Ezequiel 29

मिस्रो रे खलाफ भविष्यबाणी

1 दसुए सालो रे दसुए मीन्ने रे बारूए दिने यहोवे रा ये सन्देश माखे फेर मिलेया, 2 "ओ नाश ऊणे वाल़े माणूंआ, आपणा मूँ मिस्र देशो रे राजा फिरौनो रिया तरफा खे करी की तेसरे ओर सारे मिस्रो रे खलाफ भविष्यबाणी कर" 3 तिना ते गल्ला कर ओर ईंयाँ बोल, परमेशर यहोवा ईंयाँ बोलोआ, "ओ मिस्र देशो रे राजा फिरौन, आऊँ तेरे खलाफ ए, ओ बड़े शईर, तूँ जो आपणी नील नदिया बीचे पड़ेया दा मगरमच्छ ए, तूँ बोलेया, नील नदी मेरी आपणी ए ओर मैं से आपणियां तँईं बणाई राखी।" 4 मां तेरे मुंए दे कांडा पाई की तूँ पकड़ी लणा। मां तेरी नदिया रिया मछलिया तेरिया ताकड़िया दे लटकाई देणियां। मां तूँ तिना सबी मछलिया समेत नदिया ते बारे खिंजी की लई आऊणा। 5 तेबे मां तूँ तेरी सारी मछलिया समेत उजाड़ जगा दे सेटी देणा। तूँ मैदानो रे पड़ेया रा रणा। तूँ ना तो केसी चकणा ओर ना तूँ कब्रा दे राखणा। मैं तूँ बणो रे डांगर ओर पंछिया खे खाणे खे देई देणा। 6 तेबे मिस्रो रे सबी रणे वाल़ेया खे पता लगी जाणा कि आऊँ ई यहोवा ए। यहोवा बोलोआ, "इस्राएलो रे लोके मतादा रिया तँईं तुसा मिस्रिया पाँदे परोसा कित्तेया था, पर तूँ तिना रिया तँईं एक नंगल़ो जेड़ा था। 7 इस्राएलिये तूँ आपणे आथे की पकड़ी ला। पर तूँ तिना रे बोजे की टूटी गा। तैं तिना रिया कांदा छिली तिया। इस्राएलो रे लोक तेरा साअरा लणे खे तां पाँदे चुके, पर तूँ दो टुकड़े ऊईगा। ओर तिना री पीठ टुटी गी।" 8 इजी बजा ते परमेशर यहोवा ईंयाँ बोलोआ, "ओ मिस्रो रे राजा, मां तां पाँदे तलवार चलाई की, मां तेरे सब माणूं ओर डांगर दोनो नाश करी देणे। 9 तेबे मिस्र देश उजाड़ ई उजाड़ ऊई जाणा ओर तिना खे पता लगी जाणा कि आऊँ ई यहोवा ए। तैं बोली राखेया कि मेरी नील नदी मेरी आपणी ई ए ओर से मैं ई बणाई राखी। 10 इजी बजा ते देख, आऊँ तेरे ओर तेरी नदिया रे खलाफ ए ओर मां मिस्र देश मिग्दोल शईरो ते लई की सवेने शईरो तक बल्कि कूश देशो रे बन्ने तक उजाड़ ई उजाड़ करी देणा। 11 केसी बी माणूंए मिस्रो दे पैर तक नि राखणा, ओर ना तीसिए जाणा। तेती केसी डांगरो रा पैर पनि पड़ना। से चाल़िया साला तक ऊजड़ पड़ेया दा रणा। 12 चाल़ी साल तक मां मिस्र देश उजड़े रे देशो बीचे उजाड़ करी की राखणा ओर तेथो रे शईर उजड़े रे शईरा बीचे खण्डहर ई रणे। मां मिस्री लोक जातिया-जातिया बीचे तित्तर-बित्तर करी देणे।" 13 परमेशर यहोवा ईंयाँ बोलोआ, "जेबे चाल़ी साल बीती जाणे तेबे मां मिस्री लोक तिना जातिया बीचा ते कट्ठे करने, जिना रे सेयो तित्तर-बित्तर ऊईगे थे; 14 ओर मां मिस्री लोक गुलामिया ते छुड़ाई की पत्रोस देशो दे, जो तिना री जन्मभूमि ए, फेर पऊँचाई देणे ओर तेती तिना रा छोटा जा राज ऊई जाणा। 15 मिस्र सबी राज्या बीचे छोटा ऊणा ओर तिना आपणा सिर ओरी जातिया बीचे नि चकणा; कऊँकि मां मिस्री लोक एड़े कम करी देणे कि तिना फेर ओरी जातिया पाँदे राज नि करी सकणा। 16 से फेर इस्राएलो रे कराने रे परोसे री बजा नि ऊणी, कऊँकि तिना जेबे फेर मतादा रिया तँईं तिना रिया तरफा खे देखणे लगणा, तेबे तिना, तिना रे पाप याद करने। तेबे इस्राएलो रे लोका खे पता लगी जाणा कि आऊँ ई परमेशर यहोवा ए।"

बाबेलो रे जरिये मिस्रो रा लूटेया जाणा

17 राजा यहोयाकीम ओर आसा खे बेबीलोनो दे गुलाम बणाई की लईगे दे सताई साल ऊईगे दे थे तीजी रे पईले मीन्ने रे पईले दिने यहोवे रा ये सन्देश माखे फेर मिलेया, 18 "ओ नाश ऊणे वाल़े माणूंआ, बाबेल देशो रे राजा नबूकदनेस्सरे सोर देशो खे केरने खे आपणी सेना ते बऊत मईणत कराई; हर एकी रा सिर गँजा ऊईगा ओर हर एकी रे फरकुआ री चामड़ी छिली गी; तेबे बी तेसखे सोर देशो ते ना तो इतणी जादा मईणती री मजदूरी मिली ओर ना तेसरी सेना खे।" 19 इजी बजा ते परमेशर यहोवा ईंयाँ बोलोआ, "देख, मां बाबेलो रे राजा नबूकदनेस्सरो खे मिस्र देश देई देणा ओर तेस तेथो रे लोक लई जाणे ओर तेथो री तअन-सम्पत्ति लूटी की आपणी करी देणी; मतलब येई मजदूरी तेसरी सेना खे मिलणी। 20 मैं तेसरी मईणता रे बदले तेसखे मिस्र देश इजी खे दित्तेया कऊँकि तिने ओर तिना री सेने मेरिया खातर काम कित्तेया था, परमेशर यहोवे री येई बाणी ए।" 21 जेस बखते मिस्र देश आरना तेस बखते मां इस्राएल फेर एक तागतबर देश बनाणा। तेबे मां ताखे तिना रिया तँईं एक सन्देश देणा। ओ यहेजकेल, तिना तेरिया गल्ला सुणनिया। तेबे इस्राएलिया खे पता लगी जाणा कि आऊँ ई यहोवा ए।