Ezequiel 27

सोर शईरो रिया तँईं शोग करना

1 यहोवे रा ये सन्देश एक बार फेर माखे मिलेया, 2 "ओ नाश ऊणे वाल़े माणूंआ, सोर शईरो रे बारे दे एक शोगो रा गाणा बणाई की तेसखे बोल"

3 ओ समुद्रो रे मुँआणे पाँदे रणे वाल़ी, ओ बऊत सारे द्धीपो रिया तँईं देश-देशो रे लोका साथे बपार करने वाल़ी, परमेशर यहोवा ईंयाँ बोलोआ,

ओ सोर देशो रे लोको तुसे बोली राखेया कि म्हारा शईर बऊत सुन्दर ए।

4 तेरा बन्ना समुद्रो बीचे ए; तेरे शईरो खे बनाणे वाल़े तेरा शईर बऊत सुन्दर बणाई राखेया।

5 तेरिया सब फटिया सनीर पाह्ड़ो रे सनौबरो री लकड़िया रिया बणी रिया,

तेरे जाह्जो खे बनाणे खे लबानोनो रे पाह्ड़ो रे देवदारो री लकड़ी लई राखी।

6 तेरे पतवार बाशान प्रदेशो रे बड़े डाल़ो रे बणी रे,

सनौबरो ते चीड़ो रे डाल़ा रा इस्तेमाल,

तेरे जाह्जो रे फर्शो रे कमरे रिया तँईं कित्तेया,

ओर तिने एते रणे री जगा आथी दाँदो ते सजाई।

7 तेरे जाह्जो रे तरपाल मिस्रो ते ल्याये रे कढ़ाईदार रेशमो रे बणी रे,

ताकि तेतेरे चण्डे लोक दूरा ते देखी सको,

तुसा री चाँदणी एलीशा रे द्धीपो*27:7 एलीशा रे द्धीपो साईप्रस ते ल्याये रे नीले ओर बैंगणी रंगो रे टाल्लेया री बणी।

8 तुसा रे खेनेवाले सिदोन ओर अर्वद शईरो रे रणे वाल़े थे; ओ सोर, तुसा बीचे ई रणे वाल़े अक्लमंद लोक तुसा रे जाह्ज चलाणे वाल़े थे।

9 तेरे कारीगर जुड़ाई करने वाल़े गबल शईरो रे बुजुर्ग ओर अक्लमंद लोक थे;

तुसा बीचे बपार करने खे मच्छुआरेया समेत समुद्रो रे सारे जाह्ज तुसा गे आईगे थे।*27:9 प्रका. 18:19

10 तुसा री सेना दे फारसी, लूदी ओर पूती देशा रे लोक पर्ती ऊए थे;

तिने तुसा बीचे ढाल ओर टोपी टाँगी ओर तिना री बजा ते ई सोर शईरो रे लोका रा प्रताप बढ़ेया था।

11 सोर शईरो री दवाला पाँदे तेरी सेना साथे अर्वद शईरो रे लोक चऊँ कनारे थे

ओर तेरे गुम्मटो दे गम्मद शईरो रे रणे वाल़े सिपाई खड़े थे, तिने आपणी ढाला तेरे चऊँ कनारे टाँगिया थिया;

तेरी सुन्दरता तिना रे जरीये पूरी ऊई थी।

12 आपणी बऊत सारी सम्पत्तिया रिया बजा ते तर्शीश शईरो रे लोक तेरे बपारी थे; तिने चाँदी, लोआ, राँगा ओर शीशा देई की तेरा माल खरीदेया। 13 यावान, तूबल ओर मेशेक इलाके रे लोक तेरे मालो रे बदले दास-दासिया ओर पीतल़ी रे पांडे देई की तां साथे बपार करो थे। 14 तोगर्मारे कराने रे लोके तेरी सम्पत्ति लई की कोड़े, सवारिया रे कोड़े ओर खच्चर दित्ते। 15 ददानी लोक तेरे बपारी थे; बऊत सारे द्वीप तेरे समानो री मण्डी बणे थे; सेयो तांगे आथी दाँदो रे सींग ओर आबनूसो री लकड़ी बपारो रे ल्याओ थे। 16 तेरे अराम प्रदेशो दे कईया तरआ रिया चीजा खे बणाओ थे। इजी री खातर एदोम प्रदेश बी तां साथे बपार करो था। एदोम प्रदेशो रे बपारी तेरे समानो रे बदले दे ताखे यो चीजा देयो थे; मरकत मणि, बैंगणी रंगो रे ओर कढ़ाईदार टाल्ले, सन, मूगा ओर लालड़ी देई की सेयो तेरा माल लओ थे। 17 यहूदा ओर इस्राएल देश बी तेरे बपारी थे; सेयो तेरे समानो रे बदले जैतूनो रा तेल, पईली फसला रे दाऊगल़े, मिन्नीत शईरो री बढ़िया कणक, सईत, तेल ओर बलसान देयो थे। 18 तां बीचे बऊत कारीगरी ऊई ओर हर प्रकारा रा तअन कट्ठा ऊआ, एते ते दमिश्क शईर तेरा बपारो री जगा ऊईगा; तांगे हेलबोन शईरो रा शराब ओर साफ सफेद ऊन पऊँछायी। 19 वदान ओर यावाने तेरे मालो रे बदले सूत दित्तेया ओर तिना रिया बजा ते फौलाद, तेजपता ओर अगरो रा बी बपार ऊआ। 20 ददान शईरो रे बपारी तां साथे कोड़ेया री काठिया खे टाल्लेया रा बपार करो था। 21 अरब देशो रे लोक ओर केदार देशो रे सारे परदान लोके तेरे समानो ने बदले ताखे मिन्टू, खाडू ओर बाकरे ल्याई की तां साथे लेण-देण कित्तेया। 22 शेबा ओर रामाह शईरो रे बपारिये तेरे समानो रे बदले तां साथे खरी-खरी जातिया रा सब प्रकारा रा मसाला, हर प्रकारा री मणि ओर सूईना देई की तां साथे बपार कित्तेया। 23 हारान, कन्ने, एदेन, शेबा शईरा रे बपारी ओर अश्शूर ओर कलमद इलाके रे बपारिये तां साथे बपार कित्तेया। 24 इने खरिया-खरिया चीजा, मतलब टखणे खे नीले कढ़ाईदार टाल्ले ओर डोरिया साथे बानी री ओर देवदारो साते बणे री चित्रा रे टाल्लेया रिया पेटिया ल्याई की तां साथे लेण-देण कित्तेया। 25 तर्शीश शईरो रे जाह्ज तेरा माल टोणे वाल़े ऊए।

तिना रे जरीये तूँ समुद्रो बीचे रयी की बऊत अमीर ओर प्रतापी ऊई गी थी।

26 तेरे जाह्जो खे चलाणे वाल़ेया तूँ डूगे पाणिए रे पऊँचाई ता था

पर तूफानो तुसा रे जाह्ज समुद्रो दे नाश करी देणे।

27 तेस दिने ई तेरी तअन-सम्पत्ति, बपारो रा माल, मच्छुआरे, मांझी, जुड़ाईया रा काम करने वाल़े, बपारी लोक

ओर तां बीचे जितणे सिपाई ए ओर तेरे सारे लोक, ओर जो कुछ तांगे था, से सब समुद्रो दे डुबी जाणा।

28 तेरे जाह्जा खे चलाणे वाल़े डूबदे बखते चींगणे ओर तेरे नेड़े-तेड़े रे लोक डरी जाणे।

29 सब चलाणे वाल़े, मच्छुआरे ओर समुद्रो दे जितणे मच्छुआरे रओए,

सेयो आपणे-आपणे जाह्जो पाँदा ते उतरने,*27:29 प्रका. 18:17

30 ओर सेयो ताखे समुद्रो दे डूबदे ऊए देखी की जोरे-जोरे की चींगणे लगी रे।

सेयो दु:खो दे आपणे-आपणे सिरो दे स्वा लगाई की तूड़ा बीचे मरेलणे,*27:30 प्रका 18:19

31 ओर तेरे दु:खो रे आपणे सिरो रे बाल़ कटवाई देणे

ओर लको रे टाट बानी की आपणे मनो रे बड़े दु:खो साथे तेरिया तँईं रोणे ओर छाती पीटी-पीटी की शोग मनाणे लगी रे।

32 तिना दु:ख करदे ऊए तेरे बारे दे ये शोगो रा गीत गाणा,

सोर समुद्रो दे नाश करी ता दा ए, तेसा जेड़ा कुण शईर ए?*27:32 प्रका. 18:15, प्रका. 18:18

33 जेबे तेरा माल समुद्रो ते बारे निकल़ो था, तेबे बऊत सारी जातिया रे लोक रज्जी जाओ थे;

तेरे अमीर ओर बऊत सारे मालो रिया बजा ते तरतिया रे राजा अमीर ओ थे।*27:33 प्रका. 18:9, प्रका. 18:15, प्रका. 18:19

34 जेस बखते तूँ समुद्रो रे पाणिए बीचे टूटी की डुबी, तेस बखते तेरे बपारो रा सारा माल ओर तां साथे काम करने वाल़े सब तेरे पीतरे रयी की नाश ऊईगे।

35 समुद्रो रे कनारे देशो रे सब रणे वाल़े आपणे भाग्य खे देखी की डरी गे,

ओर तेथो रे सबी राजेया रे बाल़ खड़े ऊईगे ओर तिना रे मूँ उदास ऊईगे।

36 देश-देशो रे बपारी तेरे खलाफ ताना मारो थे,

तूँ डरो री बजा ऊई गी री ओर तूँ फेर खड़ी नि रयी सकणी।*27:36 यहे. 26:21, यिर्म. 18:16