Ezequiel 12

गुलामिया दे जाणे री नशाणी

1 तेबे यहोवे रा एक ओर सन्देश मांगे पऊँचेया, तिने बोलेया, 2 "ओ नाश ऊणे वाल़े माणूंआ, तूँ एड़ेया लोका बीचे रएया जो बिद्रोह करदे रओए, तिना रे आखी तो आईया, पर से नि देखदे जो आऊँ चाऊँ था कि सेयो देखो, तिना रे सुणने खे कान तो आए, पर से सुणना नि चाँदे जो आऊँ तिना खे सुनाणा चाऊँआ, कऊँकि सेयो बिद्रोह करने वाल़े लोक ए।*12:2 मर. 8:18, रोम. 11:8 3 इजी री खातर ओ नाश ऊणे वाल़े माणूंआ, दिने गुलामिया रा समान त्यार करी की तिना सामणे उठी जाया, तिना सामणे आपणी जगा छाडी की दूजी जगा खे जाया। पले ई सेयो बिद्रोह करने वाल़े लोक ए, तेबे बी क्या पता सेयो त्यान देयो कि तूँ क्या दखाणा चाएया। 4 इजी री खातर तैं दिने तिना सामणे कैद करी की निया दा समान निकयाल़ना ओर तेबे तैं साँजके बखते गुलामिया रे जाणे वाल़े जेड़े तिना सामणे उठी जाणा। 5 जेबे सेयो लोक ताखे देखणे लगी रे ओ तेबे तैं आपणे कअरो री कांदा दे एक बड़ा छेद करना ओर आपणा सारा समान तेते छेदो रिये बारे काडणा ओर तैं बी बारे निकल़ी की चली जाणा। 6 तिना लोका रे सामणे ई आपणा समान कांदा पाँदे चकी की न्हेरे दे बारे निकल़ना ओर आपणा मूँ टाल्ले की टखी की राखणा, ताकि ताखे जमीन नि दिशो। एड़ा करने रे जरिये तां इस्राएलो रे लोका खे आऊणे वाल़े खतरे रे बारे दे नशाणी ऊणा।" 7 इजी री खातर जेड़ी यहोवे माखे आज्ञा दित्ती तिजी रे ई मुताबिक मैं कित्तेया। दिने मैं आपणा समान गुलामा रे समानो जेड़ा काडेया ओर साँजा आपणे आथो साथे आपणे कअरो री कांदा दे छेद कित्तेया, तेबे न्हेरे दे आपणा समान निकयाल़ी की, तिना सामणे कांदा पाँदे चकी की चली गा। 8 आगली प्यागा यहोवे रा ये सन्देश मांगे पऊँचेया, 9 "ओ नाश ऊणे वाल़े माणूंआ, क्या इस्राएलो रे कराने, मतलब बगावत करने वाल़े तिने कराने तांते नि पूछेया कि तूँ ये क्या करने लगी रा?" 10 तूँ तिना खे बोल, "परमेशर यहोवा ईंयाँ बोलोआ कि इना कामा दे यरूशलेमो रे राजा सिदकिय्याह ओर इस्राएलो रे सारे लोका खे एक सन्देश देई राखेया ए।" 11 तूँ तिना खे बोल, "मैं जो करी राखेया से तुसा खे नशाणी ए, जेड़ा मैं करी राखेया, तेड़ा ई इस्राएली लोका साथे बी ऊणा, तिना खे उठी की गुलामिया दे जाणा पड़ना।" 12 यरूशलेम शईरो रा राजा सिदकिय्याह सांजा रे बखते न्हेरे दे आपणा समान कांदा पाँदे चकी की चली जाणा। तेसरे सेवका शईरो री दवाला दे एक बड़ा छेद करना ओर तेस तिसिये बारे आपणा समान निकयाल़ी लणा। तेस आपणा मूँ टाल्ले साथे टखी की राखणा ताकि दूजे लोक तेसखे पछयाणी नि सको। 13 परमेशर बोलोआ, "पर मां तेसखे जाल़ बछाणा ओर से तिदे फसी जाणा, तेबे मां से बेबीलोन शईरो दे लई जाणा, जेती से अन्दा ऊई की मरी जाणा। 14 जितणे तेसरे मतदगार तेसरे नेड़े-तेड़े ऊणे, सेयो ओर तेसरी सारी टोलिया मां सारी दिशा दे तित्तर-बित्तर करी देणियां ओर दुश्मणा तलवार लई की तिना रा पीछा करना। 15 जेबे मां सेयो जातिया-जातिया बीचे तित्तर बित्तर करी देणे ओर देशो-देशो दे लग-लग करी देणे, तेबे यरूशलेमो रे लोका खे पता लगी जाणा कि आऊँ ई यहोवा ए। 16 पर मां तिना बीचा ते थोड़े जे लोक बचाई लणे। सेयो तलवार, पूख ओर बमारिया ते नि मरने। जेबे सेयो तिना दूजे देशा रे लोका बीचे रणे तेबे तिना खे पता लगी जाणा कि तिने बुरे काम करी राखे। ओर तिना जाणी लणा कि आऊँ ई यहोवा ए।"

थरथरांदे ऊए भविष्यवक्ता रा नशाण

17 तेबे यहोवे रा ये सन्देश मांगे पऊँचेया तिने बोलेया, 18 "ओ नाश ऊणे वाल़े माणूंआ, तैं डरदे ऊए आपणी रोटी खाणी ओर डरदे ओर कांबदे ऊए आपणा पाणी पीणा; 19 फेर इस्राएलो रे लोका खे ये बोलणा कि परमेशर यहोवा यरूशलेम ओर इस्राएलो रे पूरे देशो दे रणे वाल़ेया लोका रे बारे दे ईंयाँ बोलोआ, तिना आपणी रोटी ओर पाणी पींदे बखते डरना ओर कांबणा। तिना रे दुश्मणो तिना री जमीन एड़ी नाश करी देणी की तिदे कुछ पनि बचणा। एड़ा इजी बजा ते ऊणा कऊँकि तेती रणे वाल़ेया सबी लोके बुरे काम करी राखे। 20 यहोवे बसे दे यहूदा रे शईर उजाड़ी देणे ओर फसल उपजाणे वाल़ी जमीन बी उजाड़ पड़ी जाणी, तेबे तुसा लोका खे पता लगी जाणा कि आऊँ ई यहोवा ए।"

नाश नेड़े आ

21 तेबे यहोवे रा वचन माखे मिलेया। ओर तिने बोलेया, 22 "ओ नाश ऊणे वाल़े माणूंआ, ये केड़ी कआवत ए जो तुसे लोक इस्राएलो रे देशो दे बोलेया करोए, दिन जादा ऊईगे रे ओर दर्शणो री कोई गल्ल पूरी नि ऊई? 23 तिना लोका खे बोल, परमेशर यहोवा ईंयाँ बोलोआ: मां ये कआवत बन्द करनी ओर ये कआवत इस्राएलो पाँदे फेर नि चलणी ओर तूँ तिना खे बोल कि से दिन नेड़े आई गा रा ओर दर्शणो रिया सब गल्ला पुरिया ऊणे वाल़िया ए, 24 एबे से चूठे भविष्यबक्ता इस्राएली लोका खे चूठे दर्शण या एड़ी भविष्यबाणी नि बताई सकणे जो लोका खे खुश करने री कोशिश करोए। 25 कऊँकि आऊँ यहोवा ए, जेबे आऊँ बोलूँ, तेबे जो वचन आऊँ बोलूँ, से पूरा ऊई जाणा, से बऊत जल्दी पूरा ऊणे वाल़ा ए। समजी लो, तुसे जो मेरी गल्ल मानणे ते ना करोए, तो मां ये तुसा रे जिऊँदे जिऊए पूरा करना। मां से सब पूरा करना जो मैं बोली राखेया, परमेशर यहोवे री येई बाणी ए।" 26 तेबे यहोवे रा ये सन्देश माखे मिलेया, 27 "ओ नाश ऊणे वाल़े माणूंआ, देख, इस्राएलो रे लोक ईंयाँ बोलणे लगी रे कि जो दर्शण से देखोआ, से कई दिन बाद पूरा ऊणे वाल़ा ए ओर से दूरो रे बखतो रे बारे दे भविष्यबाणी करोआ। 28 इजी री खातर तूँ तिना खे बोल, परमेशर यहोवा ईंयाँ बोलोआ: मेरे केसी वचनो रे पूरा ऊणे रे फेर देरी नि ऊणी, बल्कि जो वचन आऊँ बोलूँगा, से छोड़ ई पूरा ऊणा, परमेशर यहोवे री येई बाणी ए।"