1 लाणत ए तां नाश करने वाल़े पाँदे जो नाश नि कित्तेया गया था, लाणत ए तां विश्वासघातिये पाँदे, जेस साथे विश्वासघात नि कित्तेया! जेबे तूँ नाश करी चुकेगा, तेबे तूँ बी पूरी तरआ ते नाश कित्तेया जाणा ओर जेबे तूँ विश्वासघात करी चुकेगा, तेबे तां साथे बी विश्वासघात कित्तेया जाणा।* 2 ओ यहोवा, आसा लोका पाँदे दया कर, आसा री उम्मीद तूँ ई ए। तूँ आसा खे हर दिन मजबूत कर, ओर मुसीबता रे बखते म्हारा उद्धार करने वाल़ा बण। 3 म्हारे दुश्मण यहोवे री आवाज सुणदे ई नठीगे, तेरे उठदे ई दूजिया जातिया रे लोक ओरे-पोरे ऊईगे। 4 जिंयाँ टिड्डिया नज्जो खे चट करी देयोइया, तिंयाँ ई तुसा री लूट बी तुसा रे दुश्मणा चट करी देणी ओर जिंयाँ टिड्डिया फसला खे नाश करने खे अमला करोईया, तिंयाँ ई तिना बी तुसा पाँदे अमला करना।

5 यहोवा बऊत महान ए, से बऊत ऊच्चिया जगा स्वर्गो दे रओआ, यहोवे सिय्योन शईर न्याय ओर तर्मो साथे परी राखेया; 6 ओर उद्धार, बुद्धि ओर बऊत जादा ज्ञान तेरे दिना रा आधार ऊणा; यहोवे रा डर तेसरा तअन ऊणा। 7 देख, तिना रे शूरवीर* बारे चींगणे लगी रे, मेल करने वाल़े दूत ईंकी-ईंकी की रोणे लगी रे। 8 सारिया बाटा सूनिया पड़ी रिया, एबे तिना बाटा रिये लोक नि चलदे। तिने वादा तोड़ी ता, शईर तुच्छ जाणे, तिने माणूं कुछ नि समजे। 9 यहूदा प्रदेशो री तरती विलाप करदी ओर फूखी गी री; लबानोन पाह्ड़ो रे डाल़ सूकी गे रे ओर तिना पाँदे उदासी छायी गी री, शारोन पजणे वाल़ी जमीना रे बदले सापड़ी वाल़ी जमीना जेड़ा ऊईगा रा; बाशान ओर कर्मेलो रे बणा दे डाल़ो रे पत्ते अल़ने लगी रे।

10 यहोवा बोलोआ, "एबे मां उठणा, मां आपणा प्रताप दखाणा, एबे आऊँ लोका रिया तँईं महान ठईरना। 11 तुसे लोके बेकारो रे काम करी राखे। तुसा रे सूके काओ रा गर्भ रणा, तुसा ते पूऊ जमणा, तुसा री आत्मा आगी जेड़ी ऊई जाणी ओर तुसे फूकी देणे। 12 यहूदा रे दुश्मण फूखे रे चूने जेड़े ऊई जाणे, ओर बाड़ो जेड़े आगी दे फूके जाणे। 13 ओ दूर-दूर देशा रे लोको, सुणो कि मैं क्या करी राखेया? ओर तुसे बी जो नेड़े ए, मेरी तागत जाणी लो। 14 सिय्योनो रे पापी लोक डरी गे, जो परमेशरो खे नि मानदे तिना खे थुरनी छूटी गी; आसा बीचा ते कोई बी एड़ा नि ए जो प्रचण्ड आगी दे रयी सको। आसा बीचा ते कोई नि ये जो तेसा बल़ी रिया आगी दे जाणे दे बाद जिऊँदा रयी सकोआ, जो कदी नि बिजणी।"*

15 सेओ लोक ई एसा आगी ते बची सकोए जो तर्मो साथे चलोए ओर सीदी गल्ल बोलोए, जो अन्देरो रे फायदे ते नफरत करोए, जो रिश्वत नि लंदे, जो खूनो री गल्ल सुणने ते कान बन्द करी देओए ओर बुराई देखणे ते आखी बन्द करी देओए। सेई ऊच्ची जगा रे रणे। 16 से चट्टानी रे गढ़ो दे शरण लई की रणे, तिना खे खाणे खे रोटी ओर पीणे खे पाणी मिलणा।

17 तां आपणी आखी साथे राजा यहोवे खे तेसरी शोभा साथे देखणा ओर लाम्बा-चौड़ा देश देखणा।* 18 तां डरो रे दिन याद करने, लेखा लणे वाल़ा ओर कर तोली की लणे वाल़ा केयी रया? गुम्मटो रा गिणने वाल़ा केयी रया?* 19 जिना री कठण पाषा तूँ नि समजदा ओर जिना री बड़बड़ांदी जीबा री गल्ल तूँ नि समजी सकदा, सेयो निर्दयी लोक तां फेर नि देखणे। 20 म्हारे तार्मिक त्योआरो रे शईर सिय्योनो खे देख, तां आपणी आखी साथे यरूशलेम देखणा, से राम करने री जगा ओर एड़ा तम्बू ए जो कदी टाल़ेया नि जाणा, जेतेरा कोई बी खूँडा कदी नि पट्टेया जाणा ओर ना कदी कोई रस्सी टूटणी। 21 तेती महान यहोवा आसा रिया तँईं रणा, से बऊत बड़ी-बड़ी नदिया ओर नईरा री जगा ऊणा, जिदे म्हारे दुश्मण कदी नि चली सकणे ओर ना ई कोई युद्धो रा जाह्ज तिदे जाणा ओर ना दुश्मणा रा तागतबर जाह्ज तिसिये जाई सकणा। 22 कऊँकि यहोवा म्हारा न्यायी, यहोवा म्हारा परदान, यहोवा म्हारा राजा ए, तेस ई म्हारा उद्धार करना। 23 तेरी रस्सिया टीलिया ऊईगिया, सेयो मस्तूलो रिया जड़ा खे मजबूत नि राखी सकिया ओर ना तरपालो खे ताणी की राखी सकिया। तेबे दुश्मणा ते लूटी रिया चीजा छुड़ाई की बांडी तिया, लंगड़े लोक बी लूटा दे शामिल ऊए। 24 तेबे यरूशलेम शईरो दे रणे वाल़ेया केसी बी लोका नि बोलणा कि आऊँ बमार ए; ओर जो लोक तिदे बसणे, तिना रा पाप माफ करेया जाणा।