1 शमूएल 11

शाऊल द्वारा याबेश गिलाद की रक्षा

1 फेर अम्‍मोनी नाहाश राजा नै चढ़ाई करकै गिलाद क्षेत्र के याबेश के बिरुध्द छावणी डाली; अर याबेश नगर के सारे माणसां नै नाहाश तै कह्या, "म्हारे तै करार बाँध, अर हम तेरी अधीनता मान लेवांगे।" 2 अम्‍मोनी नाहाश नै उनतै कह्या, "मै थारे तै करार इस शर्त पै बाँधूँगा, के मै थम सारया की सोळी आँख फोड़कै इसनै सारे इस्राएल की बदनाम्मी का कारण कर देऊँ।" 3 याबेश के बुजुर्ग माणसां नै उसतै कह्या, "हमनै सात दिन का मौक्‍का दे जिब ताहीं हम इस्राएल के सारे देश म्ह दूत भेज्जैंगे। अर जै हमनै कोए बचाण आळा न्ही मिलैगा, तो हम तेरे ए धोरै आवागें।" 4 दूत्तां नै शाऊल के रहण आळे गिबा शहर म्ह आकै माणसां ताहीं या खबर सुणाई, अर सारे माणस चिल्‍ला-चिल्‍लाकै रोण लाग्गे।

5 शाऊल बळधां के गैल-गैल मैदान तै चल्या आवै था; अर शाऊल नै पूच्छया, "माणसां कै, के होया के वे रोवै सैं?" उननै याबेश के माणसां का सन्देस उसनै सुणाया। 6 या खबर सुणदे ए शाऊल पै परमेसवर का आत्मा बल तै उतरया, अर उसका कोप घणा भड़क उठ्या। 7 अर उसनै एक जोड़ी बळध लेकै उसके टुकड़े-टुकड़े काटे, अर यो कहकै दूत्तां के हाथ तै इस्राएल के सारे देश म्ह कुह्वा भेज्जा, "जो कोए आकै शाऊल अर शमूएल कै पाच्छै ना हो लेवैगा उसके बळधां तै इसाए करया जावैगा।" फेर यहोवा का भय माणसां म्ह इसा समाया के वे एक मन होकै लिकड़ आए। 8 फेर उसनै उननै बेजेक नगर म्ह गिण लिया, अर इस्राएलियाँ के तीन लाख, अर यहूदियाँ के तीस हजार ठहरे। 9 अर उननै उन दूत्तां तै जो आए थे कह्या, "थम गिलाद म्ह के याबेश के माणसां तै या कहो, कल धूप तेज होण की घड़ी ताहीं थम छुटकारा*11:9 छुटकारा जीत पाओगे।" फेर दूत्तां नै जाकै याबेश के माणसां ताहीं सन्देस दिया, अर वे आनन्दित होए। 10 फेर याबेश के माणसां नै नाहाश तै कह्या, "कल हम तेरे स्याम्ही समर्पण करागें, अर जो किमे थमनै आच्छा लाग्गै वोए म्हारे तै करियो।" 11 दुसरे दिन शाऊल नै सेना के तीन दल करे; अर उननै रात के आखरी पहर म्ह छावणी के बीच म्ह आकै अम्मोनियाँ ताहीं मारया; अर धूप के कड़े होण के बखत ताहीं इसे मारदे रहे के जो बच लिकड़े वे औड़ै ताहीं तित्तर-बितर होए के दो जन भी एक गैल किते ना रह्ये।

12 फेर याबेश नगर के माणस शमूएल तै कहण लाग्गे, "जिन माणसां नै कह्या था, ‘के शाऊल म्हारे पै राज्य करैगा?’ उननै ल्याओ के हम उन ताहीं मार देवां।" 13 पर शाऊल नै कह्या, "आज कै दिन कोए मारया न्ही जावैगा; क्यूँके आज यहोवा नै इस्राएलियाँ ताहीं छुटकारा दिया सै।"

14 फेर शमूएल नै इस्राएलियाँ तै कह्या, "आओ, हम गिलगाल कस्बे म्ह चाल्‍लां, अर ओड़ै राज्य नये सिरे तै स्थापित करां।" 15 फेर सारे माणस गिलगाल चाल्‍ले, अर ओड़ै उननै गिलगाल म्ह यहोवा के स्याम्ही शाऊल ताहीं राजा बणाया; अर औड़ै ए उननै यहोवा ताहीं मेलबलि*11:15 मेलबलि लैव्य. 7:11-38 (मेलबलि के बारे म्ह लिख्या होया) चढ़ाए; अर औड़ै ए शाऊल अर सारे इस्राएली माणसां नै भोत बड़ा आनन्द मनाया।