Ezequiel 45

जमीना रा पवित्र इस्सा

1 जेबे तुसे चिट्ठी पाई की इस्राएलो री जमीना खे बाँडो, तेबे देशो बीचा ते एक इस्सा पवित्र समजी की यहोवे खे चढ़ाणा; से साडे बारह किलोमीटर लाम्बा ओर चौड़ाई दस किलोमीटर ऊणी। से जगा आपणे चऊँ कनारे बन्ने तक पवित्र ठईरो। 2 एते जमीना रा एक इस्सा, जेतेरी लम्बाई ओर चौड़ाई 875 फुट ए, मन्दरो खे लग राखणी। एतेरे चऊँ कनारे साडे सतासी फुट चौड़ी जमीना री एक पट्टी खाली छाडणी। 3 तेती पवित्र जगा दे तुसे तेरा किलोमीटर लाम्बी ओर पाँज किलोमीटर चौड़ी एक जगा नापणी ओर तिदे ई पवित्र जगा बनाणी, जो परम पवित्र ठईरो। 4 जो पुरोईत मन्दरो री सेवा-टईल करो ओर यहोवे री सेवा-टईल करने खे नेड़े आओ, से तिना रिया तँईं ओ; तेती तिना रे कअरो खे जगा ओ ओर पवित्र जगा खे पवित्र ठईरो। 5 तेबे साडे बारह किलोमीटर लाम्बा ओर पाँज किलोमीटर चौड़ा एक इस्सा, मन्दरो री सेवा-टईल करने वाल़े लेविया री बीइ कमरे खे ओ। 6 तेबे यरूशलेम शईरो रिया तँईं, चढ़ाए रे पवित्र इस्से गे, तुसे साडे बारह किलोमीटर लाम्बी ओर दो दशमलव पाँज किलोमीटर चौड़ी, खास जमीन ठराणी, से इस्राएलो रे सारे लोका खे ओ।

परदानो रिया तँईं जमीन

7 इस्राएलो रे न्यायिया रिया तँईं जमीना रे दो खास इस्से पेंटा खे लग राखणे। एक इस्सा पवित्र जमीन ओर शईरो रे पूर्बा रे इस्से साथे बन्ना मिलेया दा ऊणा, ओर दूजा इस्सा पच्छमा रे इस्से रे बन्ने साथे मिलेया दा ऊणा। फेर राजकुमारो री जमीना रा पूर्बा ओर पच्छमा रा बन्ना आदिवासी जगा रे पूर्बी ओर पच्छमा रे बन्ने साथे मिली जाणिया। 8 ये इस्राएलो री जमीना रा से इस्सा ऊणा जो परदानो रा ऊणा। कऊँकि मेरे राजे गे आपणी जमीन ऊणी, इजी री खातर तिना खे मेरे लोका खे कष्ट देणे री जरूरत नि ऊणी। पर इस्राएलो रे कराने खे तेसरे गोत्रो रे मुताबिक इस्सा देणा जो तिना रा ऊणा।

परदानो रिया तँईं नियम

9 परमेशर यहोवा ईंयाँ बोलोआ, "ओ इस्राएलो रे परदानो! बस करो, उपद्रव ओर उत्पादो खे दूर करो ओर मेरिया बिदिया खे मानेया करो ओर न्याय ओर तर्मो रे काम करेया करो; तुसा खे मेरे लोका खे फेर कदी बी तिना री जमीना ते नि काडणा चाईयो। परमेशर यहोवे री येई बाणी ए। 10 तुसा खे आकार ओर बजन नापणे खे एक सई चीजा रा इस्तेमाल करना चाईयो। 11 तुसा रा एपा ओर बत दोनो एक ई नापो रे ओ, मतलब दुँईं दे होमेरो रा दसुआ इस्सा आओ, होमेर ई सई नाप ऊणा। 12 शेकेल बीई गेरा रा ऊणा। पाँज शेकेल पाँज शेकेल ई ओ ओर दस शेकेल दस शेकेल ई ओ। तुसा रा मानेया पंजा शेकेलो रा ऊणा। 13 जेबे तुसा मन्दरो री खास पूजा खे पेंट चढ़ाणी तेबे तेतेरा बजन ईंयाँ ऊणा: मतलब कणका रे हर 100 किलो दे पौणे दो किलो इस्सा; जौ रे हर 100 किलो दे बी पौणे दो किलो रा इस्सा, 14 जैतूनो रे तेलो रा जो इस्सा ऊणा से ये आ: मतलब हर 450 लीटरो दे साडे चार लीटर इस्सा। (450 लीटर एक कोर नाप ओआ, जो एक होमेरो रे बराबर ए। होमेर दस बत ओआ।) 15 इस्राएलो री खरी-खरी चराईया बीचा ते दो-दो सौ पेडा-बाकरिया बीचा ते एक पेड या बाकरी देया करनी, यो सारी चीजा नज्जो री बलि, होमबलि ओर मेलबलिया रिया तँईं देया करनी, जेते की तिना खे प्राश्चित करेया जाओ, परमेशर यहोवे री येई बाणी ए। 16 इस्राएलो रे परदाना खे देशो रे सब लोक ये पेंट देयो।*45:16 परदानो नज्ज कट्ठा करना ओर डांगर तदुए तक राखणे जदुए तक मन्दरो दे तिना री जरूरत नि ओ। 17 त्यार, नये चाँदो रे दिन, रामो रे दिन ओर इस्राएलो रे लोका रे ठराए रे बखतो दे होमबलि, नज्जो री बलि ओर खुशबूदार द्रव्य रा अर्घ देणा परदानो रा ई काम ओ। इस्राएलो रे कराने खे प्राश्चित करने खे से पापबलि, नज्जो री बलि, होमबलि ओर मेलबलि त्यार करो।"

त्यार

18 परमेशर यहोवा ईंयाँ बोलोआ, "सालो रे पईले मीन्ने रे पईले दिने तैं एक निर्दोष बाच्छू बलि करना ओर ईंयाँ पवित्र जगा शुद्ध करनी। 19 एस पापबलिया रे खूनो बीचा ते पुरोईत कुछ लई की मन्दरो रे दरवाजे रे खम्बे, ओर बेदिया री कुर्सिया रे चऊँ कूणेया दे ओर पीतरले आँगणो रे बड़े द्वारो रे खम्बेया पाँदे लगाओ। 20 तेबे एते ई सालो रे पईले मीन्ने रे सातुए दिने सबी पूला रे पड़े दे ओर शरीफा रिया तँईं बी ईंयाँ ई करना; ईंयाँ ई मन्दरो खे प्राश्चित करना। 21 हर सालो रे पईले मीन्ने रे चौदुए दिने तुसा फसह रा त्योआर मनाणा शुरू करना चाईयो। ये त्योआर साता दिना तक चलणा। ओर तिदे तुसे बिना सजेड़े री रोटी खाया करनी। 22 फसह रे त्योआरो रे पईले दिने परदान आपणे-आपणे ओर प्रजा रे सबी लोका रिया तँईं एक बाच्छू पापबलिया खे त्यार करो। 23 त्योआरो रे सातो दिना दे हर दिन तुसे सात बाच्छू ओर सात खाडू निर्दोष ओ सेयो यहोवे खे बलि करी की चढ़ाणे ओर सेयो सारे के सारे फुकी देणे। तेसखे हर रोज एक-एक बाकरा पापबलिया रे रूपो दे चढ़ाणा ए। 24 हर एक बाच्छू ओर खाडूए साथे राजे दस किलो नज्जो री बलि ओर नज्जो री बलिया ते बाद तीन लीटर जैतूनो रा तेल देणा। 25 सातुए मीन्ने रे पन्द्रुए दिनो ते शुरू ऊई की आगे ये साता दिना तक ऊँदा रणा, मतलब त्योआरो रे दिनो दे राजा पापबलि, होमबलि, नज्जो री बलि ओर तेल एसा बिधिया रे मुताबिक ई करेया करो।"