Ezequiel 22

यरूशलेमो रा पाप

1 यहोवे रा ये सन्देश एक बार फेर माखे मिलेया, 2 "ओ नाश ऊणे वाल़े माणूंआ, तूँ ई न्याय कर, अत्यारे शईर यरूशलेमो रे पापो रा तूँ ई न्याय कर। तिने जो बुरे काम करी राखे तिना सबी खे तेसखे बता।" 3 ओर तेस शईरो खे बोल, परमेशर यहोवा ईंयाँ बोलोआ, "शईर अत्यारे लोका ते परेया रा ए। जेते कि तुसा रा नाश ऊणे रा बखत चट आओ ओर तुसे आपणा ई नुकशाण करने खे ओर अशुद्ध ऊणे खे मूर्तिया बणाओए।" 4 यरूशलेमो रे लोको, तुसे जो अत्या करी राखिया, तुसे तेते कि दोषी ठईरी रे ओर जो मूर्तिया तुसे बणाईया, तिना रिया बजा ते तुसे अशुद्ध ऊईगे रे, तुसे आपणे नाशो रा दिन नेड़े करिता दा ए, ओर आपणे पिछले सालो तक पऊँची गा रा। इजी बजा ते मैं तुसे जातिया-जातिया रे लोका बीचे बेज्जती ओर मजाको री बजा बणाईते रे। 5 ओ बदनाम शईर, ओ उपद्रवो साथे परे रे शईरो रे लोको, जो नेड़े ओर दूर ए, तिना सबी तुसा रा मजाक ड्वाणा। 6 देख, इस्राएलो रे सारे परदान आपणी-आपणी तागती रे मुताबिक शईरो दे अत्या करने वाल़े ऊईगे रे। 7 एते बीचे यरूशलेमो दे तुसे लोक आपणे माये-बाओ री गल्ल नि मानी; तां बीचे परदेशिया पाँदे अन्देर कित्तेया; सेयो अनाथ ओर बिदुआ खे तुच्छ जाणोए। 8 तुसे मेरी पवित्र चीजा जो मेरिया सेवा खे थिया तुच्छ जाणिया ओर मेरे रामो रे दिन अपवित्र करी राखे। 9 यरूशलेमो रे लोक ओरी लोका रे बारे दे चूठ बोलोए। लोक अत्या करने खे आगे रओए, ओर तेरे लोके पाह्ड़ो पाँदे मूर्तिया खे चढ़ाईया दिया बलिया रिया रोटिया खाईया; तुसा बीचे बऊत बड़ा पाप ऊई रा। 10 यरूशलेमो बीचे एड़े लोक ए जो आपणियां सोतेलिया माया साथे गन्दा काम करोए ओर महावारी आई री जवाणसा साथे सम्बन्द बणाई की अशुद्ध ऊए। 11 एस शईरो दे कोई आपणे पड़ोसिये री लाड़िया साथे सया ओर किने आपणी बऊआ साथे सयी की महापाप कित्तेया, ओर किने आपणी बईण ओर आपणियां सोतेलिया बईणी साथे बुरा काम कित्तेया। 12 यरूशलेमो बीचे लोके अत्या करने खे रिश्वत लई राखी, तुसे ब्याज ओर मूल़ लया ओर आपणे पड़ोसिया पाँदे अत्याचार करी की फायदा उठाया; ओर तुसे आऊँ पुलाई ता रा, प्रभु यहोवे री येई बाणी ए। 13 इजी री खातर देख, जो फायदा तुसे अन्याय साथे उठाया ओर आपू बीचे अत्या करी की खून बाह्या ए, तेते पाँदे गुस्से दे मैं चाड़िया बजाई राखिया। 14 तो जेबे मां तुसा रा न्याय करना, तेस दिने तुसा रा मन मजबूत ओर आथ खड़े नि रणे। मैं यहोवे ये बोली राखेया ओर एड़ा ई करना। 15 मां तुसा रे लोक जातिया-जातिया बीचे तित्तर-बित्तर करी देणे ओर तुसा री अशुद्धता तुसा बीचा ते खत्म करी देणी। 16 इजी री खातर दूजे देशा रे लोका तुसा री बेज्जती करनी, ओ यरूशलेम, तेबे तुसा खे पता लगी जाणा कि आऊँ ई यहोवा ए।

परमेशरो रे गुस्से री आग

17 तेबे यहोवे रा ये सन्देश मांगे मिलेया, 18 "ओ नाश ऊणे वाल़े माणूंआ, इस्राएलो रा कराना मां सामणे बेकार ऊईगा रा; सेयो सारे के सारे भट्टिया बीचे पीतल़, राँगे ओर लोए ओर शीशे जेड़े बणी गे रे; सेयो चाँदिए रे मैलो जेड़े ऊईगे रे। 19 इजी बजा ते परमेशर यहोवा इस्राएली लोका खे बोलोआ: कऊँकि तुसे सब के सब धातुआ रे मैलो जेड़े बणी गे रे, तो देखो, आऊँ तुसा खे यरूशलेमो रे कट्ठा करने वाल़ा ए। 20 जिंयाँ कारीगर चाँदी, पीतल़, लोआ, शीशा ओर टीन इजी री खातर भट्टिया रे पीतरे कट्ठा करी की राखोए कि तिना खे आगी रे गल़ाओ, तिंयाँ ई मां तुसे आपणे रोषो रे आई की तुसे कट्ठे करी की तेथी ई राखी की गल़ाई देणे। 21 मां तुसे तेती कट्ठे करी की आपणे रोषो री आगी रे फूकी देणे ओर तुसे तेती तेसा आगी बीचे गल़ी जाणे। 22 सेयो यरूशलेमो दे तेड़े ई पिगल़ी जाणे जिंयाँ चाँदी आगी बीचे गल़ाया जाओआ, तेबे तुसा खे पता लगी जाणा कि जिने आसा पाँदे आपणा रोष पड़काई राखेया, से यहोवा ए।"

इस्राएलो रे अगुओ रा पाप

23 तेबे यहोवे रा ये सन्देश माखे मिलेया, 24 "ओ नाश ऊणे वाल़े माणूंआ, यरूशलेमो रे लोका खे बोल, तू एड़ा देश ए जो कदी शुद्ध नि ऊआ ओर जेबे यहोवा तुसा ते रोषे ऊआ, तेबे तिने तुसा रे देशो दे कोई बर्खा नि कित्ती। 25 देशो रे शासक*22:25 शासक हिब्रु पाषा दे भविष्यबक्ता लिखेया जाओआ लोका खे दु:ख देओए, जेड़े तागतबर शेर जानवरा रे टुकड़े-टुकड़े करी देओआ। सेयो आपणी शक्तिया रा इस्तेमाल लोका खे नाश करने रिया तँईं करोए। सेयो ओरी रिया तन दौलत ओर किमती चीजा आपू खे लई लो ए। ओर तिना बऊत मर्द काई देणे ओर तिना रिया लाड़िया बिदुआ बणाई देणियां। 26 तेथो रे पुरोईते मेरा बिधान नि मानेया ओर मेरी पवित्र चीजा जो मेरी सेवा खे थिया अपवित्र करी तिया; तिने पवित्र ओर अपवित्रो बीचे कोई फर्क नि समजेया ओर ना ई ओरी खे शुद्ध ओर अशुद्धो रा फर्क सिखाया ओर सेयो मेरे रामो रे दिनो रे कोई फिकर नि करदे, जेते कि इस्राएलो रे लोक मेरी इज्जत नि करदे। 27 तिना रे अधिकारी भेड़िये जेड़ा शिकार पकड़ोए ओर अन्याय साथे फायदा चकणे रिया तँईं अत्या करोए ओर बईमानी करने रिया तँईं माणूं अत्या करने खे आगे रओए।*22:27 सप. 3:3 28 तिना रे भविष्यबक्ता तिना रिया तँईं कच्ची लिपाई मतलब चूठे दर्शण बताई की यहोवे रे बिना बोले सेओ चूठी भविष्यबाणी करोए कि प्रभु यहोवा ईंयाँ बोलोआ। 29 देशो रे आम माणूं बी अन्देर करोए ओर पराया पैसा छुड़ाओए, सेयो गरीबा पाँदे अत्याचार करोए ओर न्याय री फिकर छाडी की परदेसिये पाँदे अन्देर करोए। 30 मैं तिना बीचे एड़ा माणूं टोल़ना चाएया जो इना लोका खे सुदरने रिया तँईं मांते प्रार्थना करो, ताकि माखे सेयो नाश नि करने पड़ो, पर एड़ा कोई नि मिलेया। 31 इजी बजा ते आऊँ इस्राएली लोका ते बऊत रोषे ऊआ ओर मैं सेयो आपणी जल़ना री आगी रे फूकी ते, एबे मां तिना खे तिना रे पापा रे मुताबिक सजा देणी। परमेशर यहोवे री येई बाणी ए।"*22:31 यहे. 11:21, यहे. 9:10