1 ओ यरूशलेमो रे सिपाईयो, मिली की आओ! त्यार ऊई जाओ, कऊँकि तुसारे दुश्मण तुसा पाँदे अमला करने लगी रे। सेयो शईरो रे चऊँ कनारे लड़ने खे त्यार ए। तिना इस्राएलो रे राजे रे मुंए पाँदे सोठे की बाणी। 2 ओ बेतलेहम शईर, एप्राता शईर, तूँ यहूदा दे एक खास शईर नि ऊई सकदा। पर तुसा बीचा ते मेरिया तँईं एक राजा निकल़ना जो इस्राएलो रा राजा ऊणा। तेसरा वंश तुसा रे देशो दे शुरूए रे साला तँईं खे जाओआ, ये बऊत पईले रे दिना तक जाओआ। 3 इजी री खातर तेस सेयो तेस बखतो तँईं खे छाडी देणे जदुए तक से जवाणस जो बच्चा जमणे री पीड़ा दे ए, बच्चा पैदा नि करी लो; तेबे तेसा रे बाकि पाई इस्राएलो रे लोका गे वापस आऊणे। 4 ओर तेस परमेशरो री दित्ती री शक्तिया ते ओर आपणे परमेशर यहोवे रे नाओं रे प्रतापो ते, सेयो चराणे ओर सेयो सयी-सलामत रणे, कऊँकि से तरतिया रे कूणे तक महान ठईरना। 5 से शान्तिया रा मूल़ ऊणा, जेबे अश्शूरी म्हारे देशो पाँदे अमला करोगे ओर म्हारे राजे रे मईलो दे पैर राखोगे, तेबे आसा तिना रे खलाफ सात गवाल़े, बल्कि आठ परदान माणूं खड़े करने।
छुटकारा ओर सजा
6 तिना अश्शूर देशो पाँदे राज करने खे आपणियां तलवारी रा इस्तेमाल करना। तिना निम्रोदो री जमीना पाँदे राज करना तिना तलवारी की जो अमला करने खे त्यार ए। अश्शूरो म्हारे बन्ने पार करने ओर आसा री जमीना पाँदे अमला करना। पर वादा कित्ते रे राजे आसे तिना ते बचाणे। 7 फेर बऊत जे लोका बीचे याकूबो रे बचे दे लोक तेल़ा री बुन्दा जेड़े ऊणे जो यहोवे रिया तरफा ते आई री ओ। सेयो काओ पाँदे बर्खा जेड़े ऊणे। सेयो लोका रे परोसे नि रणे। तिना केसी बी माणूंए ते उम्मीद नि राखणी। सेयो लोका रे परोसे नि रणे। 8 इस्राएलो रे बचे दे लोका देशा बीचे आपणी जगा लणी। सेयो बणो रे जानवरा बीचे एकी शेरो जेड़े ऊणे, पेडा ओर बाकरिया रे चूण्डो बीचे एक तागतबर जवान शेरो जेड़े, जेबे सेयो चलोए तो सेयो चपटोए ओर फाड़ोए ओर कोई बचाणे वाल़ा नि दिशदा। 9 तुसा इस्राएलो रे रणे वाल़ेया आपणे दुश्मण अराई देणे ओर सेयो पूरी तरआ ते नाश करी देणे।
10 यहोवा ईंयाँ बोलोआ, "तेस बखते मां तेरे कोड़े तां बीचा ते काई देणे ओर तेरे रथ नाश करने। 11 मां तेरे देशो रे शईर बी नाश करी देणे ओर तेरे किले बी टाल़ी देणे। 12 मां तेरे तंत्र-मंत्र नाश करने ओर तांदे जादू-टोणे फेर नि रणे। 13 मां तेरी कअड़ी रिया मूर्तिया ओर खम्बे, तां बीचा ते नाश करी देणे ओर तूँ बादो ते आपणी आथो री बणाई री चीजा री पूजा नि करी सकणे। 14 मां तेरी अशेरा नाओं री मूर्तिया तेरी जमीना ते पट्टी देणियां ओर तेसरे शईर नाश करने। 15 ओर कऊँकि मां बऊत गुस्से ऊणा, मां तिना सबी देशा रे लोका खे बी सजा देणी जिने मेरी गल्ल नि मानी।"