1 शमूएल 27

दाऊद का पलिश्तियाँ तै जुड़णा

1 फेर दाऊद सोच्‍चण लाग्या, "इब मै किसे ना किसे दिन शाऊल के हाथ तै नाश हो जाऊँगा; इब मेरे खात्तर ठीक यो सै के मै पलिश्तियाँ के देश म्ह भाग जाऊँ; फेर शाऊल मेरे बारै म्ह निराश होवैगा, अर मन्‍नै इस्राएल के देश के किसे भाग म्ह फेर ना ढूँढैगा, फेर मै उसके हाथ तै बच लिकडूँगा।" 2 फेर दाऊद अपणे छः सौ संगी माणसां ताहीं लेकै चल्या गया, अर गत के राजा माओक के बेट्टे आकीश*27:2 आकीश पलिश्ती क्षेत्र म्ह गत नगर के धोरै गया। 3 अर दाऊद अर उसके जन अपणे-अपणे परिवार समेत गत म्ह आकीश के धोरै रहण लाग्गे। दाऊद तो अपणी दो जनानियाँ के गैल, यानिके यिज्रेली अहीनोअम, अर नाबाल की जनान्‍नी कर्मेली अबीगैल के गैल रह्या। 4 जिब शाऊल नै यो समाचार मिल्या के दाऊद गत म्ह भाग ग्या सै, फेर उसनै उस ताहीं फेर कदे न्ही ढूँढ्या।

5 दाऊद नै आकीश तै कह्या, "जै मेरे पै तेरे अनुग्रह की नजर हो, तो देश की किसे बस्ती म्ह मन्‍नै जगहां दिला दे जित्त मै रहूँ; तेरा दास तेरे गैल राजधानी म्ह क्यूँ रहे?" 6 फेर आकीश नै उस ताहीं उसे दिन सिकलग कस्बा दिया; इस कारण तै सिकलग आज कै दिन ताहीं यहूदा के राजयां का बणा सै।

7 पलिश्तियाँ के देश म्ह रहन्दे-रहन्दे दाऊद नै एक साल च्यार महिन्‍ने बीतगे। 8 अर दाऊद नै अपणे माणसां समेत जाकै गशूरियाँ*27:8 गशूरियाँ एक खनाबदोश गोत्र जो पलिश्तियाँ कै धोरै रहया करदा (व्यव. 3:14; यहो. 13:2)।, गिर्जियां, अर अमालेकियाँ पै चढ़ाई करी; ये जातियाँ तो प्राचीनकाल तै उस देश म्ह रहवै थी जो शूर के रास्ते म्ह मिस्र देश ताहीं सै। 9 दाऊद नै उस देश ताहीं नाश करया, अर जनान्‍नी माणस किसे ताहीं जिन्दा न्ही छोड्या, अर भेड़-बकरी, गां-बळध, गधे, ऊँट, अर कपड़े लेकै बोहड़या, अर आकीश के धोरै गया। 10 आकीश नै पूच्छया, "आज थमनै चढ़ाई तो न्ही करी?" दाऊद नै कह्या, "हाँ, यहूदा यरहमेलियाँ*27:10 यरहमेलियाँ हेस्रोन माणसां का झुण्ड हेस्रोन अर केनियाँ*27:10 केनियाँ नेगेब यहूदा के राज्य के दक्षिणी, सूखे क्षेत्र को संदर्भित करै सै। (2 शमू. 24:07) की दक्षिण दिशा म्ह" 11 दाऊद नै जनान्‍नी माणस किसे ताहीं जिन्दा ना छोड्या के उननै गत म्ह पोहचाये; उसनै सोच्या था, "इसा ना हो के वे म्हारा काम बताकै यो कहवै, के दाऊद नै इसा-इसा करया सै। बलके जिब तै वो पलिश्तियाँ के देश म्ह रहवै सै, तब तै उसका काम इसाए सै।" 12 फेर आकीश नै दाऊद की बात सच मानकै कह्या, "यो अपणे इस्राएली माणसां की नजरां म्ह घणा बुरा होया सै; ज्यांतै यो सदा खात्तर मेरा दास बण्या रहवैगा।"