1 आऊँ जो ये लिखणे लगी रा मैं यहोवे रे रोषो रिया बजा ते बऊत दण्ड ओर दु:ख सयीन करी राखेया; 2 ये एड़ा मानो कि परमेशर माखे लई जाई की प्रयासे दे नि, न्हेरे देई चलाओआ; 3 यहोवे आपणा आथ मेरे खलाफ करिता एड़ा तिने बार-बार पूरा दिन ओर हर दिन कित्तेया। 4 तिने मेरा मास ओर चामड़ा गल़ाई ता रा ओर तिने मेरी आड्डिया तोड़ी ती रिया। 5 यहोवे माखे रोकणे खे जईरो वाल़ा कीला बणाया ओर आऊँ कठण काम ओर दु:खो साथे केरी राखेया; 6 ये एड़ा मानो कि तिने आऊँ बऊत दिना ते मरे रे माणूंआ जेड़ा न्हेरी जगा दे जिऊँणे खे मजबूर कित्तेया। 7 ये एड़ा मानो कि यहोवे मेरे चऊँ कनारे बाड़ लगाई राखेया कि आऊँ निकल़ी नि सकदा; तिने आऊँ बड़े साँगल़ा साथे बानी राखेया; 8 आऊँ चींगी-चींगी की दुहाई देऊँआ, तेबे बी यहोवा मेरी प्रार्थना नि सुणदा; 9 ये एड़ा मानो कि तिने मेरी बाट कअड़े रे पात्थरा साथे रोकी राखी, तिने मेरी बाट बाँगी करी ती री। 10 यहोवा माखे बाटा दे ताक लगाए रे पालूए ओर शेरो जेड़ा ए;

11 यहोवे आऊँ मेरी बाटा ते पुलाई ता ओर आऊँ फाड़ी ता; तिने आऊँ उजाड़ी ता रा। 12 ये एड़ा मानो कि परमेशरे धनुष चढ़ाई की आऊँ आपणे तीरो रा नशाणा बणाई राखेया। 13 ये एड़ा मानो कि तिने आपणे तीरो साथे मेरा दिल छेदी ता रा; 14 मेरे आपणे सारे लोक मां पाँदे आसोए ओर पूरा दिन मां पाँदे गाणे बणाई की गाओए, 15 परमेशरे आऊँ कठण दु:खो साथे परी ता ओर विष पल़्याई की रज्जाई ता रा। 16 ये एड़ा मानो कि तिने मेरे दाँद रोड़िया साथे तोड़ी ते ओर आऊँ स्वाई साथे टखी ता रा; 17 ओर आऊँ मनो ते उतारी की बिना कल्याणो रा करी ता रा; आऊँ कल्याण पूली गा रा; 18 इजी री खातर मैं आपणे आपू ते बोलेया, "माँदे तागत नि रई ओर मेरी उम्मीद जो यहोवे पाँदे थी, से टूटी गी री।" 19 ओ यहोवा मेरा दु:ख ओर पटकदे फिरना, मेरा विष पीणा याद कर! 20 आऊँ तिना रे बारे देई सोचदा रऊँआ, इजी ते मेरे प्राण टल़ने लगी रे। 21 पर आऊँ ये याद करूँआ, इजी री खातर माखे उम्मीद ए। 22 आसे खत्म नि ऊए; ये यहोवे री महान करूणा रा फल ए, कऊँकि तेसरी दया अमर ए। 23 से दया हर प्यागा खे नयी ऊँदी रओई; ओ यहोवा तेरी सच्चाई महान ए।

24 इजी री खातर मैं आपणे आपू ते बोलेया, "यहोवा मेरा इस्सा ए, इजी बजा ते मां तेस पाँदे उम्मीद राखणी।" 25 जो यहोवे खे न्याल़ोए ओर तेसगे जाओए, तिना खे यहोवा खरा ए। 26 इजी री खातर यहोवे ते उद्धार पाणे री उम्मीद राखी की, चुपचाप रणा खरा ए। 27 सबी मर्दो खे जवानिया रे कामो रा जूँगड़ा चकणा खरा ए। 28 सब कोई ये जाणी की कल्ला चुपचाप रओ कि परमेशरे ई तेस पाँदे ये बोज राखी राखेया; 29 से आपणा मूँ तूड़ा पाँदे राखो, क्या पता इदे कोई उम्मीद ओ कि यहोवा तिना री मताद करो; 30 से आदमी आपणी खाख आपणे बाणे वाल़े रिया तरफा खे फेरो ओर बेज्जती सयीन करदा रओ। 31 कऊँकि परमेशर आपणे माणूंआ खे सदा आपणे मनो ते उतारी की नि राखदा, 32 यहोवा चाए दु:ख बी देयो, तेबे बी आपणी बऊत करूणा रिया बजा ते आसा पाँदे दया बी करोआ; 33 कऊँकि से माणूंआ खे आपणे मनो ते ना तो दबांदा ओर ना दु:ख देंदा। 34 पूरी तरतिया रे बन्दिया खे पैरा निठे राखोआ, 35 केसी माणूंए रा अक्क परमपरदान परमेशरो सामणे मारना, 36 ओर केसी माणूंए रा मुकद्दमा बिगाड़ना, इना तीऊँ कामा खे परमेशर देखी नि सकदा। 37 जे परमेशरे आज्ञा नि दित्ती ओ, तेबे कुण ए कि वचन बोलो ओर से पूरा ऊई जाओ? 38 मुसीबत ओर कल्याण, दोनो परमपरदान परमेशरो री आज्ञा ते ई ओ ए? 39 इजी री खातर जिऊँदा माणूं कऊँ कुड़कुड़ाओ? ओर माणूं आपणे पापो रे दण्डो खे बुरा कऊँ मानो? 40 आसा खे आपणा चाल-चलण त्यानो दे परखणा चाईयो ओर यहोवे रिया तरफा खे फिरना चाईयो। 41 आओ, आसा खे स्वर्गो दे रणे वाल़े परमेशरो रिया तरफा खे त्यान लगाणा चाईयो ओर आथ फैलाई की बोलणा चाईयो, 42 ओ यहोवा, आसे तेसखे बोलिये, "आसे तो तेरे खलाफ पाप ओर बगावत करी राखी ओर तैं माफ नि कित्तेया। 43 तेरा गुस्सा आसा पाँदे ए, तूँ आसा पीछे पड़ी रा, तैं बिना तरस खाए आसा खे सजा देई राखी। 44 तैं आपू खे बादल़ो साथे केरी ला रा, ताकि तां तक प्रार्थना नि पऊँची सको। 45 तैं आसे जातिया-जातिया रे लोका बीचे कूड़ा-कबाड़ जेड़े ठराई राखे।* 46 म्हारे सारे दुश्मणे आसा पाँदे आपणा-आपणा मूँ फैलाई राखेया; 47 डर ओर गड्डा, उजाड़ ओर नाश, आसा पाँदे आई की पड़ी रे।" 48 कवि बोलोआ, "मेरे लोक कायी ते दे ए, ओर इजी ते मेरे आसू मेरिया आखी ते नदिया रे पाणिए जेड़े बह्ईणे लगी रे। 49 मेरी आखी ते लगातार आसू बह्यींदे रणे।" 50 ओ यहोवा मा तदुओ तक रोंदे रणा जदुओ तक तू स्वर्गो ते आसा रिया तरफा खे नि देखो; 51 मेरे यरूशलेम शईरो रिया सबी जवान जवाणसा रा आल देखी की मेरा दु:ख बढ़ोआ। 52 जो लोक बेकारो देई मेरे दुश्मण बणी रे, तिने निर्दयी ऊई की चिड़िया जेड़ा मेरा शिकार करी राखेया।* 53 तिने आऊँ जिऊँदा ई गड्डे दे सेटी ता की मेरी जिन्दगिया रा अन्त करने खे मां पाँदे पात्थर खसकेई सको; 54 मेरे सिरो पाँदा ते पाणी बह्यी गा, मैं आपणे आपू ते बोलेया, "आऊँ एबे नाश ऊईगा।" 55 ओ यहोवा, डूग्गे गड्डे ते मैं तांते प्रार्थना कित्ती कि मेरी मताद करो; 56 तैं मेरी सुणी ताकि जो दुहाई देई की आऊँ चींगदा रऊँआ, तिजी ते कान नि फेर! 57 जेबे मैं ताखे आका पाईया, तेबे तैं माखे ज्वाब दित्तेया, "डर नि!" 58 ओ यहोवा, तैं मेरा मुकद्दमा लड़ी की मेरे प्राण बचाई ले रे। 59 एबे ओ परमेशर, जो अन्याय मां पाँदे ऊई रा, से तैं देखी राखेया; तूँ मेरा न्याय कर। 60 जो बदला मेरे दुश्मणे मांते लया ओर जो योजना मेरे खलाफ कित्ती, से बी तैं देखी राखिया। 61 ओ यहोवा, जो योजना ओर निन्दा सेयो मेरे खलाफ करोए, सेयो बी तैं सुणी राखिया। 62 मेरे बिरोदिया रे वचन ओर जो कुछ सेयो मेरे खलाफ लगातार सोचोए, तूँ तिजी खे जाणेया। 63 तिना रा उठणा-बैठणा त्यानो दे देख; सेयो मां पाँदे गाणे बणाओए। 64 ओ यहोवा, तूँ मेरे दुश्मणा रे कामो रे मुताबिक तिना खे सजा दे। 65 तां तिना रा मन सुन्न करी देणा; तेरा स्राप तिना पाँदे ऊणा। 66 ओ यहोवा, "तां आपणे रोषो ते सेयो दुड़ाई-दुड़ाई की तरतिया पाँदा ते पूरी तरआ ते नाश करी देणे।"