Ezequiel 41

मन्दरो री लम्बाई-चौड़ाई

1 इजी ते बाद से दशणे वाल़ा माणूं माखे मन्दरो रिया पवित्र जगा दे लईगा ओर तेते द्वारो रिया दुँईं कनारलिया कांदा नापिया, ओर सेयो दस-दस फुट मोटिया थिया। 2 मन्दरो दे पीतरे जाणे रा द्वार साडे सतारा फुट चौड़ा था ओर द्वारो री दुँईं तरफा रिया कांदा नौ फुट लाम्बिया थिया। पवित्र जगा री लम्बाई सत्तर फुट ओर चौड़ाई पैंती फुट थी। 3 फेर दशणे वाल़ा माणूं पवित्र जगा ते आगे कमरे दे गया। तेतेरे द्वारो रे दुँईं कनारलिया कांदा नापिया, ओर सेयो साडे तीन फुट मोटिया थिया। तेतेरा द्वार साडे दस फुट चौड़ा था, ओर तेते द्वारो रिया दुँईं कनारलिया कांदा साडे बारा फुट लाम्बिया थिया। 4 पवित्र जगा रा पितरला कमरा पैंती फुट लाम्बा ओर पैंती फुट चौड़ा था। तिने माखे बोलेया, "ये परम पवित्र जगा ए।"

मन्दरो रे कमरे

5 तेबे दशणे वाल़े माणूंए मन्दरो री पीतरली कांद नापी जो साडे दस फुट मोटी थी बारलिया कांदा साथे कमरेया री एक लाईन थी हर कमरा सात फुट चौड़ा था। 6 यो बारले कमरे तीन मञ्जला रे थे ओर एक-एक मईलो रे तीई-तीई कमरे थिया। मन्दरो रे नेड़े-तेड़े कांद इजी री खातर थी ताकि बारले कमरे तेतेरे सारे दे ओ ओर तिदे ई कमरे रिया कड़िया बठयाल़ी राखिया थिया ओर सेयो मन्दरो रे सारे दे नि थिया। 7 मन्दरो रे नेड़े-तेड़े जो कमरे बारे थे, तिना बीचा ते जो पाँदे थे, सेयो बऊत चौड़े थे; मतलब मन्दरो रे नेड़े-तेड़े जो कुछ बणी रा था, से जिंयाँ-जिंयाँ पाँदो खे चढ़दा गया, तिंयाँ-तिंयाँ चौड़ा ऊँदा गया; ईंयाँ एस कअरो री चौड़ाई पाँदली तरफा खे बढ़ी री थी ओर लोक थालली मञ्जला बीचा ते पाँदली मञ्जला खे चढ़ी सको थे। 8 मैं देखेया की मन्दर एकी ऊच्ची जगा पाँदे बणी रा था, जो साथले कमरेया खे निऊँआ रा काम करो था। ये चौक नापणे रे डण्डे बराबर साडे दस फुट ऊच्चा था। 9 मन्दरो रे बारले कमरेया रिया कांदा साडे आठ फुट मोटिया थिया। इजी बजा ते इना साथले कमरेया बीचे एक खुली जगा बणी दी रओ थी। 10 ओर पीतरले आँगणो री बारली कांदा साथे कमरे एकी लाईनी दे थे। ये खुली जगा पैंती फुट चौड़ी थी, ओर ये मन्दरो रे चऊँ कनारे रे फैली दी थी। 11 साथो वाल़े दूई कमरे रे द्वार छतो वाल़े आँगणो दे खुलो थे, जो साडे आठ फुट चौड़ा था। एक द्वार उत्तर दिशा कनारो खे ओर दूजा द्वार दक्खण दिशा रिया तरफा खे था।

पश्चिमो रिया तरफा रा भवन

12 मन्दरो रे आँगणो रे सामणे पच्छमा रिया तरफा दे एक बड़ा भवन था, से 122 फुट चौड़ा था ओर 157 फुट लाम्बा था, ओर इजी रिया कांदा साडे आठ फुट मोटिया थिया।

मन्दरो रा पूरा नाप

13 फेर दशणे वाल़े माणूंए मन्दर नापेया, ओर देखेया कि ये 175 फुट लाम्बा था। भवनो रे चऊँ कनारे रा आँगण, जिदे इजी रिया कांदा बी थिया, 175 फुट लाम्बा था। 14 पीतरे आँगणो रा पूर्वी इस्सा 175 फुट चौड़ा था। इदे मन्दरो रा आगे वाल़ा इस्सा बी आओ था। 15 पच्छमा रिया तरफा रा भवन, जेते दे इजी रिया दो कांदा बी आओईया, से 175 फुट चौड़ा था।

मन्दरो री सजावट

16 तेबे तिने देऊल़ी ओर झिलमिलदार द्वारिया ओर नेड़े-तेड़े री तीनो मञ्जला रे छाज्जे नापे जो देऊल़ी सामणे थे ओर सेयो चऊँ कनारो ते तख़्तेया साथे बन्द थे ओर जमीना ते द्वारिया तक ओर द्वारिया रे नेड़े-तेड़े हर जगा तख़्तेया साथे बन्द थे। 17 तेबे तिने द्वारो री पाँदली जगा पीतरले मन्दरो तक ओर तेतेरे बारे बी ओर नेड़े-तेड़े री सारिया कांदा पीतरे ओर बारे बी नापेया। 18 तिदे करूब ओर खजूरी रे डाल़ एड़े बणी रे थे कि दो-दो करूबा बीचे एक-एक खजूरी रा डाल़ था ओर हर एकी करूबो रे दो-दो मूँ थे। 19 एक मूँ आदमिए रा था जो एकी तरफा ते खजूरो रे डाल़ो खे देखणे लगी रा। दूजा मूँ एकी जवान शेरो रा था, जो दूजे कनारा ते खजूरो रे डाल़ो खे देखो था। मन्दरो रे पीतरे सारे जगा दे चित्र बणाई राखे थे। 20 जमीना ते लई की द्वारो पाँदो तक करूब ओर खजूरी रे डाल़ बणी रे थे। मन्दरो रे सामणे बड़े कमरे री कांद ईंयाँ बणी री थी।

लकड़िया री बेदी

21 मन्दरो रे द्वारो रे खम्बे चकौर थे ओर पवित्र जगा रे सामणे रा रूप मन्दरो जेड़ा था। 22 तेती लकड़िया री बणी री एक बेदी थी, जो पाँज फुट ऊच्ची ओर साडे तीन फुट चौड़ी थी। इजी रे कुणे, थाली ओर कनारिया सब लकड़िया रिया बणी रिया थिया। तिने माणूंए माखे बोलेया, "ये से मेज ए जो परमेशरो रे सामणे खड़ी री ए।"

पवित्र जगा रे द्वार

23 सामणे रे कमरे दे दो द्वार थे। परम पवित्र जगा दे बी दोरे द्वार थे। 24 ओर हर एक दरवाजे रे दो-दो मुड़ने वाल़े फल़े थे, हर एक दरवाजे खे दो-दो फल़े थे। 25 पवित्र जगा रे द्वारो पाँदे बी खजूरी रे डाल़ ओर पंखा वाल़े करूब बणी रे थे, ओर ब्रंडे रे द्वारो रिया बारली तरफा खे लकड़िया दे नक्काशी थी। 26 ब्रंडे रे दुँईं कनारे झिलमिलदार द्वारिया थिया ओर खजूरी रे डाल़ बणी रे थे बारले कनारलिया कांदा साथे लगे दे कमरेया दे छत बणी रे थे।