1 Uun baruuh sidki miyaadu: uutak tukaniisaati suurkina ikatiyeet toona harriiweek, daayi shaga niyaamaab ikati. 2 Tukaniisaati suurkina ibakii gwihaab baabariib ikati. Ibakii aree gaat takat toobhaat doobiini. Baruuh fadhaadh tak, ugarooyooh kaleewaab, hamooysamaab, hadareeb, allamiiniib, ibakii ikati. 3 Baruuh ibakii biiꞌaskirayeet toonaatu, ribshaayt anu diga tak baahasaay ikatiyeet toonaatu, imhallaga areeyiiniib biikaayeet toonaati. 4 Baruuh indhiwaayeeh eekna ibakii daayiib yꞌanbiikeet toonaati. Yꞌaraah aree barooh daayiib hamooysiit isnaakiirneet toonaati. 5 Uutak indhiwaayeeh eekna daayiib abkaab baakaay, Ukwaasanaayt tukaniisi kak daayiib anbiik? 6 Baruuh wꞌiimaaniib ibakii inwiineet toonaatu, aflaay baruuh oobliisiit kibir biidꞌiyeet toonaati. 7 Baruuh oodehay uraawi geeb ibakii daayiib faalamiiniyeet toonaati. Aflaay baruuh wꞌeebwa oobliisi sharakiibwa tikwi kiidi.

8 Tukaniisaati shamaamiiga han ibakii daayi adabwa nhasuuytwa idꞌaneet toonaati. Baraah ibakii gwida ha biigwꞌayneet toonaatu tari talasaay biirayiimayneet toonaati. 9 Baraah ibakii takwaakw sidki iimaan nhas niyaatii yꞌabikneet toonaati. 10 Baraah hankaab ibakii jarrabameena. Malya bareeyooh kehii naat han bitehaayeek, tukaniisaati shagaamana baꞌiiktiin. 11 Oontꞌaaneet, timꞌataahna han daayi adab idꞌaneet toonaati. Bataah ibakii tuyaandiin eettiirneet toonaati. Bataah ibakii takwakwtwa nhas niyaatiitwa ikatiineet toonaati.

12 Tukaniisaati shamaamiiga ibakii gaat takat toobhaat doobiiniyeet toonaati. Yꞌareehwa indhiwaayeehwa ibakii daayiib yꞌanbiikeet toonaati. 13 Ishamaamiiga ishanhoohna daayiib shagaameen baliin daayi mhiin rayiimeena, wꞌiimaanoohna Umasiih Yasuuꞌiib aree eetehak anu isoorariimna.

14 Ani willa yꞌeetiit hook rheesamtiyook aharriiw, aree oon ujawaab barook beeti akantiib. 15 Ani adleeliyeek, Ukwaasanaay dhiwaayi geeb uudehay igarooyeehna kak sakseeneeb baruuk iikan tindiya. Ukwaasanaay indhiwa ikatiin, Ukwaasana udhhaniinaayt tukaniiseewwa, wꞌaamuudwa, usidki asaaswa ikatiin. 16 Udiiniyoon kwabaast tuuna, kak wint tikatiyeet toona gaal han kiitiwi:

Baruuh wꞌaadamiit hayꞌaatiit lawiya,

Aashuuk barooh nhast hayꞌa ikwaasna,

imalak barooh rhiyaana,

kasseeh yhasheeb bhaliimiya.

Tuduniyaatiib aamanamiya,

aree umatuuniib yakamiya.