshe ta̱ kutono a̱ma̱li.

12 Adama a nannai mi ta̱ o kokpo tsu kazun a Ifirayimu,

ka̱ ta̱ n zuwa aza a Yahuda okpo agali.

13 Ana aza a Ifirayimu enei mɓa̱la̱ n le,

aza a Yahuda feu enei usa̱n u le,

ɗa aza a Ifirayimu o bonoi a Asiriya,

a̱ ubuta̱ u mogono ma gbayin.

Ama mogono ma̱ kuɓa̱nka̱ le, ko wu isa le ba.

14 Mi ta̱ o kokpo tsu kawu wa aza a Ifirayimu,

tsu maku ma kawu kpamu wa aza a Yahuda.

mi ta̱ a ku sazasa le ka̱ta̱ n laza,

babu vuza na u ku isa le ekiye a̱ va̱.

15 Ka̱ ta̱ m bono a̱ ubuta̱ wu ida̱shi i va̱,

ali makyan ma na a̱ la̱nsa̱i mu a̱ shika̱i unushi u le.

a̱ ka̱tsuma̱ ka atakaci ele ɗa a̱ kula̱nsa̱ mu.