1 शमूएल 19

शाऊल का दाऊद पै आक्रमण

1 शाऊल नै अपणे बेट्टे योनातान अर अपणे सारे कर्मचारियाँ तै दाऊद ताहीं मार गेरण की चर्चा करी। पर शाऊल का बेट्टा योनातान दाऊद तै घणा खुश था। 2 योनातान नै दाऊद ताहीं बताया, "मेरा पिता तन्‍नै मरवा देणा चावै सै; ज्यांतै तू सुबेरै सावधान रहिये, अर किसे गुप्त जगहां म्ह बैठ्या होया छुप्या रहिये; 3 अर मै मैदान म्ह जित्त तू होवैगा ओड़ै जाकै अपणे पिता के धोरै खड्या होकै उसतै तेरी चर्चा करुँगा; अर जै मन्‍नै किमे बेरा हो तो तन्‍नै बताऊँगा।" 4 योनातान नै अपणे पिता शाऊल तै दाऊद की प्रशंसा करकै उसतै कह्या, "हे राजा, अपणे दास दाऊद का अपराधी ना हो; क्यूँके उसनै तेरे खिलाफ कोए अपराध न्ही करया, बलके उसके सारे काम तेरे हित के सैं; 5 उसनै अपणे प्राण पै खेलकै उस पलिश्ती ताहीं मार गेरया, अर यहोवा नै सारे इस्राएलियाँ की बड़ी जय कराई। इसनै देखकै तू आनन्दित होया था; अर तू दाऊद ताहीं अकारण मारकै निर्दोष के खून का पापी क्यूँ बणै?" 6 फेर शाऊल नै योनातान की बात मानकै या शपथ खाई, "यहोवा के जीवन की कसम, दाऊद मारया न्ही जावैगा।" 7 फेर योनातान नै दाऊद ताहीं बुलाकै ये सारी बात उसतै बताई। फेर योनातान दाऊद नै शाऊल कै धोरै लेग्या, अर वो पैहले की तरियां उसके स्याम्ही रहण लाग्या।

8 फेर लड़ाई होण लाग्गी; अर दाऊद जाकै पलिश्तियाँ तै लड़या, अर उन ताहीं बड़ी मार तै मारा, अर वे उसके स्याम्ही तै भाजगे। 9 जिब शाऊल हाथ म्ह भाला लिए होए घर म्ह बैठ्या था; अर दाऊद हाथ तै वीणा बजाण लागरया था, फेर यहोवा की और तै एक दुष्ट आत्मा शाऊल पै चढ़या। 10 शाऊल नै चाह्या, के दाऊद ताहीं इसा मारै के भाला उसनै चीरदे होए दीवार म्ह धस जावै; पर दाऊद शाऊल के स्याम्ही तै इसा हट ग्या के भाला जाकै दीवार ए म्ह धस ग्या। अर दाऊद भाज ग्या, अर उस रात बच ग्या।

11 फेर शाऊल नै दाऊद के घर पै दूत ज्यांतै भेज्जे के वे उसकी घात म्ह रहवैं, अर सुबेरै उसनै मार देवै, तब दाऊद की जनान्‍नी मीकल नै उस ताहीं यो कहकै जताया, "जै तू इस रात अपणा प्राण ना बचावै, तो सुबेरै मारया जावैगा।" 12 फेर मीकल नै दाऊद ताहीं खिड़की तै उतार दिया; अर वो भाजकै बच लिकड्या। 13 फेर मीकल नै गृहदेवत्यां ताहीं खाट पै लिटाया, अर बकरियाँ के रोए के तकिया उसके सिरहाणै पै रखकै उन ताहीं कपड़ा ओढ़ा दिया। 14 जिब शाऊल नै दाऊद ताहीं पकड़ ल्याण कै खात्तर दूत भेज्जे, फेर वा बोल्‍ली, "वो तो बीमार सै।" 15 फेर शाऊल नै दूत्तां ताहीं दाऊद के देखण कै खात्तर भेज्या, अर कह्या, "उसनै खाट समेत मेरे धोरै ल्याओ के मै उसनै मार देऊँ।" 16 जिब दूत भित्तर गए, फेर के देक्खै सैं के खाट पै गृहदेवता पड़े सैं, अर सिरहाणै पै बकरियाँ के रोए के तकिया सै। 17 आखर शाऊल नै मीकल तै कह्या, "तन्‍नै मेरे ताहीं इसा धोक्खा क्यूँ दिया? तन्‍नै मेरे दुश्मन ताहीं इस तरियां क्यूँ जाण दिया के वो बच लिकड्या सै?" मीकल नै शाऊल तै कह्या, "उसनै मेरे तै कह्या, ‘मन्‍नै जाण दे’; मै तन्‍नै क्यूँ मार डालूँ।"

18 दाऊद भाजकै बच लिकड्या, अर रामाह म्ह शमूएल के धोरै पोहचकै जो किमे शाऊल नै उसतै करया था सारा उस ताहीं कह सुणाया। फेर वो अर शमूएल जाकै नबायोत म्ह रहण लाग्गे। 19 जिब शाऊल नै इसकी खबर मिली के दाऊद रामाह के नबायोत*19:19 नबायोत नबियाँ के झुडं म्ह रहण खात्तर गया था। म्ह सै, 20 फेर शाऊल नै दाऊद ताहीं पकड़कै ल्याण खात्तर दूत भेज्जे; अर जिब शाऊल के सैनिकां नै नबियाँ के दल ताहीं नबूवत करदे होए, अर शमूएल ताहीं उनकी प्रधानता करदे होए देख्या, फेर परमेसवर का आत्मा उनपै चढ़या, अर वे भी नबूवत करण लाग्गे। 21 इसकी खबर पाकै शाऊल नै और दूत भेज्जे, अर वे भी नबूवत करण लाग्गे। फेर शाऊल नै तीसरी बार दूत भेज्जे, अर वे भी नबूवत करण लाग्गे। 22 फेर वो आप ए रामाह चल्या, अर उस बड़े गड्ढे पै जो सेकू नामक जगहां म्ह सै पोहचकै पूछण लाग्या, "शमूएल अर दाऊद कित्त सै?" किसे नै कह्या, "वे तो रामाह के नबायोत म्ह सैं।" 23 फेर वो औड़ै, यानिके रामाह के नबायोत म्ह चल्या; अर परमेसवर का आत्मा उस पर भी चढ़या, अर वो रामाह के नबायोत ताहीं पोहचण ताहीं नबूवत करदा होया चला गया। 24 अर उसनै भी अपणे कपड़े उतारे, अर शमूएल के स्याम्ही नबूवत करण लाग्या, अर धरती पै गिरकै दिन अर रात नंगा पड्या रहया। इस कारण तै या कहावत चाल्‍ली, "के शाऊल भी नबियाँ म्ह तै सै?"