विलापगीत 4

सिय्योन की दुर्गति

1 सोन्‍ना किस तरियां खोट्टा होग्या, सबतै ज्यादा खरा सोन्‍ना किस तरियां बदल ग्या सै?*4:1 सोन्‍ना किस तरियां खोट्टा होग्या, सबतै ज्यादा खरा सोन्‍ना किस तरियां बदल ग्या सै? सोन्‍ने का अपमान

पवित्रस्‍थान के पत्थर तो हर एक सड़क के सिरे पै फेंक दिए गए सै।

2 सिय्योन के खास बेट्टे जो कुन्दन के बराबर थे,

वे कुम्हार के बणाए होए माट्टी के घड़यां की ढाळ किस तरियां तुच्छ गिणे गए सै!

3 गादड़ी भी अपणे बच्यां नै थणां तै लगाकै पिलावै सै,

पर मेरे माणसां की बेट्टी जंगळ के शुतुर्मुर्गों कै बराबर निर्दयी होगी सै।

4 दूध पीण आळे बाळकां की जीभ प्यास के मारे ताळु म्ह चिपक गई सै;

बाल-बच्‍चे रोट्टी माँगैं सै, पर कोए उन ताहीं न्ही देन्दा।

5 जो स्वादिष्ट खाणा खावैं थे, वे इब सड़कां म्ह बेचैन फिरैं सै;

जो मखमल के कपड़यां म्ह पळे थे इब गळियाँ म्ह लेटदे फिरै सै।

6 मेरे माणसां की बेट्टी का अधर्म सदोम के पाप तै भी घणा होग्या

जो किसे के हाथ डाले बिना भी पलभर म्ह उल्ट ग्या था।*4:6 उत्प. 19:24-25

7 उसके कुलीन*4:7 कुलीन यरुशलेम के प्रधानां हिम तै निर्मल अर दूध तै भी घणा तेज थे;

उनकी देह मुग्याँ तै घणा लाल, अर उनकी खूबसूरती नीलमणि की जिसी थी।

8 पर इब उनका रूप अन्धकार तै भी घणा काळा सै, वे सड़कां म्ह पिच्छाणे न्ही जान्दे;

उनका चमड़ा हाड्डियाँ म्ह चिप ग्या, अर लाकड़ी की तरियां सूख ग्या सै।

9 तलवार के मारे होए भूख के मारे होयां तै घणे आच्छे थे

जिसका प्राण खेत की उपज बिना भूख के मारे सुखदा जावै सै।

10 दयालु जनान्‍नी नै भी अपणे ए हाथ्थां तै अपणे बाळकां ताहीं पकाया सै;

मेरे माणसां के विनाश के बखत वेए उनका खाणा बणगे।

11 यहोवा नै अपणी पूरी जळजळाहट जाहिर करी,

उसनै अपणा छो भोत घणाए भड़काया;

अर सिय्योन म्ह इसी आग लगाई जिसतै

उसकी नींव तक भस्म होगी सै।

12 धरती का कोए राजा या जगत का कोए रहण आळा

इसका कदे बिश्वास न्ही कर सकै था,

के बिद्रोही अर दुश्मन यरुशलेम के फाटकां कै भित्तर बड़ण पावैगें।

13 यो उसके नबियाँ के पापां अर उसके याजकां के अधर्म के काम्मां कै कारण होया सै;

क्यूँके वे उसके बीच धर्मियाँ का खून करदे आए सै।

14 वे इब सड़कां म्ह आन्धे सरीखे मारे-मारे फिरैं सै,

अर मान्‍नो लहू की छीट्याँ तै याड़ै तक अशुद्ध सै

के कोए उनकै कपड़यां नै न्ही छू सकदा।

15 लोग उननै रुक्‍का मारकै कहवैं सै, "अरै अशुद्ध माणसों, हट जाओ! हट जाओ! म्हारे ताहीं ना छूओ"

जिब वे भाग कै मारे-मारे फिरण लाग्गे,

फेर गैरजात्तां के माणसां नै कह्या, "भविष्य म्ह वे उरै टिकण न्ही पावैगें"

16 यहोवा नै अपणे छो तै उन ताहीं तित्तर-बितर करया, वो फेर उनपै दया की नजर न्ही करैगा;

ना तो याजकां का सम्मान होया, अर ना पुरनियां पै किमे अनुग्रह करया गया।

17 म्हारी आँख बेकार ए मदद की बाट देखदे-देखदे धुँधळी पड़गी सै,

हम लगातार एक इसी जात की ओड़ देखदे रहे जो बचा न्ही सकी।

18 लोग म्हारै पाच्छै इसे पड़े के हम अपणे नगर के चौकां म्ह भी न्ही चाल सके;

म्हारा खात्मा धोरै आया; म्हारी उम्र पूरी होई; क्यूँके म्हारा अन्त आ ग्या था।

19 म्हारे भगाण आळे अकास की चील तै भी घणी तेज गति तै चाल्‍लै थे;

वे पहाड़ां पै म्हारे पाच्छै पड़गे अर जंगल म्ह म्हारे खात्तर घात लगाकै बैठगे।

20 यहोवा का अभिषिक्त जो म्हारा प्राण था,

अर जिसके बारै म्ह हमनै सोच्या था के गैरजात्तां कै बिचाळै हम उसकी शरण म्ह जिन्दा रहवैंगे,

वो उनके खोद्दे होए खड्या म्ह पकड्या गया।

21 हे एदोम की छोरी, तू जो ऊज देश म्ह रहवै सै, हर्षित अर आनन्दित रह;

पर यो कटोरा तेरे ताहीं भी पोहचैगा, अर तू मतवाळी होकै अपणे आप नै नंगा करैगी।

22 हे सिय्योन की छोरी, तेरे अधर्म की सजा खतम होई, वो फेर तन्‍नै गुलाम्मी म्ह ना ले जावैगा;

पर हे एदोम की छोरी, तेरे अधर्म की सजा वो तन्‍नै देवैगा, वो तेरे पापां नै जाहिर कर देगा।