Ezequiel 25

अम्मोनी लोका रे खलाफ न्याय

1 यहोवे रा ये सन्देश माखे फेर मिलेया, 2 "ओ नाश ऊणे वाल़े माणूंआ, अम्मोनिया रिया तरफा खे मूँ करी की तिना रे बारे दे भविष्यबाणी कर। 3 अम्मोनिया खे बोल, परमेशर यहोवे रा वचन सुणो, परमेशर यहोवा ईंयाँ बोलोआ, तुसे जो मेरे पवित्र मन्दरो रे बारे दे, जेबे से अपवित्र कित्तेया ओर इस्राएल देशो रे बारे दे जेबे से ऊजड़ी गा ओर यहूदा रे कराने रे बारे दे जेबे सेयो तिना रे दुश्मणे गुलामिया दे निए, वा! वा! बोलेया! 4 इजी बजा ते देखो, आऊँ तुसा खे पूर्बो रे रेगिस्तानो रिया जनजातिया रे कब्जे दे करने वाल़ा ए ओर तिना तुसा बीचे आपणे डेरे लगाणे ओर आपणे कअर बनवाणे; तिना फल खाणे ओर आपणे डांगरा रा दूद पीणा जो तुसा रा ऊणा चाईयो था। 5 ओर मां तुसा री राजधानी रब्बा शईर ऊँटा खे रणे खे ओर अम्मोनिया रे देश पेडा-बाकरिया रे बैठणे री जगा करी देणियां; तेबे तुसा जाणी लणा कि आऊँ यहोवा ए।" 6 कऊँकि परमेशर यहोवा ईंयाँ बोलोआ, "तुसे जो इस्राएलो रे कराने रिया बजा ते चाड़िया बजाईया ओर नाचे ओर आपणे सारे कमण्डो रिया बजा ते मनो दे खुशी मनाई, 7 तो सुणो, एबे मां तुसा खे सजा देणी। मां दूजे देशा रे लोका खे तुसा रिया सारिया कीमती चीजा लई जाणे देणियां। मां तुसे पूरी तरआ ते रचाई देणे ताकि तुसे एबे एक देश नि रई जाओ। मां तुसे नाश करी देणे। तेबे तुसा जाणी लणा कि आऊँ ई यहोवा ए।"

मोआबी लोका रे खलाफ न्याय

8 परमेशर यहोवा एड़ा बोलोआ, "मोआब ओर सेईर शईरो रे लोक जो बोलोए, देखो, यहूदा रा कराना ओरी सबी जातिया जेड़े ऊईगे रे। 9 इजी बजा ते देख, मोआब देशो रे कनारले सबी ते खास शईर बेत्यशीमोत, बाल्मोन ओर किर्यातैम, जो तेस देशो रे सुन्दर ए, मां तिना रिया बाटा खोली की, 10 मां पूर्ब देशो रे लोक मोआब ओर अम्मोनो पाँदे जीत दलाणे जोगे बनाणे। मतलब मां एड़ा करना कि अम्मोन एबे ओरी देशा याद तक नि करना। 11 ईंयाँ मां मोआबो खे बी सजा देणी ओर तिना जाणी लणा कि आऊँ ई यहोवा ए।"

एदोमो रे लोका रे खलाफ न्याय

12 परमेशर यहोवा ईंयाँ बी बोलोआ, "एदोमे जो यहूदा रे लोका ते बदला लया ओर तिना ते बदला लई की बड़ा दोषी ऊईगा रा, 13 इजी बजा ते परमेशर यहोवा ईंयाँ बोलोआ, मां एदोम देशो रे लोका खे सजा देणी ओर तेथो रे सब माणूं ओर सब जानवर कायी देणे। मां से तेमान शईरो ते लई की ददान शईरो तक उजाड़ करी देणा ओर लोक लड़ाईया दे काये जाणे। 14 मां आपणे इस्राएली लोका रे जरीये एदोमो रे लोका ते आपणा बदला लणा ओर तिना तेते देशो दे मेरे रोष ओर कोपो रे मुताबिक काम करना। तेबे तिना खे मेरे बदले रा पता लगी जाणा, परमेशर यहोवे री येई बाणी ए।"

पलिश्ती जातिया रे खलाफ न्याय

15 परमेशर यहोवा ईंयाँ बोलोआ, "कऊँकि पलिश्ती लोके यहूदा रे लोका ते बदला लया, बल्कि आपणे बऊत बखतो ते पईलकी दुश्मणिया री बजा ते आपणे मनो रे कमण्डो ते बदला लई कि नाश कित्ते, 16 ओर इजी री खातर मैं पक्का करी ला दा ए कि मां पलिश्तिया पाँदे अमला करना ओर करेती लोक नाश करी देणे। मां पलिश्ती लोक जो भूमध्य समुद्रो रे कनारे बची रे सब मैदानो दे नाश करी देणे। 17 मां रोषो दे आई की मुकद्दमा लड़ी की, पलिश्तिया रे खलाफ कड़क ऊई की बदला लणा ओर जेबे मां तिना ते बदला लई लणा, तेबे पलिश्तिया जाणी लणा कि आऊँ ई यहोवा ए।"