1 परमेशरे माखे फेर बोलेया, "ओ नाश करने वाल़े माणूंआ, जेबे तूँ ये काम करना शुरू करे, तो एक पैनी तलवार लओ ओर तिजी रा नाईए रे उस्तरे जेड़ा इस्तेमाल करी की आपणे सिर ओर दाढ़िया रे बाल़ कटाई दे, तेबे ताकड़ी लई की बाल़ा खे तीऊँ बराबर इस्सेया दे लग-लग करी दे।" 2 जदुए तक यरूशलेमो रे केराबन्दिया रे दिन पूरे नि ऊई जाओगे, तदुए तक इन्तजार करदा रओ। आपणे बाल़ा रा एक इस्सा लओ ओर तेस यरूशलेम शईरो री तस्वीरा वाल़ी ईटा पाँदे फुकी दे। दूजा इस्सा लई की तलवारे की तिजी रे छोटे-छोटे टुकड़े करी दे। ओर तिना टुकड़ेया खे ईटा रे चऊँ कनारे सेटी दे, जेते दे शईर दिशोआ। फेर तीजा इस्सा लई की बाल़ा खे हवा दे ऊबे सेट। मां आपणी तलवार म्यानो ते काडी की तिना पीछे दौड़ना। 3 तेबे इना बीचा ते थोड़े जे बाल़ लई की आपणे टाल्ले रे कुणे दे बानी देणे। 4 तेबे तिना बीचा ते बी कुछ लई की आगी बीचे सेटणे ताकि सेयो आगी दे फूखी जाओ, ये एते गल्ला री नशाणी ऊणी की यरूशलेमो ते आग फैलणी ओर सारे इस्राएलो दे सब कुछ नाश ऊई जाणा।

5 आऊँ, परमेशर यहोवा, ईंयाँ बोलूँआ, "ये चित्र यरूशलेमो रे बारे दे बताओआ, से शईर जो मैं देशा बीचे बसाई राखेया ए, जेतेरे चऊँ कनारे दूजे देश ए। 6 पर यरूशलेमो रे दुष्ट लोके मेरिया आज्ञा ना मानी की बिद्रोह करी राखेया, ओर सेयो तिना लोका ते बी जादा दुष्ट ए जो तिना रे चऊँ कनारे रओए। तिने मेरिया बिधिया नि मानिया ओर मेरिया आज्ञा खे मानणे खे ना करी राखी।" 7 इजी बजा ते परमेशर यहोवा ईंयाँ बोलोआ कि तुसे लोक जो आपणी चऊँ कनारली जातिया ते जादा बुराई करोए ओर ना मेरी बिधिया पाँदे चलदे, ना मेरे नियम मानदे ओर आपणे चऊँ कनारली जातिया रे नियमो रे मुताबिक पनि कित्तेया, 8 इजी बजा ते परमेशर यहोवा ईंयाँ बोलोआ: देख, आऊँ आपू यरूशलेम शईरो रे लोका रे खलाफ आ। मां तुसा खे सजा देणी, ओर दूजे देशो रे लोका ये सब ऊँदे ऊए देखणा। 9 यरूशलेमो रे लोको, तुसा रिया सब घृणित मूर्तिया रिया बजा ते मां तुसा खे सजा देणी जेड़ी ना तो आजो तक देई राखी ओर ना बादो ते देणी। 10 यरूशलेमो रे लोक पूखा ते इतणे तड़फणे कि माया-बाओ खाणे खे इतणे लाचार ऊई जाणे कि तिना आपणे बच्चे खाणे ओर बच्चेया आपणे माये-बाओ खाणे ओर मां तुसा खे कईया प्रकारा री सजा देणी, 11 ओर तुसा बीचे बचे रे सारे लोक चऊँ कनारे तित्तर-बित्तर करी देणे। इजी री खातर परमेशर यहोवा ईंयाँ बोलोआ, "मेरी जिन्दगिया री कसम, कऊँकि तुसे मेरी पवित्र जगा आपणी सारी घिनौनी मूर्तिया ओर सारे घिनौने कामो साथे अशुद्ध करी राखे, मां तुसे कटाणे ओर तुसा पाँदे दया नि करनी ओर तुसा पाँदे कोई दया नि करनी। 12 तुसा रे एक तिहाई लोक यरूशलेम शईरो ते पीतरे बमारिया ओर पूखा ते मरने, एक तिहाई लोक तुसा रे दुश्मणा री तलवारी साथे मरने ओर एक तिहाई मां चऊँ कनारे तित्तर-बित्तर करी देणे, पर तेबे बी तुसा रे दुश्मणा फेर तुसा रा पीछा करना ओर आपणियां तलवारी की तुसे काणे। ओर तलवार खींजी की तिना पीछे चलवाणी।* 13 ईंयाँ मेरा कोप शान्त ऊणा ओर आपणी जल़न तिना पाँदे पड़काई की माखे शान्ति मिलणी ओर जेबे आऊँ आपणी जल़न पूरी तरअ ते तिना पाँदे पड़काई चुकूँगा, तेबे यहूदा ओर यरूशलेमो रे लोका खे पता लगी जाणा कि मैं परमेशरे रोषो दे आई की ये सब कुछ करी राखेया।" 14 मां तुसा रा शईर खण्डहर बणाई देणा, ओर तुसा रे नेड़े-तेड़े रणे वाल़े दूजे देशो रे लोक तीसिए जाणे, तिना से शईर देखणा ओर तुसा रा मजाक उडाणा। 15 इजी री खातर जेबे मां तुसा खे बऊत रोषो दे ओर जल़नी दे आई की सजा देणी, तेबे तुसा री चऊँ कनारली जातिया सामणे बेज्जती, मजाक, शिक्षा ओर हैरानी ऊणी, सेयो डरी जाणे ओर तिना खे चतौणी देणी। ये सब जरूर ऊणा कऊँकि मैं यहोवे ये बोली राखेया ए। 16 ये तेस बखते ऊणा, जेबे मां तिना लोका रा नाश करने खे तुसा पाँदे अकाल़ो रे पैने तीर चलायी की, तुसा बीचे अकाल़ बढ़ाणा। 17 मां तुसा खे अकाल़ो रा अनुभव कराणा, ओर मां तुसा पाँदे ओर तुसा रे बच्चेया पाँदे अमला करने खे दुष्ट जानवर पेजणा, ओर तुसा रे सारे बच्चे काये जाणे। तुसा विपत्तिया ओर लड़ाईया रा अनुभव करना, ओर मां तुसा रे दुश्मण तुसा पाँदे अमला करने देणे। मैं यहोवे येई बोली राखेया।*