1 फेर हन्‍ना नै प्रार्थना करकै कह्या,

"मेरा मन यहोवा के कारण खुशी तै भरग्या सै;

मेरा सींग यहोवा के कारण ऊँच्‍चा होया सै।

मेरा मुँह मेरे दुश्मनां के बिरुध्द खुलग्या,

क्यूँके मै तेरे करे गये उद्धार तै आनन्दित सूं।*

2 यहोवा कै समान कोए पवित्र कोनी,

क्यूँके तन्‍नै छोड़ और कोए सै ए कोनी;

अर म्हारे परमेसवर के समान कोए चट्टान न्ही सै।

3 फूलकै अहंकार की और बात ना करो,

अर अंधेर की बात थारे मुँह तै ना लिकड़ै;

क्यूँके यहोवा ज्ञान्‍नी परमेसवर सै,

अर काम्मां नै तौलण आळा सै।

4 शूरवीरां के धनुष टूटगे,

अर ठोक्‍कर खाण आळयां की कमर म्ह बल का फेंटा कस्या गया।

5 जो पेट भरै थे उन ताहीं रोट्टी खात्तर मजदूरी करणी पड़ी,

जो भूक्खे थे वे फेर इसे न्ही रहे।

बल्के जो बाँझ थी उसके सात* होए,

पर भोत घणे बाळकां की माता घुळदी जावै सै।

6 यहोवा मारै सै अर जिन्दा भी करै सै;

वोए अधोलोक म्ह उतारै अर उस म्ह तै लिकाड़ै भी सै।

7 यहोवा कंगाल करै सै अर धनी भी बणावै सै,

वोए नीच्‍चा करै सै अर ऊँच्‍चा भी करै सै*।

8 वो कंगाल नै धूळ म्ह तै उठावै सै;

अर दरिद्र नै राख के ढेर म्ह तै लिकाड़कै खड्या करै सै,

ताके उन ताहीं अधिपतियाँ के गैल बिठावै,

अर महिमायुक्‍त सिंहासन के वारिस बणावै।

क्यूँके पृथ्वी के खम्भे यहोवा के सैं,

अर उसनै उनपै जगत ताहीं धरया सै।"

9 "वो अपणे भगतां के पायां नै सम्भाळे रहवैगा,

पर दुष्ट अंधियारे म्ह चुपचाप पड़े रहवैगें;

क्यूँके कोए माणस अपणे बल के कारण प्रबल न्ही होवैगा।

10 जो यहोवा तै झगड़ै सैं वे चकणाचूर होंगे;

वो उनके बिरुध्द अकास म्ह गरजैगा।

यहोवा पृथ्वी की छोर ताहीं न्याय करैगा;

अर अपणे राजा नै बल देवैगा

अर अपणे अभिषिक्त ताहीं अपणे दुश्मनां तै लड़ण की ताकत दी।"

11 फेर एल्काना रामाह म्ह अपणे घर चल्या गया। अर वो बाळक एली याजक के स्याम्ही यहोवा की सेवा टहल करण लाग्या।

12 एली के बेट्टे तो लुच्‍चे थे; उननै यहोवा का आदर न्ही करया। 13 एली के बट्टे याजक थे अर याजकां की रीति माणसां के गैल या थी, के जिब कोए माणस बलि चढ़ान्दा तो याजक का सेवक माँस पकाण के बखत एक नोक आळा काँटा हाथ म्ह लिये होए आकै, 14 उसनै कढ़ाही, या हाण्डी, या हँडे, या तासळे के भित्तर डालदा; अर जितना माँस काँटे म्ह लाग जान्दा उतनाए याजक आप ले लेन्दा। इसाए वे शीलो म्ह सारे इस्राएलियाँ गैल करया करै थे जो ओड़ै आवैं थे। 15 अर चर्बी जळाण तै पैहले भी याजक का सेवक आकै मेलबलि चढ़ाणआळे तै कहवै था, "भूनण खात्तर याजक ताहीं माँस दे; वो तेरे तै पक्या होया न्ही, कच्‍चा ए माँस लेवैगा।" 16 अर जिब कोए उसतै कहन्दा, "पक्‍का याजक के जरिये चर्बी इब्बे जळाई जावैगी, फेर जितना तेरा जी चाहवै उतणा ले लिये," तब वो कहन्दा, "ना, इब्बे दे; न्ही तो मै छीन ल्यूँगा।" 17 ज्यांतै एली के जवान बेट्यां का पाप यहोवा की नजर म्ह घणाए भारी होया; क्यूँके वे माणस यहोवा की भेंट का निरादर करै थे।

18 पर शमूएल जो बाळक था सणी का एपोद पैहरे होए यहोवा के स्याम्ही सेवा टहल करया करै था।*) 19 अर उसकी माँ हर साल उसकै खात्तर एक छोट्टा सा बागा बणाकै जिब अपणे पति के गैल हर साल की बलि चढ़ाण आवै थी तब बागा उसके धोरै ल्याया करै थी। 20 एली नै एल्काना अर उसकी घरआळी ताहीं आशीर्वाद देकै कह्या, "यहोवा इस अर्पण करे होए बाळक के बदलै जो उसनै अर्पण करया सै तन्‍नै इस घरआळी तै वंश दे;" फेर वे अपणे घर बोहड़गे। 21 यहोवा नै हन्‍ना की सुधि ली, अर वा गर्भवती होई अर उसके तीन बेट्टे अर दो बेट्टी पैदा होई। इस दौरान बाळक शमूएल यहोवा के गैल रहन्दा होया बढ़दा गया।

22 एली तो घणाए बूढ़ा होग्या था, अर उसनै सुण्या के उसके बेट्टे सारे इस्राएलियाँ तै किसा-किसा बरताव करै सैं, बल्के मिलापआळे तम्बू के दरबाजे पै सेवा करण आळी बिरबानियाँ कै गैल कुकर्म भी करै सैं। 23 फेर एली नै उनतै कह्या, "थम इसे-इसे काम क्यांतै करो सों? मै इन सारे माणसां तै थारे कुकर्मां की चर्चा सुणु सूं। 24 हे मेरे बेट्यो, इसा ना करो, क्यूँके जो खबर मेरे सुणण म्ह आवै सै वा आच्छी कोनी; थम तो यहोवा की प्रजा तै अपराध कराओ सों। 25 जै एक माणस दुसरे माणस का अपराध करै, तब तो न्यायी उसका न्याय करैगा; पर जै कोए माणस यहोवा के बिरुध्द पाप करै, तो उसकै खात्तर कौण बिनती करैगा?" तोभी उननै अपणे पिता की बात न्ही मान्‍नी; क्यूँके यहोवा की इच्छा उन ताहीं मार देण की थी। 26 पर शमूएल बाळक बढ़दा गया अर यहोवा अर माणस दोन्‍नु उसतै खुश थे। 27 परमेसवर का एक भविष्यवक्ता एली कै धोरै जाकै उसतै कहण लाग्या, "यहोवा न्यू कहवै सै, के जिब तेरे मूलपुरुष का घराना* मिस्र म्ह फिरौन के घराने के वश म्ह था, तो के मै उसपै प्रगट न्ही होया था? 28 अर के मन्‍नै उस ताहीं इस्राएल के सारे गोत्रां म्ह तै ज्यांतै चुण न्ही लिया था, के मेरा याजक होकै मेरी वेदी के उप्पर चढ़ावे चढ़ावै, अर धूप जळावै, अर मेरै स्याम्ही एपोद पैहरया करै? अर के मन्‍नै तेरे मूलपुरुष के घराने ताहीं इस्राएलियाँ के सारे हव्य न्ही दिए थे? 29 ज्यांतै मेरे मेलबलि अर अन्‍नबलि जिन ताहीं मन्‍नै अपणे धाम म्ह चढ़ाण का हुकम दिया सै, उननै थम क्यूँ पैर तळै रौंदो सों? अर तू क्यूँ अपणे बेट्यां का मेरे तै घणा आदर करै सै, के थम मेरी इस्राएली प्रजा की आच्छी तै आच्छी भेंट खा-खाकै मोट्टे हो जाओ? 30 ज्यांतै इस्राएल के परमेसवर यहोवा की या वाणी सै, के मन्‍नै कह्या तो था, के तेरा घराना अर तेरे मूलपुरुष का घराना मेरै स्याम्ही सदा चल्या करैगा; पर इब यहोवा की वाणी या सै, के या बात मेरे तै दूर हो; क्यूँके जो मेरा आदर करैं मै उनका आदर करुँगा, अर जो मन्‍नै तुच्छ जाणै वे छोट्टे समझे जावैंगे। 31 सुण, वे दिन आवै सैं, के मै तेरा भुजबल अर तेरे मूलपुरुष के घराने का भुजबल इसा तोड़ दियुँगा, के तेरे घराने म्ह कोए बूढ़ा होण न्ही पावैगा। 32 इस्राएल का कितना ए कल्याण क्यूँ ना हो, तोभी तन्‍नै मेरा दुःख दिखाई देगा, अर तेरे घराने म्ह कोए कदे बूढ़ा ना होण पावैगा। 33 मै तेरे कुल के हरेक तै तो अपणी वेदी की सेवा ना छीन्‍नूँगा, पर तोभी तेरी आँख देखदी रह जावैगी, अर तेरा मन दुखी होवैगा, अर तेरे घर की बढ़दी सारे अपणी पूरी जवानी ए म्ह मर मिटैंगे। 34 अर मेरी इस बात का निशान वा विपत्ति होवैगी जो होप्नी अर पीनहास नाम के तेरे दोन्‍नु बेट्यां पै पड़ैगी; यानिके वे दोन्‍नु के दोन्‍नु एक ए दिन मर जावैंगे। 35 अर मै अपणे खात्तर एक बिश्वासयोग्य याजक ठहराऊँगा, जो मेरे हृदय अर मन की इच्छा कै मुताबिक करया करैगा, अर मै उसका घर बसाऊँगा अर स्थिर करुँगा, अर वो मेरे राजा के आग्गै-आग्गै सारे दिन चाल्या फिरया करैगा। 36 अर इसा होवैगा के जो कोए तेरे घराने म्ह बच्या रहवैगा वो उस्से कै धोरै जाकै एक छोट्टे-से टुकड़े चाँदी के या एक रोट्टी के खात्तर दण्डवत करकै कहवैगा, याजक के किसे काम म्ह मन्‍नै लगा, जिसतै मन्‍नै एक टुकड़ा रोट्टी मिलै।"