1 A̱ɗa̱ aza a Isaraila, panai kadanshi ka Vuzavaguɗu,

adama a na Vuzavaguɗu wi ta̱ n kadanshi n a̱ɗa̱, a̱ɗa̱ na yi a̱ ida̱shi a iɗika ya,

adama a na ko kamayun n ucigi,

ko kuyeve ku Vuzavaguɗu a iɗika ya.

2 I ta̱ a kuyaꞋan akucina a tsu shatangu ba, n aꞋuwa n munuka, n tsugbani,

nu nsata, n uboki n kutsuwa̱n ku mpasa ma aza babu unushi a makyan dem,

3 Adama nannai iɗika ya yi ta̱ e kuɗekpe,

ili i na yi punu ra̱ka̱ yi ta̱ e kuɗekpe,

nnama n kakamba nu nnu n adan i ta̱ a̱ kukuwa̱.

4 Ɗa Vuzavaguɗu u danai,

Ka̱ta̱ vuza u neke toku unushi ba ko u ɓarangu yi,

adama a na n a̱ɗa̱ ɗa mi a kadanshi a̱ɗa̱ anan ganu.

5 Adama a nannai, avu ganu vi ta̱ a̱ kuta̱ɗa̱tsa̱ n kanna n kayin.

keneki feu ki ta̱ a̱ kuta̱ɗa̱tsa̱ n avu n kayin.

mi ta̱ a ku una Isaraila a̱na̱ku a̱ nu.

6 Uma a̱ va̱ i ta̱ a̱ kukuwa̱ adama a unashi.

A na wo okpoi a̱ɗa̱ anan ganu i iwain kula̱nsa̱ kuyeve,

mpa feu mi ta̱ a ku iwan ɗa̱ a ulinga u tsuganu,

adama a na i cinukpa ta̱ n wila̱ u Ka̱shile,

mpa feu mi ta̱ a kucinukpa n muku n ɗa̱ a ulinga u tsuganu.

7 Tsu na anan ganu i o kudoku n ka̱bunda̱i,

ta feu unushi o kudoku n ka̱bunda̱i nannai,

mi ta̱ o kubonoko tsugbayin ci le tsu okpo ili yi unata̱.

8 I ka̱na̱i ku kuɓolonku ka̱ci ka̱ ɗa̱ uciyi n kuneꞋe ku unushi ku uma a̱ va̱,

ɗa a̱ ka̱sukpi uma a lyaꞋi kelime n kuyaꞋan unushi wa.

9 Tsu na uma i, ta feu anan ganu nannai okpoi una̱ u te.

Mi ta̱ a kutakacika le adama a kawuya ke le,

mi ta̱ a kutsupa le derere vu ulinga u le.

10 Yi ta̱ a kulyaꞋa ama yi a̱ kucuwa̱ ba,

yi ta̱ kpamu a kuyaꞋan cishakanlai adama a na i ciya̱ muku

ama yi a̱ kuciya̱ limata ba,

adama a na i iwan ta̱ Vuzavaguɗu i tonoi a̱ma̱li, 11 ɗa Vuzavaguɗu u danai,

kuyaꞋan cishakanlai, n ma̱kya̱n ma savu,

n ma̱kya̱n ma na ma lamkpai,

ma tsu zuwa ta̱ uma a̱ va̱ kupuwa̱nka̱. 12 uma a̱ va̱ i ta̱ a̱ kula̱nsa̱ kuyeve.

a̱ ubuta̱ wa̱ a̱ma̱li a nɗanga a na e sheꞋwei,

a dana le ili i na a kuyaꞋan,

e kusheshe ku le ka̱ma̱li ka ki ta̱ a kudana le,

ili i na yi a̱ kuta̱wa̱,

a̱ɗu a cishakanlai a̱ ya̱nsa̱i le, ɗa a̱ kpa̱ɗa̱i kutono Ka̱shile ke le.

13 a yaꞋansai alyuka gaɗi vu nsasan,

ɗa kpamu o songi kuneꞋen gaɗi va aginda,

n a̱miꞋin a nɗanga n Oku,

adama a na i ta̱ n kulu ku sungai.

ɗa i zuwai n kere n ɗa̱ n ka̱na̱i cishakanlai,

ejene a̱ ɗa̱ tamkpamu a̱ ka̱na̱i tsugbani.

14 Mi a kutakacika muku mu nkere n ɗa̱,

a makyan ma na i a cishakanlai ba,

ko n takacika ejene a̱ ɗa̱, adama a tsugbani ba,

adama a na ali feu yi ta̱ a kuyaꞋan nannai,

i tsu vaku ta̱ n ashakanlai a̱ nva̱li ma̱ a̱ma̱li,

ɗa kpamu yi o kutono a̱ma̱ci o yoku pulai,

uma a na a iwai kupana, i a̱ kukpa̱ɗa̱ ku ene ba.

15 Ko a na wo okpoi aza a Isaraila i ta̱ a tsugbani,

ka̱ta̱ aza a Yahuda a yaꞋan unushi tsu nanlo ba.

ka̱ta̱ i bana i yaꞋan kucikpa a Giliga ba,

ko tana i gaɗukpa a kubana Betu-avin ba,

ka̱ta̱ i yaꞋan a kucina n kula ku Vuzavaguɗu a̱ ubuta̱ wa ba.

16 Aza a Isaraila i ta̱ n ugbamukaci,

tsu makparagi,

Nini ɗai Vuzavaguɗu u kuguɓa le,

tsu mokyon ma na i a kuguɓa a̱ ubuta̱ wi ijanu?

17 Ka̱sukpa̱i aza a Isaraila endeꞋen n le,

adama a na i o kutono ta̱ a̱ma̱li.

18 Makyan ma na baci o kotsoi isoꞋoshi i le,

ka̱ ta̱ a lyaꞋa kelime n cishakanlai ci le,

a tsu laꞋa ta̱ n kuciga ili i wono,

a na a̱ kuciya̱ tsugbayin.

19 Kabatalikpau ki ta̱ a̱ kupura̱ngu le gbende,

ka̱ ta̱ kuneꞋen ku le ko okpo le ili i wono.