Ezequiel 33

पईरेदार ओर तिना रा समाचार

1 यहोवे रा ये सन्देश माखे फेर मिलेया, 2 "ओ नाश ऊणे वाल़े माणूंआ, आपणे इस्राएली लोका खे बोल, कि जेबे आऊँ केसी देशो पाँदे तिना रे दुश्मणा खे लड़ाई करने खे ल्याऊँआ ति क्या ओआ? तेस देशो रे लोक आपणेया लोका बीचा ते केसी खे आपणा पईरेदार बणाई लओए। 3 तेबे सेयो पईरेदार ये देखी की कि एस देशो रे दुश्मण अमला करने वाल़े ए, नरसिंगा बजाई की लोका खे बताई देयो, 4 तेबे जो कोई रड़सिंगे री आवाज सुणी की सावधान नि ओ ओर तलवारी साथे मरी जाओ, तेसरा खून तेसरे ई सिरो पाँदे पड़ना। 5 तिने रड़सिंगे री आवाज सुणी, पर सावधान नि ऊआ, इजी री खातर तेसरा खून तेसखे ई लगणा। पर जे से सावधान ऊई जांदा, तो आपणे प्राण बचाई सको था।*33:5 मत्ती 27:25 6 पर जे पईरेदार ये देखी की कि अमला ऊणे वाल़ा ए, चतौणिया खे नरसिंगा बजाई की लोका खे नि बताओगा ओर जेबे लड़ाईया दे तलवार चलोगी तेबे तिना बीचा ते कोई मरी जाओ, तो से तो आपणे पापो रे फसेया रा मरी जाणा, पर तेसरे खूनो रा लेखा मां पईरेदारो तेई लणा।" 7 इजी री खातर ओ नाश ऊणे वाल़े माणूंआ, मैं तूँ इस्राएलो रे कराने रा पईरेदार ठराईता रा, तूँ मेरे मुंए ते वचन सुणी-सुणी की तिना खे मेरी तरफा ते सावधान करी दे। 8 जे आऊँ दुष्टो खे बोलूँ, "ओ दुष्ट, तूँ जरूर मरना, तेबे जे तूँ तेसखे तेसरी बाटा रे बारे दे सावधान नि करे, तो से दुष्ट आपणे पापो रे फसेया रा मरना, पर तेसरे खूनो रा लेखा मां तांते ई लणा। 9 पर जे तूँ दुष्टो खे तेसरी बाटा रे बारे दे सावधान करे कि आपणे बुरे कामो ते फिर ओर से फिरो नि, तो से तो आपणे पापो रे फसेया रा मरी जाणा, पर तां आपणे प्राण बचाई लणे।"

परमेशर लोका खे खत्म नि करना चाँदा

10 फेर ओ नाश ऊणे वाल़े माणूंआ, इस्राएलो रे लोका खे ईंयाँ बोल, "तुसे लोक ईंयाँ पूछोए, म्हारे पाप ओर पापो रा पार आसा पाँदे लदेया राए ओर आसे तेतेरी बजा ते नाश ऊणे लगी रे, आसे किंयाँ जिऊँदे रणे?" 11 तेबे तिना खे बोल, "परमेशर यहोवा ईंयाँ बोलोआ, मेरी जिन्दगिया री कसम, आऊँ दुष्टो रे मरने ते कोई खुश नि ऊँदा, पर एते ते खुश रऊँआ कि दुष्ट आपणे बुरे कामो ते फिरी की जिऊँदा रओ। ओ इस्राएलो रे कराने, तुसे आपणे बुरे कामा ते फिरो, ताकि तुसे मरो नि?" 12 ओ माणूंआ, "आपणे लोका खे ईंयाँ बोल, जेबे तर्मी माणूं पाप करो, तेबे तेसरा तर्म तेसखे बचाई नि सकदा ओर दुष्टो री दुष्टता जो बी ओ, जेबे से तेते ते फिरी जाओ, तो तेसरी बजा ते से टल़ना नि ओर तर्मी माणूं जेबे पाप करो, तेबे आपणे तर्मो रिया बजा ते जिऊँदा नि रणा।" 13 जे आऊँ तर्मिये खे बोलूँ कि तूँ जरूर जिऊँदा रणा ओर से आपणे तर्मो पाँदे परोसा राखी की बुरे काम करने लगोगा, तेबे तेसरे तर्मो रे कोई बी काम याद नि करे जाणे, जो बुरे काम तिने करी राखे ओ, से तिदे ई फसेया रा मरी जाणा। 14 तेबे जे आऊँ दुष्टो खे बोलूँ, तूँ जरूर मरना ओर से आपणे पापो ते फिरी की न्याय ओर तर्मो रे काम करने लगो, 15 उदारणो खे, जे से कर्जा देणे रिया तँईं तेतेरे बदले लई दी चीजा खे वापस करी देयो, या जो तिने चोरी राखेया था तिजी खे वापस करी देयो, जे से पाप करना बन्द करी देयोआ ओर जीवन देणे वाल़िया बिधिया खे मानोआ, तो से नि मरना; से जरूर जिऊँदा रणा। 16 जितणे पाप तिने करी राखे ऊणे, तिना बीचा ते कोई बी याद नि करेया जाणा; तिने न्याय ओर तर्मो रे काम कित्ते ओर से जरूर जिऊँदा रणा। 17 तेबे बी तुसा रे लोक मां पाँदे दोष लगाओए, प्रभुए री बाट ठीक नि; पर तिना री बाट ठीक नि ए। 18 जेबे तर्मी आपणे तर्मो ते फिरी की बुरे काम करने लगो, तेबे जरूर से तिदे फसेया रा ई मरी जाणा। 19 जेबे दुष्ट आपणी दुष्टता ते फिरी की न्याय ओर तर्मो रे काम करने लगोगा, तेबे से तिना कामो रिया बजा ते जिऊँदा रणा। 20 ओ इस्राएलियो, तेबे बी तुसे बोलोए, "कि प्रभुए री चाल ठीक नि। ओ इस्राएलो रे कराने, मां हर एक माणूंए रा न्याय तेसरे कामो रे मुताबिक ई करना।"

यरूशलेमो रा नाश

21 तेबे म्हारी गुलामिया रे ग्यारुए सालो रे दसुए मीन्ने रे पाँजुए दिने, एक माणूं जो यरूशलेम शईरो ते नठी की बचीगा था, से मांगे आई की बोलणे लगेया, "यरूशलेम शईर लई ला दा।" 22 तेस नठी की आऊणे वाल़े माणूंए ते पईले साँजा खे यहोवे री शक्ति मां पाँदे ऊई थी ओर प्यागा तक, मतलब तेस माणूंए रे आऊणे तक तिने मेरा मूँ खोली ता, तेबे मेरा मूँ खुला ई रया ओर आऊँ फेर चुप नि रया।

लोका रा पाप

23 तेबे यहोवे रा ये सन्देश माखे मिलेया, 24 "ओ नाश ऊणे वाल़े माणूंआ, इस्राएलो री जमीना दे तिना खण्डहरो दे रणे वाल़े ईंयाँ बोलोए, अब्राहम एक ई माणूं था, तेबे बी देशो रा अधिकारी ऊआ, पर आसे लोक बऊत सारे ए, इजी री खातर देश पक्का म्हारे ई कब्जे दे देई राखेया।" 25 इजी बजा ते तूँ तिना खे बोल, परमेशर यहोवा ईंयाँ बोलोआ, "तुसे लोक तो मासो खे खूनो समेत खाओए ओर आपणी मूर्तिया री आराधना करोए ओर अत्या करोए, तेबे क्या तुसे लोक तेस देशो रे अधिकारी रयी सकोए? 26 तुसे आपणी पसन्दा रिया चीजा आसिल करने रिया तँईं लड़ाई-चगड़े रा इस्तेमाल करोए। तुसे बुरे काम करोए, तुसे ओरी मर्दा रिया जवाणसा साथे बुरा काम करोए। इजी रिया बजा ते तुसे इस्राएलो री जमीना रे अक्कदार नि ऊणे।" 27 तूँ तिना खे ये बोल, परमेशर यहोवा ईंयाँ बोलोआ, "मेरी जिन्दगिया री कसम, बिना कोई शको ते जो लोक खण्डहरो रे रओए, सेयो तलवारी साथे मरने ओर मां डोरूआ दे रणे वाल़े बणो रे जानवरा ते खुल़ाई देणे। बमारिया रिया बजा ते सेयो मरने, जो मजबूत कअरा दे ओर गुफा दे रओए।*33:27 यिर्म. 42:22 28 मां से देश उजाड़ ई उजाड़ करी देणा ओर तेथो रा सामर्थी ऊणे रा कमण्ड चली जाणा ओर इस्राएलो रे पाह्ड़ एड़े उजड़ने कि तिना पाँदे ऊई की कोई नि चलणा। 29 इजी री खातर जेबे आऊँ तिना लोका रे कित्ते रे सारे घिनौने कामो रिया बजा ते तेस देशो खे उजाड़ी देऊँ, तेबे तिना खे पता लगी जाणा कि आऊँ ई यहोवा ए।"

वचन सुणना ओर तिना पाँदे नि चलणा

30 यहोवा बोलोआ, "ओ नाश ऊणे वाल़े माणूंआ, तेरे लोक कांदा गे ओर कअरो रे द्वारा गे तेरे बारे दे गल्ला बणाओए ओर एकी-दूजे खे बोलोए, आओ, सुणो, यहोवे रिया तरफा ते कुण जा वचन निकल़ोआ।" 31 सेयो प्रजा जेड़े तांगे आओए ओर मेरी प्रजा बणी की तां सामणे बैठी की तेरे वचन सुणोए, पर सेयो तिना पाँदे चलदे नि, मुंए ते तो सेयो बऊत प्यार दखाओए, पर तिना रा मन लाल़चो रेई लगेया रा रओआ। 32 तूँ तिना री नजरा रे प्यारो रे मीठे गीत गाणे वाल़े ओर बजाणे वाल़े जेड़ा ठईरी रा, कऊँकि सेयो तेरे वचन सुणो ते आए, पर तिना पाँदे चलदे नि। 33 इजी री खातर जेबे यो खतरनाक गल्ल ऊई जाणिया, तेबे जरूर बीतणी, तेबे मेरे लोका खे पता लगी जाणा कि आसा बीचे एक भविष्यबक्ता आया था।