1 फेर यहोवे रा ये सन्देश माखे मिलेया, 2 "ओ नाश ऊणे वाल़े माणूंआ, भविष्यबाणी करी की बोल, परमेशर यहोवा ईंयाँ बोलोआ: ओ मिस्रो रे लोको, हाय, हाय करो, डराऊणा दिन आऊणे लगी रा!" 3 परमेशर तुसा खे बोलोआ, "कऊँकि से खतरनाक दिन, मतलब यहोवे रा दिन नेड़े ए, से काल़े बादल़ो रा दिन ऊणा, तेबे सारे देशो रिया तँईं सजा रा दिन ऊणा। 4 मिस्रो दे लड़ाई ऊणी ओर कूश देशो दे बड़ा संकट ऊणा। मिस्रो दे बऊत जे लोक तलवारे की काये जाणे; मिस्र लूटी लणा ओर खण्डहरो दे छाडी देणा। 5 कूश, पूत, लिबिया, लूद ओर सारे दोगले ओर कूब देशो रे लोक ओर वाचा बाने रे मेरे आपणे इस्राएल देशो रे कराये पाँदे गये दे सिपाई, मिस्रिया साथे तलवारी साथे काये जाणे।" 6 यहोवा ईंयाँ बोलोआ, "मिस्रो खे सम्बाल़ने वाल़े बी टल़ी जाणे ओर मिस्री आपणी जेसा सामर्था पाँदे कमण्ड करोए, से टूटी जाणी, उत्तरा दे मिग्दोल शईरो ते लई की दक्खणा दे सवेने शईरो तक तेथो रे रणे वाल़े तलवारी साथे मारे जाणे, परमेशर यहोवे री येई बाणी ए।" 7 मिस्र केसी बी दूजे देशो रे मुकाबले जादा उजाड़ ऊई जाणा। इजी रे शईर पूरी तरआ ते नाश ऊई जाणे। 8 जेबे मां मिस्रो दे आग लगाणी। ओर तेथो रे सारे मतदगार नाश ऊई जाणे, तेबे तिना खे पता लगी जाणा कि आऊँ ई यहोवा ए। 9 जेबे से दिन आऊणा ओर मिस्र नाश ऊई जाणा, तो मां कूशो रे बेफिकरे लोका खे जगाणे रिया तँईं जाह्जा दे दूत पेजणे, ओर सेयो डरी जाणे। से दिन आऊणे वाल़ा ए!

10 परमेशर यहोवा ईंयाँ बोलोआ, "मां बाबेलो रे राजा नबूकदनेस्सरो रे आथो साथे मिस्रो रे बऊत सारे लोक नाश करी देणे। 11 मां नबूकदनेस्सर राजा तेसरिया सेना समेत, जो सबी जातिया बीचे खतरनाक ए, तेस देशो दे नाश करने खे पेजणा ओर तिना मिस्र देशो रे लोका खे तलवारे की काई की से सारा देश लाशा साथे परी देणा। 12 तेबे मां नील नदिया रा पाणी सुकाई देणा ओर देश दुष्ट लोका रे आथो दे करी देणा ओर मां परदेशिया रे जरीये देश ओर जो कुछ तिदे ए, नाश करी देणा; मैं यहोवे ई ये बोली राखेया।" 13 परमेशर यहोवा ईंयाँ बोलोआ, "मां नोप शईरो ते मूर्तिया नाश करनिया ओर तेथो रिया मूर्तिया रणे नि देणियां, फेर कोई परदान मिस्र देशो दे नि उठणा ओर मां मिस्र देशो रे डर पैदा करना। 14 मां पत्रोस शईर उजाड़ना ओर उत्तरा दे सोअन शईरो दे आग लगाणी ओर नो शईरो खे सजा देणी। 15 सीन शईर जो मिस्रो री मजबूत जगा ए, तेते पाँदे मां आपणा रोष पड़काणा ओर नो शईरो री सेना नाश करी देणी। 16 मां मिस्रो रे आग लगाणी, सीन शईरो रे लोक बऊत डरी जाणे; ओर नो शईर फाड़ी देणा ओर नोप शईरो रे बिरोदी दिने-दपईरे उठणे। 17 ओन ओर पीवेसेत शईरा रे जवान सिपाई तलवारी की मरने ओर यो शईर गुलामिया दे चली जाणे। 18 जेबे मां मिस्रिया रा जूँगड़ा तहपन्हेस शईरो दे तोड़ना, तेबे तिदे दिने न्हेरा ऊणा ओर तेसरी शक्ति जेस पाँदे से फूलोआ, से नाश ऊई जाणी; तेस पाँदे बादल़ छायी जाणे ओर मिस्रो तेथो रे लोक गुलाम बणाई देणे। 19 ईंयाँ मां मिस्रिया खे सजा देणी ओर तिना खे पता लगी जाणा कि आऊँ यहोवा ए।"

20 फेर ग्यारुए सालो रे पईले मीन्ने रे सातुए दिने यहोवे रा ये सन्देश माखे मिलेया, 21 "ओ नाश ऊणे वाल़े माणूंआ, मैं मिस्रो रे राजा फिरौनो री बाँ तोड़ी ती री; ओर देख, ना तो से जोड़ी, ना तिदे लेप लगाई की पट्टी कराई ताकि से बानी की तलवार पकड़ने जोगी बणी सको।" 22 इजी री खातर परमेशर यहोवा ईंयाँ बोलोआ, देख, आऊँ मिस्रो रे राजा फिरौनो रे खलाफ ए ओर तेसरी ठीक ओर खराब दोनो बाँई तोड़नियां ओर लड़ाईया री तलवार तेसरे आथो ते सटयाई देणी। 23 मां मिस्री जातिया-जातिया बीचे तित्तर-बित्तर करी देणे, ओर देशो-देशो दे बखेरी देणे। 24 मां बाबेलो रे राजे रिया बाँई तागतबर करी की आपणी तलवार तेसरे आथो रे देणी; पर मिस्रो रे राजा फिरौनो रिया बाँई तोड़ी देणियां ओर से आपणे दुश्मण बेबीलोनो रे राजे रे सामणे चींगणा, ओर मरी जाणा। 25 मां मिस्रो रे राजे रिया बाँयी सम्बाल़नियां ओर फिरौनो रिया बाँयी टीलिया पड़ी जाणिया, तेबे तिना आरे दे मिस्रिया खे पता लगी जाणा कि आऊँ ई यहोवा ए। जेबे मां बाबेलो रे राजे रे आथो दे आपणी तलवार देणी, तेबे तेस से मिस्र देशो दे चलाणी; 26 ओर मां मिस्री जातिया-जातिया बीचे तित्तर-बित्तर करी देणे, ओर देशो-देशो दे बखेरी देणे। तेबे मिस्रिया खे पता लगी जाणा कि आऊँ यहोवा ए।