1 Baliin kishiyaab ikatiin kassaah yꞌankwanaayeeh daayi hamooysitiib astehaleeneet toona ibakii ikteenna. Aflaay Ukwaasanaay uusimwa hineeb wꞌallamtiiwwa gaal han amaag iyaad kiidi. 2 Baliin aamaneen ankwana ibariin bareeh biitaliisneet toonaatu, baraah sanaab ikatiin. Baraah beenaayka daayika shagaamti bareeh shagaameeneet toonaati. Bareeyooh ishagaay anfꞌameena aree aamananaab ikatiini sabbiiwwa, bareeyooh dehaay daayiib ikatiini sabbiiwwa, daayiib shagaameeneet toonaati. Beet toona allamaat oodehay sꞌakira. 3 Gaal han gwisri madehaba allamiiniyeek, Wꞌankwanaayoon Yasuuꞌaab Umasiihiib ibhali idaayiib biiꞌagbilayeek, udiiniyoon wꞌallamti biiꞌagbilayeek, 4 baruuh kibiri taku naat aree kiikan. Baruuh wꞌamgwasuuraaywa tꞌamhassiyooytiibwa dꞌam miraab ikati. Aan ibhali hasaadaatwa, amgarmooytwa, neewwa, amaagt tehimaatwa ikwasiin. 5 Aan ibhali eenda yꞌafraya ishalik fhamaatiib oosdik baabariin baliin oodiin miraayi salal hiiseena, een bareeyooh bitik diimaab maag ikwasiin.

6 Laakiin toona baraah ibariineet haay ganaamaab ikatiineek, uudiin oodehay gabsiini. 7 Hinin tuduniyaatii dehaay naat han haay yꞌaab kinki, naat han hooy niyayee dehaay kaꞌadgirna. 8 Laakiin mꞌariitwa halakaabwa nibariyeek, aflaay beet tuuna mhaatoon tikati. 9 Uudehay igabti yhariw jarrabamtiib daayeena, aree sharakiib dhibeena, aree gwidaat amaagnaaytiib daayeena, aree yꞌamag salala oodehay kwidhseena aree katꞌeen. 10 Imhallagaayi reer kastooh tumaagti jinsaayi gadam ikati. Dehay gwadi winneet imhallaga yhariwna, wꞌiimaanii fidinti hawrariikeena, gwida gadabee iginꞌaayeehna isehadaaliin.

11 Laakiin baruuk Ukwaasanaay tak, een bareeh kasseeh hooy fooraat shiboot dꞌiyaa. Ukwaasanaay usalalwa, wꞌiimaanwa, ooreerwa, wꞌamtaruumaawwa, itarmuumaawwa dꞌiyaa. 12 Wꞌiimaani fina daayiib finaaya, umidhhan udaayim kaleewa. Baruuk gwida badehi suurii daayiib tifidhadha akay oon umidhhanii dehaay waliikamta. 13 Ukwaasana naatka umidhhan iniiwnaay suurii, Umasiih Yasuuꞌi suurii, baruuh Boontiyus Biilaatoosi suurii wꞌiimaanooh daayiib ifidhadh. Ani sooyani hook: 14 Wꞌankwanaayuun Yasuuꞌa Umasiih lawiiniyeeb oombꞌi ookiik teen tiwasi sinaakira, daayiib abikaa. 15 Baruuh ooknaay udamaaniib haay yꞌi indi. Baruuh baarakamaabu, whaakim oongaal yhadꞌaayi Hadꞌa ikati, yꞌankwanaayi Ankwana ikati. 16 Baruuh oodꞌooh bashar baabariibu, aree dehay biikatiimi nuuriib kwarri. Barooh gaal han rhaab kiiki tari irhiti adgiraab kiiki. Whamooyseewwa umatuunwa diimaab bariiyeeh ikatiin. Aamiin.

17 Toon tuduniyaatiib igabaab ikatiin baliin kibir biidꞌiineet toona sooyaa! Isꞌaya han umraayiib biidꞌiineet toonaatu, uumraay atookaknaab kiiki. Laakiin isꞌayaayoohna Ukwaasanaay idꞌaneet toonaati. Baruuh oomraay iniiw hoon, hinin afirhistiniit toona kastooh iniiw hoon. 18 Bareeh daayiinaayt idꞌaneet toona sooyaa! Baraah udaayi shagaay gabaab ikatiin. Miyaawanaab akeetiit, toona tꞌibariineet yꞌadhidhneet toona sooyaa. 19 Bak aree igarooyeehna dehaay miraay rayiimeena, harꞌook yꞌiiniib udamaanii dehaay aree akra miraay dehaay ikati. Aflaay baraah usidki midhhan daayiib kaleeween.

20 Tiimooti, baruuk dehaay ammanamaab tikatiyeet teena gwꞌadaa. Ukwaasanaay usalal baakaay hooy taraa, dehay gwadi gamaamtii, "Kanaant" iyadneeb wꞌamaag amgwasuura hooy taraa. 21 Gwadi isridniit, bak sakee wꞌiimaanii isgiini sakiyaan. Tinꞌima geebook baꞌiiktiin.