Ezequiel 44

पूर्बा रे दरवाजे रा इस्तेमाल

1 फेर दर्शणो दे से माणूं माखे मन्दरो रे बारले द्वारो गे लईगा, जो पूर्बो रिया तरफा खे था, पर बारला द्वार बन्द था। 2 तेबे यहोवे माखे बोलेया, "ये बड़े द्वार बन्द रओ ओर खोलणा नि; कोई एते ते ऊई की पीतरे नि जाओ; कऊँकि इस्राएलो रा परमेशर यहोवा एते रिये ऊई की पीतरे आई रा; इजी बजा ते ये सदा खे बन्द रणा चाईयो। 3 इस्राएलो रा परदान मेरिया तँईं चढ़ाए दे बलिदानो खे खाणे खे एती आई सकोआ। से बड़े द्वारो रे ब्रंडे रिये ऊई की पीतरे जाओ ओर इसिये ई ऊई की बारे निकल़ो।"

मन्दरो दे जाणे रे बारे दे

4 तेबे से उत्तरो रे बड़े द्वारो गे ऊई की माखे मईलो सामणे लईगा; तेबे मैं देखेया कि यहोवे री महिमा रा तेज तेसरे मन्दरो दे परी गा रा ए। ओर आऊँ डर ओर कबराणे रिया बजा ते थाले जमीना पाँदे लेटीगा।*44:4 प्रका. 15:8 5 तेबे यहोवे माखे बोलेया, "ओ नाश ऊणे वाल़े माणूंआ, त्यान देई की आपणी आखी साथे देख ओर जो कुछ आऊँ ताखे आपणे मन्दरो री सारी बिदिया ओर नियमो रे बारे दे बोलूँ, से सब आपणे कानो साथे सुण ओर मन्दरो रे सारे बड़े द्वार ओर पवित्र जगा दे सब जाणे वाल़ी बाटा पाँदे त्यान दे। 6 ओर तिना बिरोदिया खे, मतलब इस्राएलो रे कराने खे बोलणा, परमेशर यहोवा ईंयाँ बोलोआ: ओ इस्राएलो रे कराने, आपणे सारे घिनौने कामा ते एबे पीछे अटी जा। 7 तिने मेरा मन्दर अपवित्र करी राखेया ए, कऊँकि तिने बिना खतने रे परदेशी लोक मेरे मन्दरो दे आऊणे देई राखे जो मेरी आज्ञा खे नि मानदे, जेबे कि बलिया री चर्बी ओर खून माखे चढ़ाणे लगी रे थे। इजी री खातर मेरे लोके आपणे सारे बुरे कामा रिया बजा ते मेरी आज्ञा तोड़ी राखी।*44:7 यहे. 1:28 8 तुसे मेरी पवित्र चीजा री रक्षा नि कित्ती, पर तुसे आपणे ई मनो ते दूजिया जातिया रे लोक मेरी पवित्र जगा दे मेरी पवित्र चीजा री रक्षा करने खे ठराए। 9 इजी री खातर परमेशर यहोवा ईंयाँ बोलोआ: इस्राएलिया बीचे कोई दूजी जातिया रे लोक, बिना खतना कित्ते रे लोक ओर पापी लोका खे मेरे मन्दरो दे आऊणे री अनुमति नि ए। एथो तक कि कोई दूजी जातिया रे लोक जो तुसा बीचे काफी बखतो ते रओए, तिना खे बी मेरे मन्दरो दे आऊणे री अनुमति नि ए।"

लेवी, पुरोईत ऊणे खे लग कित्ते

10 यहोवे माखे बोलेया, "पर लेवी लोक जो तेस बखते मांते दूर ऊईगे थे, जेबे इस्राएली लोक माखे छाडी की आपणी मूर्तिया पीछे पटकी गे थे, तिना खे आपणे पापा री सजा जरूर मिलणी। 11 पर सेयो मेरे पवित्र मन्दरो दे सेवा करी सकोए। सेयो मन्दरो रे द्वारो पाँदे पईरा देणे वाल़े ऊई सकोए। सेयो तिना डांगरा खे कायी सकोए जिना खे लोक होमबलि ओर मेलबलिया खे ल्याओए। सेयो तिना लोका री मताद करी सकोए जो मेरी सेवा-टईल करने खे आओए।" 12 कऊँकि इने लेविये इस्राएलो रे लोका री सेवा-टईल कित्ती जेबे सेयो मूर्तिया री पूजा करो थे, ओर इस्राएलो रे लोक पापो दे फसाईते, इजी बजा ते मैं तिना रे बारे दे कसम खाई कि तिना लेविया आपणे पापा री सजा जरूर पाणी। परमेशर यहोवे री येई बाणी ए। 13 सेयो लेवी मेरे नेड़े नि आओ ओर ना मेरिया तँईं पुरोईता रा काम करो ओर ना मेरी केसी पवित्र चीजा खे या केसी बऊत पवित्र चीजा खे छुँईं सको, सेयो आपणी शर्मा रा ओर जो घिनौने काम तिने कित्ते, तिना रा बी पार चको। 14 तेबे बी मां सेयो मन्दरो री सम्बाल़ी री चीजा रे रक्षा करने वाल़े ठराणे; तिदे सेवा रा जितणा काम ओ ओर जो कुछ तिदे करना ओ, तेतेखे करने वाल़े सेयो ई ओ।

पुरोईत

15 तेबे लेवी पुरोईत जो सादोको रे कराने रे ए ओर जिने तेस बखते मेरी पवित्र जगा री रक्षा कित्ती जेबे इस्राएली मांगा गे ते पटकी गे थे, सिर्फ सादोक पुरोईतो रे परिवारो रे पुरोईत ई मेरे मन्दरो दे मेरी सेवा करो थे। इजी री खातर एबे सादोको रे वंशो रे माखे बलिया री चर्बी ओर खून चढ़ाई सकोए, परमेशर यहोवे री येई बाणी ए। 16 सेयो पुरोईत मेरे मन्दरो दे आया करो ओर मेरे मेजो गे मेरी सेवा-टईल करने खे आओ ओर मेरी चीजा री रक्षा करो। 17 जेबे सेयो पीतरले आँगणो रे बड़े द्वारो रिये ऊई की जाया करो, तेबे लीलणी रे टाल्ले पईनी की जाओ ओर जेबे सेयो तिदे सेवा-टईल करो, तेबे कोई ऊना रा टाल्ला नि पईनो। 18 सेयो सिरो पाँदे सणो रिया सुन्दर टोपिया पईनो ओर लको दे सणो रे कच्छे पईनो; सेयो आपणे लको रे एड़ा कोई रेशमो रा टाल्ला नि बानो जेते साथे परसीना आओआ। 19 जेबे सेयो पुरोईता रे टाल्ले पईनी की बारले आँगणो दे लोका गे निकल़ो, तेबे जिना टाल्ले पईनी की सेयो सेवा-टईल करोए, तिना खे खोली की ओर पवित्र कमरे दे राखी की आपणे रोजके टाल्ले पईनो, जेते कि लोक तिना रे टाल्लेया रिया बजा ते पवित्र नि ठईरो। 20 पुरोईत ना तो आपणा सिर गँजा कराओ ओर ना बाल़ लाम्बे ऊणे देयो; सेयो बस आपणे बाल़ छोटे करी की कटाओ। 21 पीतरले आँगणो रे जांदे बखते कोई पुरोईत शराब नि पियो। 22 सेयो बिदुआ या छाडी री जवाणसा साथे ब्या नि करो; बस इस्राएलो रे कराने रे कुलो बीचा ते कुआँरी या एड़ी बिदुआ साथे ब्या करो जो केसी पुरोईतो री जवाणस ऊई थी। 23 पुरोईत मेरी प्रजा खे पवित्र ओर अपवित्र रा फर्क सिखाया करो ओर शुद्ध ओर अशुद्ध रा फर्क बताया करो। 24 जेबे कोई मुकद्दमा ओ तेबे न्याय करने खे बी सेयो ई बैठो ओर मेरे नियमो रे मुताबिक न्याय करो। मेरे सारे ठराए रे त्योआरो रे बारे दे बी सेयो मेरे बिधान ओर बिधिया रा पालण करो ओर मेरे रामो रे दिनो खे पवित्र मानो। 25 पुरोईत केसी माणूंए री लाशा गे नि जाओ, एड़ा करने ते सेयो अशुद्ध ऊई जाणे। पर जे मरने वाल़ा माणूं तिना रा माये-बाओ, माठे-बेटी, पाई ओर एड़ी बईण जेसा रा ब्या नि ऊई रा ओ, सेयो तिना गे जाई की आपू खे अशुद्ध करी सकोए। 26 जे कोई पुरोईत लाशा खे छूँओ, तो से अशुद्ध ऊई जाओआ ओर तेसखे शुद्ध करने खे एकी बिधानो ते निकल़ना पड़ोआ। 27 ओर जेस दिने सेयो पवित्र मन्दरो दे, मतलब पीतरले आँगणो दे सेवा-टईल करने खे फेर जाओ, तेस दिन आपणियां तँईं पापबलि चढ़ाओ, परमेशर यहोवे री येई बाणी ए। 28 पुरोईता री एक ई आपणी जमीन ऊणी, मतलब तिना रा इस्सा आऊँ ईए; तुसे तिना खे इस्राएलो बीचे कोई एड़ी जमीन नि देणी, जो तिना री आपणी ऊई जाओ; तिना री आपणी जमीन आऊँ ईए। 29 एतेरे बजाये तिना खे नज्जो री बलिया रा इस्सा मिलणा चाईयो साथे ई पापबलि ओर दोषबलिया दे बी इस्सा मिलणा चाईयो। 30 सब प्रकारा री सबी ते पईली उपज ओर सब प्रकारा री चकी री पेंट जो तुसे चकी की चढ़ाओ, पुरोईता खे मिलेया करो ओर नये नज्जो रा पईला बाटेया रा आटा बी पुरोईता खे देया करना, जेते कि तुसा लोका रे कअरो दे आशीष ओ।*44:30 लेवी. 26:10 31 पुरोईता खे एड़ा कोई बी पंछी या डांगर नि खाणा चाईयो जो आपू मरी रा ओ या से किने ओरी जानवरे कायी राखेया ओ।*44:31 लेवी. 22:8