Ezequiel 32

फिरौन ओर मिस्र देशो रिया तँईं शोग

1 म्हारे गुलामिया दे गये रे बारूए सालो रे बारूए मीन्ने रे पईले दिने यहोवे रा ये सन्देश माखे फेर मिलेया, 2 "ओ नाश ऊणे वाल़े माणूंआ, मिस्रो रे राजा फिरौनो रे बारे दे शोगो रा गाणा बणाई की तेसखे सुणा, जातिया-जातिया दे तेरी उपमा जवान शेरो साथे दित्ती थी, पर तूँ समुद्रो रे मगरमच्छो जेड़ा ए; तुसे पाणिए खे आपणे पैरा साथे गाऊदल़ा करोए। तुसा रिया नदिया रा पाणी गन्दा ऊई जाओआ।" 3 परमेशर यहोवा ईंयाँ बोलोआ, "मां बऊत सारी जातिया री सभा रे जरीये तां पाँदे आपणा जाल़ बछाणा ओर तिना तूँ मेरे बड़े जाल़ो रे खींजी लणा। 4 तेबे मां तूँ जमीना दे छाडणा ओर मैदानो दे सेटी की मां तेरा मास सारी तरतिया रे बणो रे जानवर ओर पंछिया खे खाणे खे देणा। 5 मां तेरा मास पाह्ड़ो पाँदे बखेरी देणा ओर काअटिया तुसा रिया आड्डिया ते परी देणियां। 6 जेस देशो दे तूँ तैरेया, तेथो रे पाह्ड़ मां तेरे खूनो साथे सींजणे ओर तिना रे नाल़े तेरे खूनो साथे परी जाणे। 7 जेस बखते आऊँ तेरा नाश करने लगूँगा, तेस बखते मां सर्ग टखी देणा ओर तारे तूँदल़े करी देणे; मां सूरज बादल़ो रे लकोई देणा ओर चाँदो आपणा प्रयासा नि देणा।*32:7 मत्ती 24:29, योए. 2:31 8 सर्गो रे जितणी बी प्रयासा देणे वाल़िया जोतिया ए, सेयो सब मां तेरी बजा ते तुँदल़िया करी देणियां, ओर तेरे देशो दे नेरा करी देणा, परमेशर यहोवे री येई बाणी ए।"

9 जेबे मां तेरे नाशो रा समाचार जातिया-जातिया बीचे ओर तेरे अणजाणे देशो दे फैलाणा, तेबे बड़े-बड़े लोका रे मनो दे डर पैदा ऊई जाणा। 10 मां तुसा साथे जो ऊईरा, तेतेरिया बजा ते बऊत जातिया रे लोक डराई देणे, ओर जेबे मां तिना सामणे आपणी तलवार चलाणी, जेबे परमेशरो मिस्र ओर तेसरा राजा नाश करने तेतेरिया बजा ते तिना रे राजा डरी जाणे ओर काँबी जाणे। जेस बखते तुसे नाश ऊणे, सेयो सब काँबी जाणे, ओर डरने की केथी सेयो बी मरी नि जाओ। 11 कऊँकि ओ मिस्र परमेशर यहोवा ताखे ईंयाँ बोलोआ, "बाबेलो रे राजे री तलवार तां पाँदे चलणी। 12 मां तेरे सिपाई एड़े शूरवीरा री तलवारी साथे रूड़ाणे जो सबी जातिया बीचे खतरनाक ए। तिना मिस्रो रे लोका रा कमण्ड तोड़ना ओर तिना रे सारे सिपाईया रा नाश करी देणा। 13 मां तेसरे सारे डांगर तेथो रे नदिया रे कनारेया पाँदा ते नाश करी देणे ओर बादो ते सेयो तलाब ना तो माणूंआ रे पैरा साथे ओर ना डांगरा रे खुरा सारे गाऊदल़े ऊणे। 14 तेबे मां मिस्रो रा पाणी साफ करी देणा ओर तिना री नदिया जैतूनो रे तेलो जेड़िया बह्ईणियां, परमेशर यहोवे री येई बाणी ए।" 15 जेबे मां मिस्र देश उजाड़ी देणा ओर जेते साथे से फरेया राए, से खाली करी देणा ओर मां जेबे तेथो रे रणे वाल़े सब काई देणे, तेबे मिस्रिया खे पता लगी जाणा कि आऊँ ई यहोवा ए। 16 लोका खे शोग मनाणे खे शोगो रा गाणा येई ए; जातिया-जातिया री जवाणसा ये गाणा; मिस्र ओर तेथो रे सारे सिपाईया रे बारे दे येई शोगो रा गीत गाणा, परमेशर यहोवे री येई बाणी ए।

मुड़देया रा संसार

17 तेबे आसा रा बन्दिया रे रूपो दे बेबीलोनो दे गुलाम दे बारूए सालो रे पईले मीन्ने रे पन्द्रुए दिने यहोवे रा ये सन्देश फेर माखे मिलेया, 18 "ओ नाश ऊणे वाल़े माणूंआ, मिस्रो रे नौकरा खे हाय-हाय कर ओर तेसखे प्रतापी जातिया रे लोका समेत कब्रा रे दबाए रे लोका गे अधलोको दे उतार। 19 मिस्रिया ते बोल तू केस ते बांका ए? तुसे मरे दे लोका री दुनिया दे जाणे ओर बिना खतने रे पापिया बीचे पड़े दे रणे। 20 सेयो तलवारी साथे मरे रे लोका बीचे पड़ने, तिना रिया तँईं तलवार ठराई राखी; इजी री खातर मिस्रो खे तेसरे सारे लोका समेत कसिटी की लई जाओ। 21 सिपाईया रे परदाना तेस साथे ओर तेसरे मतदगारा साथे अधलोको दे गल्ला करनिया; सेयो बिना खतना कित्ते रे लोक तेती तलवारी साथे मरी की पड़ी रे।"

22 आपणी सारी सेना रे सिपाईया समेत अश्शूर बी तेती ए, तेसरी कब्रा तेसरे चऊँ कनारे ए; सारे के सारे तलवारी साथे काई राखे। 23 तेसरी कब्रा गड्डेया रे कूणे रे बणी रिया ओर तेसरी कब्रा रे चऊँ कनारे तेसरे सिपाई ए, सेयो सारे के सारे तलवारी साथे मरी की पड़ी रे। जो तरतिया पाँदे जिऊँदे लोका खे डराओ थे, 24 तेती एलाम ए, ओर तेसरी कब्रा रे चऊँ कनारे तेसरे सारे सिपाई ए; सेयो सारे के सारे तलवारी साथे मारी ते दे, जो बिना खतने ते अधलोको दे उतरी गे दे; सेयो तरतिया पाँदे जिऊँदे लोका खे डराओ थे, पर एबे कब्रा दे ओर गढ़े देया साथे तिना रे मुंए पाँदे बी उदासी छायी री। 25 एलाम लड़ाईया दे काये दे लोका बीचे लेटीगा। तेसरी कब्रा तेसरे चऊँ कनारे ए, सेयो सारे के सारे बिना खतना कित्ते रे तलवारी साथे काई ते दे; तिने तरतिया पाँदे जिऊँदे लोका दे डर फैलाया था, पर एबे कब्रा दे ओर दबाया देया साथे तिना रे मुंए पाँदे बी उदासी छायी री ओर सेयो मेरे रेया बीचे राखी राखे। 26 मेशेक ओर तूबल तेती ए, ओर तिना रे सबी सिपाईया रिया कब्रा चऊँ कनारे ए। सेयो सारे के सारे बिना खतना रे ए, सब लड़ाईया दे कायी राखे। फेर बी एकी बार तिने जिऊँदे लोक बऊत डराईते दे थे। 27 सेओ तिना बिना खतना कित्ते रे सिपाईया साथे पड़े दे नि रणे, जो तिना रे अथियारा साथे दबाईते दे, तेती तिने आपणियां तलवारा तिना रे सिरो निठे राखी राखिया। जेबे सेयो ईम्मती वाल़े लोक जिऊँदे थे, तिने लोका बीचे बऊत डर पैदा करिता था। 28 इजी री खातर ओ मिस्रो रे राजा, मां तूँ कायी देणा ओर तूँ बी तिना बिना खतने रे मरे दे लोका री कब्रा साथे पड़ेया दा रणा, जो परमेशरो खे नि मानदे। 29 तेती एदोम ओर तेसरे राजा ओर तेसरे सारे परदान, जो पराक्रमी ऊई की बी तलवारी साथे मरे रेया साथे राखी राखे; लड़ाईया दे काये दे बिना खतना कित्ते रे लोका साथे सेयो बी पड़े दे रणे। 30 मरे दे लोका रिया दुनिया दे उत्तर दिशा दे इस्राएलो रे सारे परदान ओर सारे सिदोनी बीए, जो मरे रेया साथे उतरी गे; तिने आपणे पराक्रमो साथे डर पैदा कित्तेया था, पर एबे सेयो शर्मिंदा ऊए ओर तलवारी साथे ओर मरे रेया साथे सेयो बी बिना खतना कित्ते रे पड़ी रे ओर कब्रा रे बाकी दबाए रेया साथे तिना रे मुंए पाँदे बी उदासी छायी री। 31 इना खे देखी की फिरौनो खे बी आपणे सिपाईया समेत शान्ति मिलणी, आ, फिरौन ओर तेसरी सारी सेना जो तलवारी साथे मरी, परमेशर यहोवे री येई बाणी ए। 32 कऊँकि मैं तेसरी बजा ते तरतिया पाँदे जिऊँदे लोका दे डर पैदा कित्तेया था; इजी री खातर से लड़ाईया दे तलवारे की काये दे सबी सिपाईया ओर जो मरी गे रे तिना समेत बिना खतना कित्ते रे लोका बीचे लटयाल़ना, परमेशर यहोवे री येई बाणी ए।