1 जेबे यीशु इना सबी गल्ला बोली चुके, तेबे आपणे चेलेया खे बोलणे लगे, 2 "तुसे जाणोए कि दो दिन बाद फसह रा त्योआर ए और माणूं रा पुत्र क्रूसो पाँदे चढ़ाणे रिया तँईं पकड़वाया जाणा।"

3 तेबे बड़े पुरोईत और लोका रे बुजुर्ग, कैफा नाओं रे प्रदान पुरोईतो रे आँगणो रे कट्ठे ऊए 4 और आपू बीचे बिचार करने लगे कि यीशुए खे तोखे रे पकड़ी की काई देऊँए। 5 पर सेयो बोलो थे, "त्योआरो रे बखते नि, केथी एड़ा नि ओ कि लोका बीचे हुड़दंग मची जाओ।"

6 जेबे यीशु बैतनिय्याह गांव रे शमौन कोढ़िए रे कअरे थे 7 तेबे एक जवाणस संगमरमरो रे पांडे री सुराइया रे मईंगा इत्र लयी की तिना गे आयी और जेबे सेयो रोटी खाणे बैठे रे थे, तेबे तेसे तिना रे सिरो पाँदे उलटाईता। 8 ये देखी की तिना रे चेले जल़ने लगे और बोलणे लगे, "एते इत्रो रा सत्यानाश कऊँ कित्तेया? 9 एस इत्रो खे खरे दामो रे बेची की कंगाल़ा खे बांडी सको थे।" 10 ये जाणी की यीशुए तिना खे बोलेया, "एसा जवाणसा खे तंग कऊँ लगी रे करने? एसे मां साथे पलाई करी राखी। 11 कंगाल़ तो तुसा साथे सदा रओए, पर आऊँ तुसा साथे सदा नि रणा। 12 तेसे मेरे शरीरो रे जो ये इत्र उलटाया, से मेरे दबाणे खे करी राखेया। 13 आऊँ तुसा खे सच्च लगी रा बोलणे कि सारी दुनिया रे जेती केथी बी ये सुसमाचार प्रचार ऊणा, तेती एस कामो री चर्चा तेसा री यादा रे ऊणी।"

14 तेबे यहूदा इस्करियोती जो बारा चेलेया बीचा ते एक था, तिने बड़े पुरोईतो गे जाई की बोलेया, 15 "जे आऊँ तिना खे तुसा रे आथो रे पकड़वाई देऊँ तो माखे क्या देणा?" तिने तेसखे तीई चाँदिए रे सिक्के तोली की देई ते। 16 तेबे से तेसी बखतो ते यीशुए खे पकड़वाणे रा मोका टोल़ने लगेया।

17 तेबे बिना सजेड़े री रोटिया रे त्योआरो रे पईलके दिने चेले आयी की यीशुए ते पूछणे लगे, "तुसे केयी चाओए कि आसे तुसा खे फसह रे त्योआरो री रोटी खाणे री त्यारी करिए?" 18 यीशुए बोलेया, "नगरो रे अमुक नाओं रे माणूंए गे जाओ और तेसखे बोलो कि गुरू बोलोआ कि मेरा बखत नेड़े ए, मां आपणे चेलेया साथे तेरे कअरे ये फसह रा त्योआर मनाणा।" 19 तेबे चेलेया यीशुए री आज्ञा मानी और फसह रे त्योआरो री रोटी त्यार कित्ती।

20 जेबे साँज ऊई तेबे सेयो आपणे बारा चेलेया साथे रोटी खाणे बैठे। 21 जेबे सेयो खाणे लगी रे थे तेबे तिने बोलेया, "आऊँ तुसा खे सच्च लगी रा बोलणे कि तुसा बीचा ते एकी जणे आऊँ पकड़वाणा।" 22 ये सुणी की सेयो बऊत दु:खी ऊईगे और सब तिना ते पूछणे लगे, "ओ गुरू! क्या से आऊँ ए?" 23 तिने ज्वाब दित्तेया, "जिने मां साथे थाल़िया रे आथ पाई राखेया, तेस आऊँ पकड़वाणा। 24 आँऊ माणूं रा पुत्र पक्का ई मारेया जाणा जेड़ा मेरे बारे रे पवित्र शास्त्रो रे लिखी राखेया, पर तेस माणूंए खे हाय, जेस आऊँ पकड़वाणा। तेस माणूंए खे खरा था कि से जमदा ई नि।" 25 तेबे तिना खे पकड़वाणे वाल़े यहूदे बोलेया, "ओ गुरू! क्या से आऊँ ए?" तिने तेसखे बोलेया, "तूँ आपू ई बोली चुकेया।"

26 जेबे सेयो खाणे लगी रे थे, तेबे यीशुए रोटी लयी और आशीष मांगी की तोड़ी और चेलेया खे दित्ती और बोलेया, "लओ खाओ; ये मेरा शरीर ए।" 27 तेबे तिने कटोरा लयी की धन्यवाद कित्तेया और तिना खे देई की बोलेया, "तुसे सब एते बीचा ते पियो। 28 कऊँकि ये वाचा रा मेरा से खून ए, जो बऊत जणेया रे पापो री माफिया खे बाह्या जाओआ। 29 आऊँ तुसा खे सच्च बोलूँआ कि मां अँगूरा रा रस तेस दिनो तक फेर कदी नि पीणा, जदुओ तक तुसा साथे आपणे पिते रे राज्य रे नया नि पीऊँ।" 30 तेबे सेयो पअजन गायी की जैतूनो रे पाह्ड़ो पाँदे गए।

31 तेबे यीशुए तिना खे बोलेया, "तुसा सबी आजी राती मेरे बारे रे ठोकर खाणी; कऊँकि लिखी राखेया, ‘मां गाद्दी काणे और चूण्डा रिया पेडा ओरे-पोरे ऊई जाणिया।’ 32 पर मरे रेया बीचा ते जिऊँदे ऊणे ते बाद, मां तुसा ते पईले गलीलो खे जाणा।" 33 ये सुणी की पतरसे तिना खे बोलेया, "चाए सब तुसा रे बारे रे ठोकर खाओ तो खाओ, पर मां कदी नि खाणी।" 34 यीशुए तेसखे बोलेया, "आऊँ ताखे सच्च लगी रा बोलणे कि आज राती मुर्गे री बांग देणे ते पईले, तूँ तीन बार माखे जाणने ते मुकरी जाणा।" 35 पतरसे तिना खे बोलेया, "जे माखे तुसा साथे मरना बी पड़ोगा, तो बी मां कदी ना नि करनी" और सबी चेले बी एड़ा ई बोलेया।

36 तेबे यीशु आपणे चेलेया साथे गतसमनी नाओं री जगा रे आए और आपणे चेलेया खे बोलणे लगे, "एथी बैठे रे रणा, जदुओ तक आऊँ तेती जाई की प्रार्थना करुँ।" 37 सेयो पतरस और जब्दिए रे दोनो पाऊए खे साथे लईगे और उदास और बेचैन ऊणे लगे। 38 तेबे यीशुए तिना खे बोलेया, "मेरा जिऊ बऊत उदास ए, एथो तक कि मेरे प्राण निकल़ने लगी रे; तुसे एथी रूको और मां साथे जागदे रओ।" 39 तेबे सेयो थोड़ी जी आगे चली की मुंओ रे पारे रूड़ी गे और ये प्रार्थना करने लगे, "ओ मेरे पिता! ऊई सको तो ये दुःख मांगा गे ते टल़ी जाओ, पर तेबे बी जेड़ा आऊँ चाऊँआ, तेड़ा नि, पर जेड़ा तुसे चाओए तेड़ा ओ।" 40 तेबे जेबे सेयो वापस आए तो चेले सऊणे लगी रे थे, तेबे तिने पतरसो खे बोलेया, "क्या तुसे मां साथे एक कअड़ी पनि जागी सके? 41 जागदे रओ और प्रार्थना करदे रओ कि केथी तुसे परीक्षा रे नि पड़ी जाओ; आत्मा तो त्यार ए, पर शरीर कमजोर ए।" 42 फेर तिने दूजी बार जाई की प्रार्थना कित्ती, "ओ मेरे पिता! जे ये मेरे पीणे ते बिना नि आटी सकदा, तो तुसा री इच्छा पूरी ओ।" 43 तेबे फेर जेबे सेयो आए तो तिने आपणे चेले सए रे पाए, कऊँकि तिना री आखी रे नींज थी। 44 तिना खे छाडी की सेयो फेर चली गे और तिना ई शब्दा ते तिने तीन बार प्रार्थना कित्ती। 45 तेबे यीशुए चेलेया गे आयी की बोलेया, "एबे सऊँदे रओ और राम करो। देखो, से कअड़ी आईगी री कि आँऊ माणूं रा पुत्र पापिया रे आथे पकड़वाणे वाल़ा ए। 46 उठो, चलो, देखो, माखे पकड़वाणे वाल़ा नेड़े आईगा रा।"

47 यीशु ये बोलणे ई लगी रे थे तदुओ कि यहूदा, जो बारा चेलेया बीचा ते एक था, आया और तेस साथे बड़े पुरोईत और लोका रे बुजुर्गा री तरफा ते एक बड़ी पीड़, तलवार और डण्डे लयी की आयी। 48 तिना खे पकड़वाणे वाल़े तिना खे बताईता था कि, "जेसखे आऊँ नमस्ते करुँ और गल़े लगूँ, सेई ऊणा और तुसे से पकड़ी की लई जाणा।" 49 तेबे तिने फटाफट यीशुए गे आयी की बोलेया, "ओ गुरू!" और तेसखे नमस्ते कित्ती और गल़े लगेया। 50 यीशुए तेसखे बोलेया, "ओ दोस्त! जेते कामो खे तूँ आयी रा तेस कर।" तेबे तिने नेड़े आयी की यीशु पकड़ी ले। 51 तेबे यीशुए रे चेलेया बीचा ते एकी जणे आथ आगे करी की आपणी तलवार खिंजी ली और प्रदान पुरोईतो रे एकी दासो पाँदे चलाई और तेसरा कान ऊड़ाई ता। 52 तेबे यीशुए तेसखे बोलेया, "आपणी तलवार म्यानो रे राखी दे, कऊँकि जो तलवार चलाओए, तिना रा तलवारी साथे नाश ऊणा। 53 क्या तूँ नि जाणदा कि आऊँ आपणे पिते ते बिनती करी सकूँआ और सेयो आपणे स्वर्गदूतो रिया बारा पल़टणा ते बी जादा एबु मांगे पेजी सकोए? 54 पर पवित्र शास्त्रो रिया गल्ला कि ईंयां ई ऊणा जरूरी ए, किंयाँ पुरिया ऊणिया।" 55 तेस बखते यीशुए पीड़ा खे बोलेया, "क्या तुसे माखे डाकू समजोए कि तलवारी और डण्डे लयी की माखे पकड़ने आयी रे? आऊँ रोज मन्दरो रे बैठी की उपदेश देऊँ था, तेबे तुसे कऊँ नि पकड़ेया? 56 पर ये सब तेबे ऊआ ताकि भविष्यबक्ते रे वचन पूरे ओ" और सब चेले तिना खे छाडी की नठीगे।

57 तेबे यीशुए खे पकड़ने वाल़े तिना खे कैफा नाओं रे प्रदान पुरोईतो गे लईगे। जेती शास्त्री और बुजुर्ग कट्ठे थे ऊए रे। 58 पतरस दूरो तेई तिना ते पीछे-पीछे प्रदान पुरोईतो रे आँगणो तक गया और पीतरे जाई की अन्त देखणे खे प्यादेया साथे बैठी गा। 59 बड़े पुरोईत और सारी बड़ी सभा यीशुए खे काणे रिया तँईं चूठी गवाई सोचणे लगी रे थे। 60 पर बऊत चूठे गवा आए, पर तेबे पनि मिली। 61 बादो ते दो जणेया आयी की बोलेया, "इने बोली राखेया कि आऊँ परमेशरो रे मन्दरो खे टाल़ी सकूँआ और तीजे दिने दूजा बणाई सकूँआ।"

62 तेबे प्रदान पुरोईते खड़े ऊई की बोलेया, "क्या तूँ कोई ज्वाब नि देणा चांदा? यो लोक तेरे बारे रे क्या गवाई लगी रे देणे?" 63 पर यीशु चुप रए। तेबे प्रदान पुरोईते तिना खे बोलेया, "आऊँ ताखे जिऊँदे परमेशरो री कसम देऊँआ कि जे तूँ परमेशरो रा पुत्र मसीह ए तो आसा गे बोली दे।" 64 यीशुए तेसखे बोलेया, "तैं आपू ई बोली ता; बल्कि आऊँ तुसा खे ये बी बोलूँआ कि आजो ते तुसा आँऊ माणूं रा पुत्र, सर्वशक्तिमानो रे दाँणे कनारे और सर्गो रे बादल़ा पाँदे आऊँदे ऊए देखणा।" 65 तेबे प्रदान पुरोईते आपणे टाल्ले फाड़े और बोलेया, "इने परमेशरो री निन्दा करी राखी, एबे आसा खे गवाओ री क्या जरूरत ए। देखो, तुसे एबु ये निन्दा सुणी राखी। 66 तुसे क्या सोचोए?" तिने ज्वाब दित्तेया, "ये तो काणे जोगा ए।" 67 तेबे तिने यीशुए रे मुंओ पाँदे थूकेया और तिना खे मुक्के बाए और किने तो थप्पड़ बाए और बोलेया, 68 "ओ मसीह, आसा खे भविष्यबाणी करी की बोल कि तांदे किने बाई?"

69 पतरस बारे आँगणो रे बैठे रा था, तेबे एक दासी तेसगे आयी और बोलेया, "तूँ बी तो यीशु गलीलीए साथे था?" 70 तेबे से सबी सामणे मुकरी गा और तिने बोलेया, "आऊँ नि जाणदा कि तूँ क्या लगी री बोलणे।" 71 जेबे से बारे देऊल़िया गे चली गा, तेबे दूजी दासिये बी तेसखे देखी की जो तेती थे तिना खे बोलया, "ये बी तो यीशु नासरियो साथे था।" 72 पतरसे फेर कसम खाई की बोलेया, "आऊँ एस माणूंए खे नि जाणदा।" 73 थोड़ी देर बाद लोके जो तेती खड़ी रे थे, तिने पतरसो गे आयी की तेसखे बोलेया, "सच्ची तूँ बी तिना बीचा ते एक ए, कऊँकि तेरी पाषा तेरा पेत बताओई।" 74 तेबे से आपू खे कोसणे लगेया और कसम खाणे लगेया, "आऊँ एस माणूंए खे नि जाणदा" और तेबुई मुर्गे बांग दित्ती। 75 तेबे पतरसो खे यीशुए री गल्ल याद आयी कि, "मुर्गे री तीन बार बांग देणे ते पईले तां मेरे बारे रे जाणने ते ना करनी," तेबे से बारे जाई की फुटी-फुटी की रोणे लगेया।