1 Ani Baawloos, Yasuuꞌaab Umasiihi linguuma akatiib, Ukwaasana Wꞌishidhhiinoon sootiiwwa, Yasuuꞌaab Umasiih hineeb isꞌaya akatiib linguumaawwa, oon ujawaab barook beeti akantiib.

2 Tiimooti wꞌiimaaniib sidki oor aniib ikatiib beeti: Tinꞌimaawwa, tirhamaawwa, umꞌasigwa Ukwaasana Ubaabaaywa Umasiih Yasuuꞌaab Wꞌankwanaayiisoonwa ikatiin miriya.

3 Ani suur Magadoonyaab abayihoob barook sooyaneet tunaatiit, aflaay Afasooseeb hagita. Shaawti daab gwadib gwisri madehaba door han biiꞌallamayneet toona sooyaa! 4 Baraah shaawti wharaay mitaal baaꞌangaadt hoobeet sifaarariyooytwa isingiidneet toona sooyaa! Tuun tuuna aree Ukwaasanaay shaga wꞌiimaanii ikatiib ishti dꞌiit amgwasuuraab tikwasi. 5 Toon tuwaseeti hadaf ooreer ikati. Uureer nhas ginꞌiiwwa, nhast niyaatiiwwa, daayi iimaaniiwwa ikati. 6 Gwadi teen bateeh hooy isgiini hawriikiyaaniit, nafꞌaat baabari bhaliyeeb daayaan. 7 Baraah whaggi kooja ikatiineet yhariwna. Laakiin baraah naan hadiideeneeb kiikanna tari naan akra ginꞌii sooyeeneeb kiikanna.

8 Gaal whag tikwikwti haay shagaamiiniyeek, daayiib ikatiyeet toona nikteen. 9 Whag tushbooti dehayii dehaay daamaab biikaayeet toona han nikteen. Laakiin whag katꞌeenwa, iroobanaawwa, ikeefriiwwa, tumaagti kinaawwa, idhibaabwa, oodiin baabariibwa, baliib baabeehna tari deeteehna eedriinwa, imadooraawwa, 10 ijakiinaawwa, ifaasdaawwa, ikishiyaayi bꞌiishraayanaawwa, igwisreewwa igwisreet badehaateewwa, tari baliib umadehab udaayiib imooriibwa, een bareeyooh dehaay whag daamaabi. 11 Beet tuuna Usakana Udaayiib Ukwaasana umugaddas ubaarkamaanaay ikatiinaay titmari. Baruuh aree aneeb dehaay ammaniyaheeb.

12 Ani Umasiihi Yasuuꞌaab Wꞌankwanaayoon ahammiid: baruuh yꞌakrir yhiiheeb, aamananaab ikwaaseheeb, bariiyooh shagaamtiib idꞌiheeb. 13 Ani door gaal suur keefriibu, barooh amaag aweeraayt neewaneek han, gamaamtiiwwa wꞌaamanti naawiiwwa dꞌiyaabuuyt afooman. 14 Wꞌankwanaayiitaan tinꞌima winneet gwidaat anii kehii ifafna. Wꞌiimaanwa ooreerwa Umasiih Yasuuꞌiib ikatiin geeb anii kehii ifafna.

15 Tooy aree sidki miyaad daayiib gabbalamtiib astehaliiniib eefi; Umasiih Yasuuꞌa tumaagti dehay ishidhhiini jillaay toon tuduniyaatiib yꞌaabi. Aree ani bareesoohka amaagkaab akati. 16 Laakiin beet tunaati sabbii ani rhamaat attiyeewaay. Aflaay ani tumaagti kina wꞌamaagkaab akatiinaay tarmuumaab irhisti jillaay Umasiih Yasuuꞌa aneeb misaal ikwaaseheeb. Baliib malya barooh aamaneen iiktiinwa, umidhhan udaayim imeer ikatiinwa, bareeyooh dehaay misaal ikwaaseheeb. 17 Oontꞌa Whadꞌa udaayim, ubashar baakaay, ubaalawayii dehaay, Ukwaasana oongaal whamooyseewwa umatuunwa diimaab bariiyooh baꞌiikti. Aamiin.

18 Tiimooti wꞌooru, een ibhali bariiyook siruudiib door gaal attiyoodiyaab aniiw hook. Aflaay een bareeh haay shagaama, daayi fina finaayi tindiya. 19 Wꞌiimaanook kaleewa, daayiit niya dꞌiya. Gwadi een bareeh iribniit, wꞌiimaanoohna idirna. 20 Bareeyooh geeb Hiimiinaayooswa Iskandarwa eefeena, ani bareeh oobliis nuunan. Aflaay baraah biikafiirni jillaay allamami iyadna.