1 आऊँ आपू दारा नाओं रे मादी जातिया रे राजे रे राजो रे पईले साले तेसखे मजबूत करने ओर तागत देणे खे खड़ा ऊईगा। 2 एबे आऊँ ताखे सच्ची गल्ल बताऊँआ। देख, फारसो रे राज रे एबे तीन राजे ओर उठणे ओर चौथा राजा तिना सबी ते जादा अमीर ऊणा, तेस आपणी सम्पतिया रा इस्तेमाल यूनानो रे राज्य रे खलाफ लड़ने खे सबी खे पड़काणे खे करना। 3 तेसते बाद एक पराक्रमी राजा ऊणा ओर तेस आपणा राज्य बऊत बढ़ाणा ओर आपणी इच्छा रे मुताबिक ई काम करेया करना। 4 जेबे से बड़ा तागतबर ऊई जाणा, तेबे तेसरा तागतबर राज्य बिखरी जाणा ओर चऊँ इस्सेया दे बांडी जाणा, तेबे ना तो तेसरे राज री शक्ति जेड़ी की तेड़ी रणी ओर ना तेसरे कुलो खे कुछ मिलणा, कऊँकि तेसरा राज उखड़ी की, ओरी लोका खे मिलणा।

5 तेबे दक्खण देश मिस्रो रा राजा शक्तिशाली ऊई जाणा, पर तेसरे एकी सेनापतिये तेसते जादा शक्तिशाली ऊई की राज करना, एथो तक की तेसरा सेनापति बऊत बड़ी जाणा। 6 कई साला बाद, दक्खणा रा राजा ओर उत्तरा दे सामरिया रा राजा सच्चे दोस्त बणने खे त्यार ऊई जाणे। दक्खणा रे राजे री बेटी उत्तरा रे राजे ते ब्या करने खे जाणी। इजी ते तिना रा रिश्ता मजबूत ऊणा। पर योजना पूरी नि ऊणी। तेसा आपणा अक्क खोई देणा। तेसा रा लाड़ा एबे राजा बणी की नि रणा। केसी से, तेसा रा लाड़ा, तेसा रे बच्चे ओर तेसा री मताद करने वाल़े नौकर काई देणे। 7 बादो ते, तेसा रे कराणे रा कोई माणूं दक्खणा रा राजा बणना। तेस उत्तरा रे राजे पाँदे अमला करना। से तेस राजे रे मजबूत शईरो दे जाणा। तेस उत्तरा रे राजे पाँदे जीत आसिल करनी, 8 तेबे तेस तिना रे देवतेया री बणाई रिया मूर्तिया ओर सूईने चाँदिए रे अच्छे पांडे छुड़ाई की मिस्रो दे लई जाणे, फेर कई साला तक तेस उत्तरा दे सीरिया रे राजे पाँदे दुबारा अमला नि करना, 9 बादो ते उत्तरा दे सीरिया रे राजे दक्खणा रे राजे रे राज्य पाँदे अमला करना पर छोड़ ई आपणे देशो खे वापस चली जाणा, 10 जेबे कि, उत्तरा दे सामरिया रे राजे रे माठेया लड़ाई शुरू करने री त्यारी करनी, ओर तिना एक बड़ी सेना कट्ठा करनी। सीरिया रे राजे रे एकी माठे री सेना दक्खणा रिया तरफा खे जाणी ओर सारे इस्राएलो दे एक बऊत बड़ी बाढ़ा जेड़ी फैली जाणी। तिना इस्राएलो रे दक्खणा दे एकी मजबूत किले पाँदे अमला करना, 11 तेबे आपणे बऊत गुस्से रिया बजा ते मिस्र देशो रे दक्खणा रे राजे उत्तरो दे सामरिया रे राज्य पाँदे अमला करना। सामरिया राजे एक बऊत बड़ी सेना कट्ठी करनी, पर मिस्रो रे राजे सेयो अराई देणे। 12 मिस्रो रे राजा आपणियां जीता पाँदे कमण्ड करना, कऊँकि तेसरी सेने सामरिया रे बऊत पारी सिपाई काई ते, पर से सदा जीतदा ई नि रणा। 13 सामरिया रे राजे फेर एक सेना कट्ठी करनी जो पईले ते जादा ऊणी। कुछ साला बाद, तेस फेर एक बड़ी सेना ओर लड़ाईया रे बऊत सारे अथियार लई की मिस्रो रिया बाटा दे दक्खणा रिया तरफा खे आऊणा, 14 तुसा रे देशो रे कुछ उपद्रवी लोका दक्खण देशो रे राजे रे खलाफ बिद्रोह करना, कऊँकि तिने एक दर्शण देखी राखेया ए, पर सेयो आरी जाणे। 15 फेर सामरिया रा राजा आपणी सेना खे लई की दक्खणा रिया तरफा खे आऊणा ओर एकी शईरो रिया दवाला पाँदे माट्टिया रा टेर लगाणा जो अच्छी तरआ ते बचेया दा ए, ओर तिना सेयो दवाला तोड़ी देणियां ओर शईरो पाँदे कब्जा करी लणा। मिस्रो रे सिपाई जो तेस शईरो री रक्षा करने खे आई रे, एथो तक की सबी ते तागतबर सिपाई बी लड़ाईया दे खड़े नि रई सकणे। 16 उत्तरो ते अमला करने वाल़े राजे जो चाणा, सेई करना। कोई बी तेसखे रोकी नि सकणा। तेस खरिया जमीना पाँदे अमला करना। तेसगे इजी खे नाश करने री तागत ऊणी। 17 फेर सीरिया रे राजे आपणे राज्य रे सारे सीदे लोका समेत दक्खणा रिया तरफा खे आऊणे री योजना बनाणी। तेस मिस्रो रे राजे साथे समजौता करना ओर आपणी बेटिया खे मिस्रो रे राज्य खे नाश करने खे तेस से मिस्रो रे राजे खे आपणी बनाणे खे देणी। पर से योजना सफल नि ऊई जाणी। 18 तेते ते बाद, सामरिया रा कमण्डी राजे आपणी सेना लई की बड़े समुद्रो रे नेड़े रिया जगा पाँदे अमला करना ओर तेसरी सेना तिना बीचा ते कईया पाँदे आपणा कब्जा करी लणा। पर दूजे देशो रे सेनापतिये सेना लई की सामरिया री सेना अराई देणी ओर तिना रे राजे रा कमण्ड तोड़ी देणा। तेस सामरिया रे राजे साथे सेई करना जो तेसखे बऊत कमण्ड करने रिया बजा ते ऊणा चाईयो था। 19 तेबे तेस आपणे देशो रे गढ़ो रिया तरफा खे मूँ फेरना ओर से लड़ाईया दे आरी जाणा ओर से फेर केथी बी नजर नि आऊणा। 20 तेसरे उत्तराधिकारिये राजे रे खर्चे रिया तँईं एक कर कट्ठा करने वाल़ा पेजणा। पर बऊत ई कट बखतो रे शासनो ते बाद, से मरी जाणा, पर गुस्से या लड़ाई दे नि मरना। 21 स्वर्गदूते आगे बोलेया, "सीरिया रा आगला राजा एक दुष्ट माणूं ऊणा, जेसरी राजे री जी प्रतिष्ठा पईले ते नि ऊणी, तेबे बी तेस चैनो रे बखते आई की चिकणी-चुपड़िया गल्ला रे जरीये राज प्राप्त करना। 22 तेसरे सामणे सारिया सेना पुरिया तरआ ते नाश ऊई जाणिया ओर टूटी जाणिया, परमेशरो रा बड़ा पुरोईत जो वाचा रा राजकुमार ए, 23 तेस कऊँकि तेस साथे वाचा बानी की बी छल करना ओर थोड़े ई लोका खे साथे लई की जीती जाणा।" 24 तेसरिया सेना अचाणक एक एड़िया जगा पाँदे अमला करना जो बऊत ई समृद्ध ए, ओर जो काम ना तो तेसरे बुजुर्गे ओर ना तेसरे बुजुर्गा रे बुजुर्ग करो थे, तेस से करना ओर लूटी री तअन-सम्पत्ति तिना बीचे बऊत बाँडेया करनी। तेस कुछ बखतो तक मजबूत शईर लणे री इच्छा करदे रणा। 25 तेबे तेस दक्खण देशो रे राजे रे खलाफ बड़ी सेना लई की आपणा याओ ओर तागत बढ़ाणी ओर दक्खण देशो रे राजे बऊत बड़ी सेना लई की युद्ध तो करना, पर ठईरी नि सकणा, कऊँकि लोके तेसरे खलाफ कल्पना करनी। 26 मिस्रो रे राजे रे खास शाही लोका तेसखे नाश करने री कोशिश करनी। तेसरी सेना नाश करी देणी। तेसरे कई सिपाई काईल ऊई जाणे या मरी जाणे। 27 तेबे तिना दुँईं राजे रे मन बुराई करने रे लगणे, एथो तक कि तिना एक ई मेजो पाँदे बैठी की आपू बीचे चूठ बोलणा, पर इजी ते कुछ नि बणना, कऊँकि इना सबी गल्ला रा अन्त ठराए रे बखतो देई ऊणे वाल़ा ए।

28 सामरिया रे राजे री सेना आपणे देशो खे वापस ऊई जाणी, ओर आपू साथे सेयो सब किमती चीजा लई जाणिया जो तिने लड़ाईया दे लूटी लिया थिया। राजे यहूदी लोका रे बड़े पुरोईतो ते बचणे खे कसम खाणी। तेस इस्राएलो दे जो चाए से करना, ओर आपणे देशो खे वापस ऊई जाणा।

29 जेस बखते परमेशरे फैंसला लया राजे फेर दक्खण देशो पाँदे अमला करना। पर एते बारिया से पईले जेड़ा आपणियां योजना दे सफल नि ऊणा। 30 कऊँकि पच्छमा रे तटो ते कित्तिया रे आऊणे वाल़े जाह्जा सेयो डराणे, ओर से पीछे अटी की आपणे कअरो खे वापस ऊई जाणा। पर तेस पवित्र वाचा रे लोका पाँदे आपणा रोष पड़काणा, ओर जिना वाचा मानणा छाडी देणी तिना खे सजा देणी। 31 तेबे तेसरी मताद करने वाल़ेया खड़े ऊई की, मजबूत पवित्र जगा अपवित्र करनी ओर रोज की होमबलि बन्द करनी। ओर तिना से घृणित चीज खड़ी करनी जो उजाड़ी देयो ई।* 32 जिना लोका दुष्ट ऊई की से वाचा तोड़नी, तिना साथे तेस चिकणी-चुपड़ी गल्ला करी की भग्ति हीन करी देणे, पर जो लोक आपणे परमेशरो खे जाणोए, तिना तेसरा मजबूतिया ते बरोद करना। 33 लोका खे सिखाणे वाल़े अक्लमंद परदाना बऊता खे समजयाणा, तेबे बी सेयो बऊत दिन तक तलवारी साथे छिदी की ओर आगी रे फूखी की ओर बन्दुए ऊई की ओर लूटी की, बड़े दु:खो रे पड़े रे रणे। 34 जेबे सेयो लोक जो आपणे ईश्वरो खे मानोए दु:खो दे पड़ने, तेबे थोड़ा बऊत सम्बल़णे, पर बऊत सारे लोका चिकणी-चुपड़िया गल्ला करी की तिना साथे मिली जाणा। 35 सिखाणे वाल़ेया बीचा ते कई रूड़ने, सेयो इजी खे रूड़ाणे ताकि परखे जाओ ओर साफ-सुथरे करे जाओ। ये दशा अन्तो रे बखतो तक बणी री रणी, कऊँकि इना सबी गल्ला रा अन्त परमेशरो रे ठराए रे बखतो दे ऊणे वाल़ा ए। 36 तेबे सीरिया रे राजे आपणी इच्छा रे मुताबिक काम करना ओर आपणे आपू खे सबी देवतेया ते पाँदे ओर बड़ा ठराणा, बल्कि सबी देवतेया रे खलाफ नऊखी गल्ला बोलणिया। जदुओ तक परमेशरो रे रोषो रा बखत पूरा नि ऊई जाओ, तदुओ तक तेस राजे रे काम सफल ऊँदे रणे, कऊँकि जो पक्का ऊई की ठाणेया राए, से जरूर पूरा ऊणे वाल़ा ए। 37 तेस आपणे बुजुर्गा रे देवतेया री फिकर नि करनी, ना जवाणसा रे प्यारी री कोई फिकर करनी ओर ना केसी देवते री, कऊँकि तेस आपणे आपू खे ई सबी ते ऊच्चा समजणा। 38 तेस आपणे राजपदो पाँदे स्थिर रयी की मजबूत गढ़ो रे देवतेया रा ई आदर करना, एक एड़े देवते री, जेसखे तेसरे बुजुर्ग पनि जाणो थे, तेस सूईना, चाँदी, मणि ओर अच्छी चीजा चढ़ाई की तेसरा आदर करना। 39 तेस सबी ते मजबूत किलेया पाँदे अमला करना। एक नवें देवते तेसखे एड़ा करने दे तेसरी मताद करनी। तेस तिना लोका खे बऊत इज्जत देणी जो तेसखे आपणा परदान मानोए। तेस सेयो लोका पाँदे अधिकारी बनाणे। ओर तेस तिना खे ईनामो रे रूपो दे जमीन देणी।

40 तिने स्वर्गदूते माखे बोलेया, "जेबे उत्तरा रे राज्य सीरिया रे राजे रा अन्तो रे बखते लगभग आऊणे ई वाल़ा ऊणा, तो दक्खणा रे राज्य मिस्रो रे राजे तेस पाँदे अमला करना, पर उत्तर देशो रे राजे तेस देशो पाँदे पऊण-चूखाने जेड़ा बऊत सारे रथ-सवार ओर जाह्ज लई की अमला करना। ईंयाँ ई से बऊत देशा दे फैली जाणा ओर तिना बीचा ते निकल़ी जाणा। 41 से इस्राएल देशो दे बी आऊणा ओर बऊत सारे देश ऊजड़ी जाणे, पर एदोमी, मोआबी ओर खास-खास अम्मोनी जातिया रे देश तेसरे आथो ते बची जाणे।" 42 तेस कई देशा पाँदे जीत आसिल करनी, ओर एथो तक कि मिस्र देश पनि बचणा। 43 तेस मिस्र देशो रे सूईने चाँदिए रे खजाने ओर सब अच्छी चीजा रा स्वामी ऊई जाणा ओर लूबी ओर कूशी लोक बी तेसरे कब्जे दे ऊई जाणे। 44 तेस बखते ई से पूर्ब ओर उत्तर दिशा ते समाचार सुणी की कबराणा ओर बड़े रोषो रे आई की कईया खे नाश करने खे निकल़ना। 45 तेस दुँईं भूमध्य सागर ओर सिय्योन पाह्ड़ो बीचे पवित्र यरूशलेमो रे पाह्ड़ो पाँदे आपणे राज्य रा तम्बू खड़ा करना, इतणा करने ते बाद तेसरा अन्त आई जाणा ओर से मरी जाणा ओर तेसरी मताद करने वाल़ा कोई नि ऊणा।