8 फेर नाओमी नै अपणी दोन्‍नु बहुआं तै कह्या, "थम अपणे-अपणे पीहर वापस चली जाओ। अर जिस तरियां थमनै जो मरगे सैं अर मेरे तै भी प्यार करया सै, उस्से तरियां ए यहोवा थारे पै भी दया करै। 9 यहोवा इसा करै के थम फेर तै अपणे-अपणे घरआळे कै घर म्ह आराम पाओ।" फेर नाओमी नै उन ताहीं चुम्या, अर वे रुक्‍के मार-मारकै रोण लाग्गी*, 10 अर उसतै कह्या, "जरुर हम तेरे गैल तेरे माणसां कै धोरै चाल्‍लांगी।" 11 पर नाओमी नै कह्या, "हे मेरी बेटियों, बोहड़ जाओ, थम क्यूँ मेरे गैल जाओगी? के मेरी कोख म्ह और बेट्टे सैं जो थारे घरआळे हों? 12 हे मेरी बेटियों, बोहड़ जाओ, क्यूँके मै घरआळा करण कै खात्तर बूढ़ी हो ली सूं। अर जै मै कहूँ भी, के मन्‍नै आस सै, अर आज की रात मेरा घरआळा भी होन्दा, अर मेरे बेट्टे भी होन्दे, 13 तोभी के थम उनके श्याणे होण तक आस लगाऐ ठैहरी रहोगी? अर उनकै खात्तर घरआळी बणण खात्तर रुकी रहोगी? हे मेरी बेटियों, इसा ना हो, क्यूँके मेरा दुख थारे दुख तै घणा बढ़कै सै; देक्खो, यहोवा का हाथ मेरे खिलाफ उठ्या सै।" 14 फेर वे रुक्‍के मार-मारकै रोण लाग्गी; अर ओर्पा नै तो अपणी सास ताहीं चुम्या अर अपणे घरां चली गई, पर रूत उसतै अलग ना होई।