1 यहोवे फेर मांते गल्ला करदे रया, "ओ नाश ऊणे वाल़े माणूंआ, गोगो साथे ऊणे वाल़िया ओर बी खतरनाक गल्ला रे बारे दे भविष्यबाणी करी की बोल, ओ गोग, ओ रोष, जो मेशेक ओर तूबलो पाँदे राज करोआ, आऊँ तेरे खलाफ ए। 2 मां तूँ चऊँ कनारो ते कूमायी की ल्याऊणा ओर उत्तर दिशा रे दूर-दूर देशो ते चढ़ाई की ली आऊणा ओर इस्राएलो रे देशो दे पऊँचाणा। 3 तेती मां तेरा धनुष तेरे खूँजे आथो ते थाले सटयाणा ओर तेरे तीर तेरे दाँणे आथो ते थाले सटयाई देणे। 4 तूँ आपणी सारी सेना ओर आपू साथली सारी जातिया समेत इस्राएलो रे पाह्ड़ो पाँदे मरी जाणा; मां तूँ नेका-प्रकारा रे पंछिया ते, जो मास खाणे वाल़े ए ओर बणो रे जानवरा खे तिना रा खाणा करी की देई देणा, 5 तूँ खाली डोरूए दे रूड़ी की मरी जाणा, कऊँकि मैं ई एड़ा बोली राखेया, परमेशर यहोवे री येई बाणी ए।" 6 मां मागोग शईरो रे ओर द्धीपो रे बिना डरे रणे वाल़ेया लोका बीचे आग लगाणी ओर मागोग ओर पूर्बा दे भूमध्य समुद्रो रे कनारे वाल़े लोका खे पता लगी जाणा कि आऊँ ई यहोवा ए।*

7 मां आपणी इस्राएली प्रजा बीचे आपणा नाओं सामणे ल्याऊणा ओर आपणा पवित्र नाओं फेर अपवित्र नि ऊणे देणा; तेबे जातिया-जातिया रे लोका खे बी पता लगी जाणा कि आऊँ इस्राएलो रा पवित्र यहोवा ए। 8 ये कटणा ऊणे वाल़ी ए ओर से ऊई जाणी, परमेशर यहोवे री येई बाणी ए। ये सेई न्याय रा दिन ए जेतेरी चर्चा मैं करी राखी।

9 इस्राएल देशो रे शईरा दे रणे वाल़े आपणे-आपणे शईरो ते बारे निकल़ने, ओर तिना आपणे दुश्मणा रे अथियारा दे छुड़ाई की आग लगाई की फूकी देणे। तिना साता साला तक लकड़िया रे बदले ढाल, तलवार, धनुष, तीर, डण्डे, बड़छे बाल़ने खे इस्तेमाल करदे रणे। 10 इजी बजा ते तिना मैदानो दे लकड़ू नि कट्ठे करने, ना जंगल़ो दे डाल़ बाडणे, कऊँकि तिना अथियार ई फूकेया करने, तिना आपू खे लुटणे वाल़े लुटणे ओर आपणे छुड़ाणे वाल़ेया ते छुड़ाणा, परमेशर यहोवे री येई बाणी ए।

11 जेस दिने ये सब बीतणा मां गोगो खे इस्राएल देशो दे दबाणे खे एक जगा देणी, से समुद्रो रे पूर्बो रिया तरफा खे आऊणे वाल़ेया री काअटी। एसा आऊणे वाल़े रोकी देणे, कऊँकि तेती गोग ओर तेसरी सारी पीड़ दबाई जाणी। इजी खे हामोन ओर गोगो री काअटी* बोलेया जाणा। 12 इस्राएलो रा कराना तिना खे सात मीन्ने तक माट्टी देंदा रणा, ताकि आपणे देशो खे शुद्ध करो। 13 देशो रे सबी लोका तिना खे मिली की माट्टी देणी ओर जेस बखते मेरी महिमा ऊणी, तेस बखते तिना रा नाओं बी बड़ा ऊणा, परमेशर यहोवे री येई बाणी ए। 14 सात मीन्ने पूरे ऊणे ते बाद, कुछ लोक चूणे जाणे कि सेयो सारे देशो दे कूमी की जमीना दे पड़िया दिया लाशा खे टोल़ो ओर तिना खे दबाई देयो, ताकि सेयो देशो खे तार्मिक रितिया ते शुद्ध करी सको। ईंयाँ फेर से जमीन यहोवे खे इस्तेमालो खे ऊई जाणी। 15 देशो दे कुमदे ऊए, जेबे बी तिना खे कोई माणूंआ री आड्डी मिलदी, सेयो तेते गे एक नशाण लगाई देयो थे, ताकि कब्र खणने वाल़े आई की तिजी खे गोगो रिया सेना री काअटिया दे दबाई सको, 16 हमोन* नाओ रा एक शईर बी तेती आ। ईंयाँ तिना से देश शुद्ध करी देणा।

17 ओर एबे, ओ नाश ऊणे वाल़े माणूंआ, परमेशर यहोवा बोलोआ, "सबी पंछिया खे ओर सबी जानवरा खे बुलाओ, तिना खे बोल, मेरे एस बड़े बलिदानो रिया पाट्टिया खे कट्ठे ऊई जाओ। दूरा-दूरा ते इस्राएलो रे पाह्ड़ो पाँदे आओ, तेती आई की तुसे मास खाओ ओर खून पियो। 18 तुसा शूरवीरा रा मास खाणा ओर तरतिया रे परदेशी परदाना रा खून पीणा ओर खाडू, मिन्टू, बाकरे ओर बल़दा रा बी जो सारे के सारे बाशान प्रदेशो दे त्यार कित्ते रे ऊणे। 19 तेसा पाट्टिया दे जो यहोवे तुसा रिया तँईं त्यार करी राखी ए, तुसे चर्बिया खे खांदे-खांदे रज्जी जाणे ओर खून पी-पी की रज्जी जाणे। 20 मां तुसा खे खाणे खे कोड़े ओर तिना रे सवार देणे। मां तुसा खे खाणे खे शूरवीर माणूं ओर हर प्रकारा रे सिपाई देणे," परमेशर यहोवे री येई बाणी ए।

21 मां जातिया-जातिया रे लोका बीचे आपणी महिमा प्रगट करनी ओर जातिया-जातिया रे सबी लोका मेरे सजा रे काम जो मां करने ओर मेरा आथ जो तिना पाँदे पड़ना, देखी लणा। 22 तेस दिनो ते बाद इस्राएलो रे कराने खे पता लगी जाणा कि यहोवा म्हारा परमेशर ए। 23 जातिया-जातिया रे लोका खे बी पता लगी जाणा कि इस्राएलो रा कराना आपणे बुरे कामो रिया बजा ते गुलामिया दे गया था; कऊँकि तिने मां साथे एड़ा विश्वासघात कित्तेया कि आऊँ तिना ते दूर ऊईगा ओर तिना रे दुश्मणा ते लड़ाईया दे तलवारे की तिना खे आरने ओर काणे दित्तेया। 24 मैं तिना री अशुद्धता ओर पापो रे मुताबिक तिना साथे बर्ताव करी की आपणा मूँ तिना ते मोड़ी ला था। 25 इजी री खातर परमेशर यहोवा ईंयाँ बोलोआ, "एबे मां याकूब गुलामिया ते वापस ली आऊणा ओर इस्राएलो रे सारे कराने पाँदे दया करनी ओर आपणे पवित्र नाओं रिया तँईं माखे जल़न ऊणी। 26 तेबे तेस सारे विश्वासघातो रिया बजा ते जो तिने मेरे खलाफ कित्तेया इस्राएली शर्मिंदा ऊणे ओर आपणे देशो दे बिना डरे रणे ओर सेयो केसी नि डराणे। 27 जेबे मां सेयो जातिया-जातिया बीचा ते वापस ल्याऊणे ओर तिना दुश्मणा रे देशा ते कट्ठे करने, तेबे बऊत सारी जातिया री नजरा दे तिना रे जरीये पवित्र ठईरना। 28 तेबे इस्राएलो रे लोका खे पता लगी जाणा कि यहोवा म्हारा परमेशर ए, कऊँकि मैं सेयो जातिया-जातिया बीचे गुलाम करी की फेर तिना रे आपणे देशो रे कट्ठे कित्ते। मां तिना बीचा ते कोई बी परदेसो दे नि छाडणा, 29 मां एबे तिना ते फेर कदी बी आपणा मूँ नि मोड़ना, कऊँकि मैं इस्राएलो रे कराने पाँदे आपणा आत्मा लटी राखेया, परमेशर यहोवे री येई बाणी ए।"