2 Pedro 2

चूठे शिक्षक

1 बऊत दिन पईले जिंयाँ इस्राएली लोका बीचे चूठे भविष्यबक्ता थे, तिंयाँ ई तुसा लोका बीचे बी चूठे उपदेशका चूठी शिक्षा देणी। सेयो लोक तुसा बीचे आऊल़े-आऊल़े कूसी जाणे और तुसा ते परमेशरो रे बारे रे सर्वनाश करने वाल़ा चूठ बोलणा। एथो तक तिना मसीह खे बी जिने तुसे मोले लये आपणे प्रभुए रे रूपो दे मानणे ते ना करनी जिने तिना खे पापो ते छुटकारा देई राखेया। तिना एड़ा काम करी की आपू पाँदे चट ई सर्वनाश ल्याऊणा। 2 बऊत सारे परमेशरो रे लोका तिना चूठे उपदेशका री बुरी शिक्षा मानणी और तिजी रे मुताबिक बुरे काम करने। नतीजन, तिना रे बुरे कामो री बजअ ते ओरी लोका सच्चो री बाटा री निन्दा करनी। 3 ये चूठे उपदेशक बऊत लाल़ची ऊणे और तिना तुसा खे मनकड़न्त काणियां बणाई की तोखा देणा कि तुसा ते पैसे कमाई सको। परमेशर पईले तेई तिना लोका खे सजा देणे रा फैंसला करी चूकी रा और से ये करने खे त्यार बी ए। परमेशरो पक्का ई तिना लोका रा सत्यानाश करी देणा।