Lucas 22

पतरसो रा मुकरना

54 तेबे सेयो तिना खे पकड़ी की प्रदान पुरोईतो रे आँगणो रे ल्याए और पतरस दूरो-दूरो तेई तिना पीछे-पीछे आईगा 55 और जेबे सेयो आँगणो रे आग बाल़ी की बैठी रे थे, तेबे पतरस बी तिना बीचे बैठे गा। 56 तेबे एक दासी तेसखे आगी रे प्रयासे रे देखी की और तेसरे कनारो खे ताकि की बोलणे लगी, "ये बी तो तेस साथे था?" 57 पर तिने ये बोली की ना करी ती कि, "ओ जवाणसे! आऊँ तेसखे नि जाणदा।" 58 थोड़ी देर बाद किने ओरी तेसखे देखी की बोलेया, "तूँ बी तो तिना बीचा ते ए," पतरसे बोलेया, "ओ माणूं! आऊँ निए।" 59 तेबे कोई एक कंटे ते बाद एक ओर माणूं मजबुतिया ते बोलणे लगेया, "पक्का ये बी तेस साथे था, कऊँकि ये बी गलीली ए।" 60 पतरसे बोलेया, "ओ माणूं! आऊँ नि जाणदा कि तूँ क्या लगी रा बोलणे?" से ये बोलणे ई लगी रा था कि तेबुई मुर्गे बांग दित्ती। 61 तेबे यीशुए तेसखे मुड़ी की देखेया, तेबे पतरसो खे तिना री गल्ल याद आयी, जो तिने बोली थी कि, "आज मुर्गे री बांग देणे ते पईले तूँ माखे तीन बार जाणने ते मुकरना।" 62 तेबे से बारे निकल़ी की फूटी-फूटी की रोणे लगेया।