1 Eegrim tak amaag baadaaniina, laakiin barooh baabiitook diiseet anfaraada. Aree yꞌareereewa isanaayeetook amshabaaba. 2 Teemꞌa tꞌeegrima tifarooteet amshabaaba, tꞌaagira daayiit nhisuuytii amshabaaba.

3 Tꞌibraatfaatki sidik shanhatiyaat ibariint daayiib amshabaaba. 4 Laakiin tꞌibraatfaatki ar tari ari ar tibariyeek, hankaab udiinoohna rhiseeneet toonaati. Indhiwaayeehna dehaay ishboobiineet toonaati. Aflaay bak aree ifarooyeehwa yhoobeehwa hag ikweesna. Tuun tuuna Ukwaasana afirhistini. 5 Tꞌibraatfaatki sidik shanhatiyaat tibariit oodꞌooh atooꞌishaat isꞌaya Ukwaasanaay daastini, whawaadwa oombꞌeewwa siileeltini, aree Ukwaasana shamaamt raattini. 6 Laakiin tꞌibraatfaatki nafirnayteeb kwarriit masi dhhaniit tikatiyeek han ayaati. 7 Oodehay een ibhali sooyaa. Aflaay gaal han yaay itmuuyi kiidi. 8 Gaal han yꞌaydeeh biishaameek, tari aree indhiwaayeeh idawil biishaameek, baruuh wꞌiimaan tawaayu, aree ukeefriika amaagkaab ikati.

9 Tꞌibraatfaatki asagwir tamuun hasamaat bitkaayeek, tꞌibraatfaatkiyaati geeb kitehasab. Batuuh gaal tak oobhaat dꞌaart tikati. 10 Batuuh idaayi shagaay atookaknaat tikati, bak aree yꞌareeh daayiib sehamaat tikati. Hadareet tikati, Ukwaasanaay oodehayi iragada shangwiidh, igwirhaayeeb eefeen teeshtiim, aree ugarooyooh kassooh idaayi shagaay dehaay soomraat tikati.

11 Tꞌibraatfaatkiya tidadis baliit tꞌibraatfaakiyaati geeb baadhigwiya. Bataah dꞌareeb eet idꞌanihoob, Umasiihii fidinti giigeen. 12 Aflaay bataah bariiyooh geeb idꞌiineeb uwaadiya kitꞌatiit gwababeet kina ikatiin. 13 Bataah masi oogaw ugawii dehaay hawrariikee idamaneehna kwidhseen. Laakiin bataah masi amagkaat ikatiina, yaandiintwa hararfiridwa allamameena, hasir hooy biibariini bhali bhaliiyeen. 14 Aflaay tꞌibraatfaatki tidadis eedꞌariineet toona asehariiw. Firaay idꞌaneet toonaatu, igawaayeehna itakwikwneet toonaati. Aflaay bataah yꞌashooyeen biineewsayna hoon. 15 Ibraatfaatkiit gwadit suur akay ifdinni giigiyaaniit oobliis iramna.

16 Takat masiihiit udehayyooh ibraatfaatkiit tibariyeek, batuuh bateeh teeshtiimeet toonaati. Bateeh tukaniisaati kehii rabeeb bitkwaas. Aflaay tukaniisi baliit tꞌibraatfaatki sidik shanhatiyaat ibariint teeshtiim.

17 Isuurkina tukaniisi daayiib suurkinaameen, malu doora hamooysamtiniit takwi ibariin. Baliin aakna ishagaayuuhna bhaliitiibwa allamtiibwa ikatiyeeba. 18 Uuktaab "Uuyu wharru eetiiniyihoob eefiir baahakwiira." indi. Uuktaab masi "Ushagaamana ukiraayooh marriyeet toonaati." indi. 19 Wꞌeegrimi kehii tehimaat ikwasiinihoob, maloob tari mhay badehi biibadehaneek baasinaakira. 20 Baliin tumaagnaay ikwasiin, oodehayi suurii imeedniinna. Aflaay uudehay aaraw ireekwna.

21 Ukwaasanaay suuriiwwa, Umasiih Yasuuꞌi suuriiwwa, imalak itageegaayi suuriiwwa, teen tiwasi girad anu tisnaakiireet toona ani sooyani hook. Ishaga tidꞌanihoob aree oodehayi arrareestiib baashagaamaana!

22 Yꞌayeek oodehayi kehii biruurii dehaay baaꞌashshiga, aree weer dehayiit maagtiib baashuuma. Ugarooyook kaleewaat sinhasaa.

23 Yam eebhat baagwꞌaa. Oofꞌiyook sabbiiwwa, diimaab tulhanaaytiyook sabbiiwwa shalik ha gwꞌaa. 24 Dehay gaalnaay idanib lawaaba, tumaagtuuhna baraah hooy haakameeneeb oomhiin suurii kantiim. Oodehay irawi danib aree bareeyooh harꞌii sakeen. 25 Oontꞌaaneet, idaayi shaga lawiini, ubaalaway han itkwabbiisee dehaay kaꞌadgiriya.