Ezequiel 24

उबल़दी टोकणी

1 म्हारे गुलामिया रे नऊए सालो रे दसुए मीन्ने रे दसुए दिने, यहोवे रा ये सन्देश फेर माखे मिलेया, 2 "ओ नाश ऊणे वाल़े माणूंआ, आजका दिन लिखी लो, कऊँकि आजके दिने ई बेबीलोनो रे राजे आई की यरूशलेमो पाँदे अमला करना शुरू करने लगी रा।" 3 इना इस्राएलिया खे बोल, कऊँकि सेयो मेरी आज्ञा खे मानणे खे ना करोए। प्रभु यहोवा ईंयाँ बोलोआ, "टोकणियां खे आगी पाँदे राखी दे; तीजी खे राखी की तिदे पाणी पाई दो; 4 पांडे दे आपणे सबी ते खरे डांगरो रे मासो रे टुकड़े पाई दे: खुटी, कांद ओर सबी ते खरे टुकड़े तिदे पाई दे। फेर पांडे रे बाकी खाले इस्से खे सबी ते खरे मासो ते परी दे। 5 सबी ते खरे डांगरो रा मास लओ, ओर टोकणियां थाले लकड़ू बाल़ी की तेस मासो खे ठीक टंगो दे पकाओ ताकि पीतरे ई आड्डिया पक्की जाओ।" 6 प्रभु यहोवा ईंयाँ बोलोआ: अत्या करने वाल़े शईर*24:6 अत्या करने वाल़े शईर यरूशलेम लाणत ए तां पाँदे! ये एक खई लगे दे पांडे जेड़ा ए, जो कदी साफ नि कित्तेया जांदा। मासो रा एक-एक टुकड़ा निकाल़ी देओए, ओर तिदे एक पनि रंदा। 7 कऊँकि यरूशलेमो रे लोका रा बाह्या रा खून तेथी आए; तिने से जमीना दे बाह्यी की माट्टिया साथे नि टकेया, पर जिने लोके सेयो काये थे तिना रा खून तेथी नांगी चट्टानी पाँदे सेटिता था।*24:7 प्रका. 18:24 8 इजी री खातर मैं तिना रा खून बी नांगी चट्टानी पाँदे राखी राखेया ताकि से टखी नि सको मैं ये कित्तेया, जेतेते लोक गुस्से ओ, ओर तेसखे बेकसूर लोका री अत्या री सजा देओ। 9 प्रभु यहोवा ईंयाँ बोलोआ, "हाय, तेस खूनी शईरो पाँदे! मां बी आगी री लकड़िया रा टेर बड़ा करी देणा। 10 इजी री खातर बऊत लकड़िया पा, आगी री बऊत चल़ लगा, मास ठीक-टंगो दे पक्का ओर मसाला मला ओर आड्डिया बी राड़ी देयो। 11 तेबे टोकणियां खे खाली करी की फेऊआ पाँदे राखी देओ। जेते कि से ताता ऊई जाओ ओर तेतेरा पीतल़ फूखो, ओर तेतेरा मैल गल़ो ओर तेतेरा जंग खत्म ऊई जाओ। 12 एड़ा लगोआ जेड़े आऊँ तेतेखे साफ करदा-करदा थकी गा, पर तेतेरा पारी जंग तेते ते नि छूटेया, तेतेरा जंग आगी साथे पनि छूटदा। 13 ओ यरूशलेम, तेरे बुरे कामे तूँ अशुद्ध करिता दा ए ओर पापो ते कलंकित ऊई। आऊँ तो ताखे शुद्ध करना चाऊँ था, पर तूँ शुद्ध नि ऊई, इजी बजा ते जदुओ तक आऊँ आपणा रोष तां पाँदे पड़काई की शान्त नि करूँगा, तदुओ तक तूँ फेर शुद्ध नि करी जाणी। 14 मैं यहोवे ई ये बोली राखेया ओर से ऊई बी जाणा, मां एड़ा ई करना, मां तूँ नि छाडणी, ना माखे तां पाँदे तरस आऊणा, ना पछताणा; तेरे चाल-चलण ओर कामो रेई मुताबिक तेरा न्याय करेया जाणा, प्रभु यहोवे री येई बाणी ए।"

यहेजकेलो री लाड़िया री मौत

15 तेबे यहोवे रा ये सन्देश माखे मिलेया, 16 "ओ नाश ऊणे वाल़े माणूंआ, आऊँ अचाणक तेरी प्यारी लाड़िया खे तांते दूर करने लगी रा, जेसा ते तूँ बऊत प्यार करेआ। पर जेबे से मरी जाओ, तो ये नि दखाणा कि तूँ दु:खी आ, शोक करने लगी रा या रोणे लगी रा ओ। 17 पीतरे ई पीतरे रोंदा रओ, पर तेसारी कब्रा पाँदे रोण पीटण करने नि जाणा। आपणा सिर नांगा नि करना ओर ना आपणे जोड़े खोलणे। शोग करने जो तरीका ये से नि करना, ना ई शान्ति देणे आऊणे वाल़ेया लोका रा खाणा खाणा।" 18 तेबे मैं एक दिन प्यागा लोका खे बोलेया ओर तेसा ई साँजा खे मेरी लाड़ी मरी गी। तेबे मैं दूजे दिने प्यागा उठी की तेसा आज्ञा रे मुताबिक ई कित्तेया। 19 तेबे लोक माखे बोलणे लगे, "क्या तां आसा गे नि बताणा कि ये जो तूँ करेया, एतेरा आसा लोका खे क्या मतलब ए?" 20 मैं तिना खे ज्वाब दित्तेया, यहोवे रा ये सन्देश माखे मिलेया, 21 "तूँ इस्राएलो रे लोका खे बोल, प्रभु यहोवा ईंयाँ बोलोआ: देखो, आऊँ आपणे पवित्र मन्दरो खे जेतेरा गढ़ ऊणे ते तुसे कमण्ड करोए ओर जो तुसा री पसन्दा राए, तेतेखे आऊँ अपवित्र करने वाल़ा ए ओर आपणे जिना माठे-बेटिया खे तुसे छाडी की आई रे, सेयो तलवारी साथे मारे जाणे।" 22 जेड़ा मैं करी राखेया, तेड़ा ई तुसा लोका करना, तुसा बी आपणे ओठ नि टखणे, ना शोगो री रोटी खाणी। 23 तुसा सिरो रे पगड़ी ओर पैरा रे जोड़े पैनी की राखणे, ना तुसे रोणे, ना छाती पीटणी, बल्कि आपणे बुरे कामो रे फसी की गल़दे जाणे ओर एकी-दूजे रिया तरफा खे कणदे रणे। 24 यहोवा लगातार आगे बोलोआ, "ईंयाँ यहेजकेल तुसा रिया तँईं एक नशाणी ठईरना; जेड़ा तिने कित्तेया, ठीक तेड़ा ई तुसा बी करना ओर जेबे ये ऊई जाणा, तेबे तुसा जाणी लणा कि आऊँ ई यहोवा परमेशर ए।" 25 तेबे यहोवे माखे बोलेया, ओ नाश ऊणे वाल़े माणूंआ, क्या ये सच्च नि ए कि जेस दिने मां तिना रा मन्दर, तिना री शोभा ओर खुशिया री बजा ओर तिना रे माठे-बेटिया जो तिना री आखी री खुशी ओर मनो खे चाणे वाल़े ए, तिना ते मां सेयो लई लणे, 26 जेस दिने मां एड़ा करना, तेस दिने कुछ लोक जो नाश ऊणे ते बची जाणे, तिना तांगे आई की ताखे बताणा। 27 तेस दिने ई तेरा मूँ खुलणा ओर तूँ फेर चुप नि रणा, पर जो लोक बची गे रे तिना खे चतौणी देणी। ईंयाँ तूँ इना लोका खे एक नशाणी ठईरना ओर इना खे पता लगी जाणा कि आऊँ यहोवा ए।