1 तेबे यहोवे रा ये सन्देश माखे फेर मिलेया, 2 "ओ नाश ऊणे वाल़े माणूंआ, इस्राएलो रे जो भविष्यबक्ता ए सेयो भविष्यबाणी तो करने लगी रे, पर सेयो सिर्फ आपणियां ई गल्ला सिखाओए।" तिना खे बोल, "यहोवे रा सन्देश सुणो।" 3 तिने माखे चूठे भविष्यबक्तेया ते ये बोलणे खे बोलेया, "आऊँ परमेशर यहोवा ए ओर ये मेरा सन्देश ए, लाणत ए, तिना मूर्ख भविष्यबक्तेया खे जो आपणी ई आत्मा पीछे पटकी जाओए ओर तिना खे कोई दर्शण नि मिलेया!" 4 ओ इस्राएलो रे लोको, तुसा रे भविष्यबक्ता खण्डहरो री गीदड़िया जेड़े बणी रे। 5 तिने तुसा रे शईरो रिया टुटी रिया दवाला ठीक करने खे तुसा री मताद नि करी राखी। दवाला इतणिया मजबूत नि ऊणिया कि सेयो यहोवे रे दिने इस्राएलो रे लोका खे बचाई की राखी सको। तेबेई मां तुसा रे दुश्मणा खे तुसा पाँदे अमला करने देणा। 6 यहोवे माखे बोलेया, "तिना रे दर्शण बेकार ए, तिने दर्शणो रा बेकार ओर चूठा दावा करी राखेया ओर तेबे बी ये उम्मीद दलाई कि यहोवे ये वचन पूरा करना, तेबे बी यहोवे सेयो नि पेजे।" 7 आ, तुसे भविष्यबक्तेया चूठे दर्शण देखी राखे। तुसे चूठ बोलोए जेबे तुसे बोलोए, "यहोवे री ये बाणी ए।" तुसे एड़ा बोलोए, पर मैं तुसा खे कोई बी सन्देश नि देई राखेया। 8 इजी बजा ते परमेशर यहोवा तुसा खे ईंयाँ बोलोआ, "तुसे जो बेकार गल्ला बोलिया ओर चूठे दर्शण देखी राखे, इजी बजा ते आऊँ तुसा रे खलाफ ए, परमेशर यहोवे री येई बाणी ए।" 9 जो भविष्यबक्ता चूठे दर्शण देखोए ओर चूठी भविष्यबाणी करोए, मेरा आथ तिना रे खलाफ ऊणा ओर सेयो मां आपणी प्रजा बीचे नि रणे देणे। तिना रे नाओं इस्राएलो रे कराने दे नि लिखे जाणे ओर ना सेयो इस्राएलो रे देशो दे जाई सकणे, इजी ते तुसा खे पता लगी जाणा कि आऊँ ई परमेशर यहोवा ए। 10 कऊँकि तिने चूठे नबीए बार-बार मेरे लोका ते चूठ बोलेया। नबीए बोलेया की शान्ति रणी ओर तेती कोई शान्ति नि ए ओर इजी री खातर जेबे कोई दवाल बणाओआ तेबे सेयो तेतेरी लिपाई माट्टिए की करोए।* 11 तिना माट्टिए की लिपणे वाल़ेया लोका खे बोलो कि से टल़ी जाणी। कऊँकि पारी बर्खा ऊणी, बड़े-बड़े ओल़े पड़ने ओर जेबे पारी तूफान आऊणा तेबे से टल़ी जाणी। 12 इजी री खातर जेबे कांद टल़ी जाणी, तेबे लोका तुसा खे बोलणा कि जो लिपाई तुसे कित्ती थी से केयी गी? 13 इजी बजा ते आऊँ परमेशर यहोवा तुसा खे ईंयाँ बोलोआ: कऊँकि आऊँ तुसा ते बऊत गुस्से दे आ, मां यरूशलेमो खे नाश करने खे दुश्मणा री सेना पेजणी। ये एड़ा ऊणा जेड़े कि मां तुसे नाश करने रिया तँईं बऊत तेज अवा, ओल़े ओर बऊत जादा बर्खा पेजणी।* 14 ईंयाँ जेसा दवाला पाँदे तुसे कच्ची लिपाई करी राखी, से मां टाल़ी देणी, बल्कि माट्टिया रे मलाई देणी ओर तेतेरी निऊँ खुली जाणी ओर जेबे से टल़नी, तेबे तुसे तेती निठे दबी की नाश ऊई जाणे ओर तुसा खे पता लगी जाणा कि आऊँ ई यहोवा ए। 15 ईंयाँ मां कांद ओर तेतेरी कच्ची लिपाई करने वाल़े दुँईं पाँदे आपणा रोष पूरी तरअ ते पड़काणा, तेबे तुसा खे बोलणा, ना तो दवाल ओर ना तेतेखे लिपाई करने वाल़े रये। 16 मतलब इस्राएलो रे सेयो भविष्यबक्ता जो यरूशलेमो रे बारे दे भविष्यबाणी करो थे ओर तिना री शान्तिया रा दर्शण बताओ थे, पर परमेशर यहोवे री ये बाणी ए कि शान्ति तो आई नि। 17 तेबे यहोवे मांते फेर गल्ल कित्ती, ओ नाश ऊणे वाल़े माणूंआ, एबे इस्राएलो री जवाणसा नबिया रे बारे दे बचार कर ओर तिना रा बरोद कर, जो आपणे ई मनो ते भविष्यबाणी करोईया, तिना रे खलाफ भविष्यबाणी कर। 18 सर्वशक्तिमान यहोवा ईंयाँ बोलोआ, "लाणत ए तिना जवाणसा पाँदे कऊँकि तिना पाँदे बऊत पारी बिपदा आऊणी जो टाल्लेया रे टुकड़े बणाओईया ओर तिना रे बारे दे बोलोईया कि इना दे जादुए री शक्ति ए। लोक तिना खे आपणे आथा ओर सिरो दे बानोए। सेयो जवाणसा लोका रिया जिंदगिया पाँदे आपणा अक्क जमाणा चाओईया। तिना खे एड़ा लगोआ कि सेयो दूजेया रिया जिंदगिया पाँदे आपणा अक्क जमाई सकोईया ओर सेयो आपू बचिया दिया रणियां। 19 तुसे तो जौ रे मुट्ठू ओर रोटिया रे टुकड़ेया रिया तँईं आऊँ मेरी प्रजा री नजरा दे अपवित्र ठराई की ओर आपणी तिना चूठी गल्ला रे जरीये, जो मेरी प्रजा रे लोक तुसा ते सुणोए, जो काणे जोगे नि थे, सेयो काईते ओर जो बचणे जोगे नि थे, सेयो जिऊँदे राखे। 20 इजी बजा ते परमेशर यहोवा तिना जवाणसा खे ईंयाँ बोलोआ, देखो, आऊँ तुसा रे तिना सरयाणेया रे खलाफ ए, जिना रे जरीये तुसे प्राणो रा शिकार करोईया, इजी री खातर जिना खे तुसे शिकार करी की उडाओईया सेयो मां तुसा रे आथो ते छुड़ाई देणे। 21 मां तुसा रे सिरो रे बुर्के फाड़ी की आपणी प्रजा रे लोक तुसा रे आथो ते छुड़ाई देणे ओर बादो ते सेयो तुसा रे वशो दे नि रणे, ताकि तुसे तिना रा शिकार करी सको, तेबे तुसा खे पता लगी जाणा कि आऊँ ई यहोवा ए। 22 तुसे चूठ बोली की तर्मिये रा मन उदास करी राखेया, तेबे बी मैं से उदास नि करना चाया ओर तुसे दुष्ट माणूंए खे याओ दित्तेया, ताकि से आपणे बुरे कामो ते नि फिरो ओर जिऊँदा रओ। 23 ओ चूठी नबीया जवाणसो इजी बजा ते एबे तुसा चूठ नि बोलणा कि तुसे कोई दर्शण देखी राखेया, ओर ना तुसे लोका खे चूठी भविष्यबाणी करी सकदे कि आऊणे वाल़े बखतो दे क्या ऊणा ए। कऊँकि मां आपणी प्रजा तुसा रे तोखा देणे ते छुड़ाणी। तेबे तुसा खे पता लगी जाणा कि आऊँ ई यहोवा ए।"