वाचा के सन्दूक का बोहड़णा
1 यहोवा का सन्दूक पलिश्तियाँ के देश म्ह सात महिन्ने ताहीं रह्या। 2 पलिश्तियाँ नै पुजारियाँ अर भावी कहण आळयां ताहीं बुलाकै पूच्छया, "यहोवा के सन्दूक का हम के करां? हमनै बताओ, के कीमत देकै हम उस ताहीं उसकी जगहां पै भेज्जा?" 3 वे बोल्ले, "जै थम इस्राएल के देवता का सन्दूक ओड़ै भेज्जो, तो उसनै न्यूए ना भेजियो; उसकी हानि भरण कै खात्तर जरुर दोषबलि दियो। फेर थम ठीक हो जाओगे, अर थम जान ल्योगे के उसका हाथ थारे पै तै क्यूँ न्ही उठाया गया।" 4 उननै पूच्छया, "हम उसकी हानि भरण कै खात्तर कौण सा दोषबलि दें?" वे बोल्ले, "पलिश्ती सरदारां की गिणती के मुताबिक सोन्ने की पाँच गिलटियाँ, अर सोन्ने के पाँच चूहे; क्यूँके थम सारे अर थारे सरदार दोन्नु एक ए बीमारी तै बीमार सो। 5 तो थम अपणी गिलटियाँ अर अपणे देश के नाश करण आळे चूहे की भी मूरतां बणाकै इस्राएल के देवता की महिमा मान्नो; सम्भव सै वो अपणा हाथ थारे पै तै अर थारे देवत्यां अर देश पै तै ठा ले। 6 थम अपणे मन क्यूँ इसे हठीले करो सो जिस तरियां मिस्रियाँ अर फिरौन नै अपणे मन हठीले कर दिए थे? जिब उसनै उनके बीच म्ह अचम्भित काम करे, फेर के उननै उन माणसां ताहीं जाण ना दिया, अर के फेर वे चाल्ले न्ही गए? 7 इस खात्तर इब थम एक नई गाड़ी बणाओ, अर इसी दो दुधार गां ल्यो जो जूए तळै न आई हों, अर उन गायां ताहीं उस गाड़ी म्ह जोतकै उनके बच्चयां ताहीं उनके धोरै तै लेकै घर ताहीं बोहड़ा द्यो। 8 फेर यहोवा का सन्दूक लेकै उस गाड़ी पै धर द्यो, अर सोन्ने की जो चीज थम उसकी हानि भरण कै खात्तर दोषबलि की रीति तै दोगे उननै दुसरे सन्दूक म्ह धरकै उसके धोरै धर द्यो। फेर उसनै रवाना कर द्यो के चली जावै। 9 अर देखदे रहणा; जै वो अपणे देश के रास्ता तै होकै बेतशेमेश6:9 बेतशेमेश सूरज का घर नगर ताहीं चाल्लै, तो जाणो के म्हारा यो बड़ा नुकसान उसी की और तै होया अर जै न्ही, तो मान्नै पक्का होवैगा के यो मार म्हारे पै उसकी और तै न्ही, पर संयोग ए तै होई।"
10 उन माणसां नै उसाए करया; यानिके दो दुधार गां लेकै उस गाड़ी म्ह जोत्ती, अर उनके बच्चयां ताहीं घर म्ह बन्द कर दिया। 11 अर यहोवा का सन्दूक, अर दूसरा डिब्बा, अर सोन्ने के चूहे अर अपणी गिलटियाँ की मूरतां ताहीं गाड़ी पै धर दिया। 12 फेर गायां नै बेतशेमेश का सीध्धा राह लिया; वे सड़क ए सड़क रम्भादी होई चली गई, अर ना दाहिने मुड़ी अर ना बायें; अर पलिश्तियाँ के सरदार उनकै पाच्छै-पाच्छै बेतशेमेश की सीमा ताहीं गए। 13 अर बेतशेमेश के माणस तराई म्ह गेहूँ काट रह्ये थे; अर जिब उननै आँख ठाकै सन्दूक ताहीं देख्या, फेर उसके देखण तै आनन्दित होए। 14 गाड़ी बेतशेमेशी नगर के यहोशू नाम के एक आदमी के खेत म्ह जाकै ओड़ै ठहर गई, जित्त एक बड़ा पत्थर था फेर उननै गाड़ी की लाकड़ी ताहीं चीरा अर गायां ताहीं होमबलि करकै यहोवा के खात्तर चढ़ाया। 15 अर लेवियाँ नै यहोवा के सन्दूक ताहीं उस डिब्बा के समेत जो गैल था, जिस म्ह सोन्ने की चिज्जां थी, उतार के उस बड़े पत्थर पर राक्ख दिया; अर बेतशेमेश के माणसां नै उसे दिन यहोवा के खात्तर होमबलि अर मेलबलि चढ़ाए। 16 या देखकै पलिश्तियाँ के पाँचों सरदार उसे दिन एक्रोन ताहीं बोहड़गे।
17 सोन्ने की गिलटियाँ जो पलिश्तियाँ नै यहोवा के नुकसान भरण कै खात्तर दोषबलि करकै दे दी थी उन म्ह तै एक तो अश्दोद नगर के राजाओ की और तै, एक गाज़ा, एक अश्कलोन, एक गत, अर एक एक्रोन की और तै दी गई थी। 18 अर वो सोन्ने के चूहे, के शहरपनाह आळे नगर, के बिना शहरपनाह के गाम, बलके जिस बड़े पत्थर पै यहोवा का सन्दूक राख्या गया था ओड़ै पलिश्तियाँ के पाँचों सरदारां के हक ताहीं की सारी बस्तियाँ की गिणती के मुताबिक दिए गए। वो पत्थर आज ताहीं बेतशेमेशी यहोशू के खेत म्ह सै।
19 फेर इस कारण तै के बेतशेमेश के माणसां नै यहोवा के सन्दूक के भित्तर झाँक्या था उसनै उन म्ह तै सत्तर मनुष्य, अर फेर पचास हजार मनुष्य मार दिये; अर ओड़ै के माणसां नै ज्यांतै बिलाप करया के यहोवा नै माणसां का बड़ा ए संहार करया था।
वाचा का सन्दूक किर्यत्यारीम म्ह
20 फेर बेतशेमेश के माणस आप्पस म्ह कहण लाग्गे, "इस पवित्र परमेसवर यहोवा के स्याम्ही कौण खड्या रह सकै सै? अर वो म्हारे धोरै तै किसके धोरै चल्या जावै?" 21 फेर उननै किर्यत्यारीम6:21 किर्यत्यारीम लाकड़ियाँ का शहर नगर के निवासियां के धोरै या कहण ताहीं दूत भेज्जे, "पलिश्तियाँ नै यहोवा का सन्दूक बोहड़ा दिया सै; ज्यांतै थम आकै उसनै अपणे उरै ले जाओ।"