1 इजी ते बाद मैं जो दर्शण देखेया कि कुछ एड़ा जो सिंहासनो जेड़ा दिशोआ। ये नीलमणिया ते बणी रा था। ये छतो पाँदे था, ओर ये करूबा रे सिरो पाँदे था। रा 2 तेबे यहोवे तेस रेशमो रे टाल्ले पईने रे माणूंए खे बोलेया, "करूबा रे निठे कूमणे वाल़े टईरा बीचे जा। करूबा बीचे जल़ने लगी रे फेऊआ बीचा ते कुछ फेऊ चकी की आपणियां मुट्ठिया दे परी लो। फेर तिना खे यरूशलेम शईरो दे हर जगा दे सेटी दे।" तिने माणूंए तेड़ा ई कित्तेया, ओर आऊँ देखणे लगी रा था। 3 जेबे से माणूं मन्दरो दे दक्खणा रिया तरफा खे गया तो करूब मन्दरो रे पीतरे आँगणो दे खड़ी रे थे। ओर बादल़ पीतरले आँगणो दे फरेया रा था। 4 तेस बखते यहोवे रा तेज करूबा पाँदा ते उठी की मन्दरो री देऊल़ी पाँदे आई गा ओर मन्दरो दे बादल़ परी गा ओर से आँगण यहोवे रे तेजो साथे परी गा। 5 करूबा रे पंखा री छेड़ बऊत जादा थी। से छेड़ बारले आँगणो तक सुणने लगी री थी। से छेड़ सर्वशक्तिमान परमेशरो रिया आवाजा जेड़ी थी जेबे से बोलो था। 6 जेबे यहोवे रेशमो रे टाल्ले पईने रे माणूंए खे कूमणे वाल़े टईरा ते पीतरे करूबा बीचा ते आग लणे री आज्ञा दित्ती, तेबे से तिना बीचे जाई की एक टईरो गे खड़ा ऊईगा। 7 तेबे करूबा बीचा ते एकी करूबे आपणा आथ आगे करी की, तेते आगी बीचा ते जो करूबा बीचे थी, थोड़ी जी चकी की रेशमो रे टाल्ले पईने रे माणूंए रे मुट्ठूआ दे देईती ओर से आदमी तिजी खे लई की बारे चली गा। 8 करूबा रे पंखा निठे तो माणूंए रे आथो जेड़ा कुछ दिशो था। 9 तेबे मैं जो दर्शण देखेया कि करूबा गे चार टईर ए; मतलब एक-एक करूबो गे एक-एक टईर ए, ओर टईरा रा रूप फिरोजा रत्नो जेड़ा चमकीला जा ए। 10 तिना रा एड़ा रूप ए कि चारो एक जेड़े दिशोए, जेड़ा एक टईरो बीचे दूजा टईर ओ। 11 जेबे सेयो चार टईर चलो थे तेबे सेयो आपणे चऊँ कनारले पारो पाँदे चलो थे ओर चलदे बखते मुड़ो नि थे, बल्कि जेथो खे तिना रा सिर रओ था सेयो तेथो खे ई तेस पीछे चलो थे ओर सेयो चलदे बखते मुड़ो नि थे। 12 दुनी करूबा रे पूरे शरीरो पाँदे आखी थिया, तिना री पीठ, तिना रे आथ ओर तिना रे पंखा समेत करूबा रा सारा शरीर ओर जो टईर तिना रे थे, सेयो बी सारे के सारे चऊँ कनारे आखी साथे परे थे।* 13 मां सामणे इना टईरा खे चक्कर बोलेया, मतलब कूमणे वाल़े टईर। 14 हर एकी पंखो वाल़े करूबो रे चार-चार मूँ थे। एकी री शक्ल तो बल़दो जेड़ी थी, दूजे री शक्ल माणूंए जेड़ी थी, तीजे री शक्ल शेरो जेड़ी थी, ओर चौथे री शक्ल बाजो जेड़ी थी।* 15 करूब जमीना पाँदा ते ऊबे उठी गे। यो सेयो जानवर थे, जो मैं कबार नदिया गे देखे थे। 16 जेबे-जेबे सेयो करूब चलो थे ओर जेबे-जेबे करूब जमीना पाँदा ते उठणे खे आपणे पंख चको थे तेबे-तेबे टईर तिना गे ते नि मुड़ो थे। 17 जेबे सेयो करूब खड़े ओ थे तेबे यो बी खड़े ऊई जाओ थे ओर जेबे सेयो उठो थे तेबे यो बी साथे उठो थे, एड़ा इजी बजा ते ओआ था कऊँकि तिना प्राणिया री आत्मा टईरा दे रओ थी। 18 यहोवे रा तेज मन्दरो री देऊल़ी पाँदा ते उठी की करूबा पाँदे ठईरी गा। 19 तेबे करूब आपणे पंख चकी की मां सामणे तरतिया पाँदा ते उठी की निकल़ी गे ओर टईर बी तिना साथे-साथे गये ओर सेयो सब यहोवे रे मन्दरो रे पूर्बो रे बड़े द्वारो गे खड़े ऊईगे ओर इस्राएलो रे परमेशरो रा तेज तिना पाँदे ठईरेया दा रया। 20 यो सेयो ई जानवर ए जो मैं कबार नदिया गे इस्राएलो रे परमेशरो निठे देखे थे ओर माखे पता लगी गा कि सेयो बी करूब ए। 21 हर एकी प्राणिए रे चार मूँ, चार पंख थे, ओर हर एकी पंखो निठे माणूंए रे जे आथो जेड़ा कुछ दिशो था। 22 तिना करूबा रे मुंए री शक्ल सेईए जो मैं कबार नदिया रे कनारे पाँदे देखी थी ओर तिना रे मूँ ई क्या बल्कि तिना रा सारा शरीर बी तेड़ा ई था। सेयो सब सीदे आगे ई गये ओर सेयो मुड़े नि।