1 शाऊल स्तिफनुसो री मौता रे पूरी तरह ते शामिल था।

तेसी दिने यरूशलेम नगरो री मण्डल़िया पाँदे बऊत उपद्रव ऊणे लगेया और प्रेरिता खे छाडी की सब विश्वासी यहूदिया और सामरिया रे प्रदेशो रे ओरे-पोरे ऊईगे। 2 तेबे कुछ भग्त लोके स्तिफुनुस कब्रा रे राखेया और तेसखे बऊत दु:ख कित्तेया। 3 शाऊल मण्डल़िया खे ऊजाड़ने लगी रा था और कअरे-कअरे कूसी की मर्द और जवाणसा विश्वासिया खे कसिटी-कसिटी की जेला रे पाओ था।

4 जो विश्वासी ओरे-पोरे ऊईगे थे, सेयो सुसमाचार सुणांदे ऊए, कुमदे-फिरदे रये। 5 फिलिपुस सामरिया प्रदेशो रे एक नगरो रे जाई की मसीह रा प्रचार करने लगेया 6 और जो गल्ला फिलिपुसे बोलिया सेयो लोके सुणी की और जो चमत्कार से दखाओ था तिना खे देखी की एक मन ऊई की त्यान लगाया। 7 कऊँकि फिलिपुसो री आज्ञा ते बऊत जणेया ते दुष्टात्मा जोरे-जोरे साथे चींगी की निकल़ी गिया और बऊत सारे अदरंगो रे रोगी और लंगड़े बी ठीक कित्ते। 8 तेबे तेस नगरो रे बऊत शान्ति ऊईगी।

9 इजी ते पईले तेती शमौन नाओं रा एक माणूं रओ था, जो जादू-टौणा करी की सामरिया जातिया रे लोका खे हैरान करो था और आपणे आपू खे कोई बड़ा माणूं बताओ था। 10 और सब छोटेया ते लयी की बड़ेया तक तेसखे मानो थे और बोलो थे, "ये माणूं परमेशरो री से सामर्थ ए, जेतेखे महान् बोलोए।" 11 तिने बऊत दिनो ते सेयो आपणे जादूओ रे कामो साथे हैरान करी राखे थे। तेबेई तो सेयो तेसखे बऊत मानो थे। 12 पर जेबे तिने फिलिपुसो पाँदे विश्वास कित्तेया, जो परमेशरो रे राज्य रा और प्रभु यीशु मसीह रे नाओं रा सुसमाचार सुणाओ था, तेबे लोक, क्या मर्द क्या जवाणसा, सब बपतिस्मा लणे लगे। 13 तेबे शमौने आपू बी विश्वास कित्तेया और बपतिस्मा लई की फिलिपुसो साथे रणे लगेया, से चिह्न और बड़े-बड़े सामर्था रे काम देखी की हैरान ओ था।

14 जेबे प्रेरिते, जो यरूशलेम नगरो रे रओ थे, सुणेया कि सामरिया रे लोके परमेशरो रा वचन मानी ला रा, तेबे पतरस और यूहन्ना तिना गे पेजे। 15 तेबे तिने जाई की तिना खे प्रार्थना कित्ती, ताकि पवित्र आत्मा खे पाओ। 16 कऊँकि से एबुए तक केसी पाँदे नि उतरेया था, तिने तो बस प्रभु यीशुए रे नाओं ते बपतिस्मा लयी राखेया था। 17 तेबे पतरसे और यूहन्ने तिना पाँदे आथ राखे और पवित्र आत्मा तिना पाँदे आया। 18 जेबे शमौने देखेया कि प्रेरिता रे आथ राखणे ते पवित्र आत्मा दित्तेया जाओआ, तेबे तिने तिना गे पैसे ल्याई की तिना खे बोलेया, 19 "ये सामर्थ माखे बी देयो ताकि जेस केसी पाँदे आथ राखूँ, तेसखे पवित्र आत्मा मिलो।"

20 पतरसे तेसखे बोलेया, "तेरे पैसे तां साथे ई नाश ओ, कऊँकि तैं परमेशरो रा दान पैसेया साथे खरीदणे रे बारे रे सोचेया। 21 एते सेवा रे तेरा मेरा कोई लेणा-देणा निए कऊँकि तेरा मन परमेशरो सामणे सच्चा निए। 22 इजी री खातर आपणी एसा बुराईया ते मन फिराई की प्रभुए ते प्रार्थना कर, ऊई सकोआ कि तेरे मनो रा बिचार माफ ऊई जाओ। 23 कऊँकि आऊँ देखणे लगी रा कि ताखे इतणी जल़न ओई और पापो रे बन्दनो रे पड़े राए।" 24 शमौने ज्वाब दित्तेया, "तुसे मेरिया तँईं प्रभुए ते प्रार्थना करो कि जो गल्ला तुसे बोलिया, तिना बीचा ते कोई बी मां पाँदे नि पड़ो।" 25 तेबे सेयो गवाई देई की और प्रभु यीशुए रा वचन सुणाई की यरूशलेमो खे वापस ऊईगे और तिने सामरिया रे बऊत सारे गांव रे सुसमाचार सुणाया।

26 तेबे प्रभुए रे एक स्वर्गदूते फिलिपुसो खे बोलेया, "उठी की दक्खणा री तरफा खे, तेसा बाटा रे जा, जो यरूशलेमो ते गाजा नगरो खे जाओई। ये रेगिस्तान बाट ए।" 27 फिलिपुस उठी की चली गा। बाटा रे तेसरी मुलाकात एक खोजे ते ऊई, जो कूश देशो री राणी कन्दाके रा मन्त्री और खजान्ची था। से भक्ति करी की यरूशलेमो ते वापस आऊणे लगी रा था। 28 से आपणे रथो रे था बैठेया रा और यशायाह भविष्यबक्ते री कताब पढ़दा ऊआ आपणे देशो खे जाणे लगी रा था। 29 तेबे पवित्र आत्मे फिलिपुसो खे बोलेया, "नेड़े जाई की एस रथो साथे ऊई जा।" 30 फिलिपुसे तेसरी तरफा खे दौड़ी की से यशायाह भविष्यबक्ते री कताब पढ़दे ऊए सुणेया और पूछेया, "जो तूँ पढ़ने लगी रा क्या समजणे बी लगी रा?" 31 तिने बोलेया, "जदुओ तक माखे कोई समजयाओ गा नि, तदुओ तक माखे किंयाँ समज आऊणा?" तेबे तिने फिलिपुसो ते बिनती कित्ती कि रथो पाँदे चढ़ी की मां साथे बैठी जा। 32 पवित्र शास्त्रो रा जो पाठ से पढ़ने लगी रा था, से ये था

"से पेडा जेड़ा काणे खे पऊँचाया

और जिंयाँ मिन्टू आपणे ऊन कापणे वाल़ेया सामणे चुप रओआ, तिंयाँ ई तिने बी आपणा मूँ नि खोलेया।

33 तेसरी दीनता रे तेसरा न्याय नि ऊआ और तेसरे बखतो रे लोका रे बारे रे केस बताणा,

कऊँकि तरतिया ते तेसरी जिन्दगी लयी ली।"

34 तेबे खोजे फिलिपुसो ते पूछेया, "आऊँ तांते बिनती करूँआ कि भविष्यबक्ता ये किजी रे बारे रे बोलणे लगी रा आपणे या केसी दूजे रे बारे रे?" 35 तेबे फिलिपुसे बोलणा शुरू कित्तेया और एते ई शास्त्रो ते शुरू करी की तेसखे प्रभु यीशुए रा सुसमाचार सुणाया। 36 बाटा रे चलदे ऊए सेयो पाणिए रे कनारे पऊँचे, तेबे खोजे बोलेया, "देख, एती पाणी ए, एबे माखे बपतिस्मा लणे ते कुण रोकी सकोआ?" 37 फिलिपुसे बोलेया, "जे तूँ सारे मनो ते विश्वास करेया, तो लई सकोआ।" तिने बोलेया, "आऊँ विश्वास करूँआ कि यीशु मसीह परमेशरो रा पुत्र ए।" 38 तेबे तिने रथ खड़ा करने री आज्ञा दित्ती और खोजा और फिलिपुस दोनो जणे पाणिए बीचे गये और फिलिपुसे तेसखे बपतिस्मा दित्तेया। 39 जेबे सेयो पाणिए ते निकल़ी की पाँदे आए, तेबे प्रभुए रा पवित्र आत्मा फिलिपुसो खे चकी की लयी गा। और खोजे से फेर नि देखेया और से खुश ऊईगा कि परमेशरे आऊँ बचाईता और आपणे देशो खे चली गा। 40 तेबे फिलिपुस अशदोद नगरो रे आयी की निकल़ेया और जदुओ तक कैसरिया नगरो रे नि पऊँछेया, तदुओ तक नगरो-नगरो रे सुसमाचार सुणांदा रया।