1 परमेशरे माखे ये बी बोलेया, "ओ माणूंआ, एक ईट लओ ओर तेतेखे आपणे सामणे राखी की तेते पाँदे यरूशलेम शईरो खे बताणे वाल़िया लाईनी लगा। 2 फेर केरा पाणे खे अगुवाई करने खे कि सिपाई शईरो पाँदे अमला करने खे त्यार ए। इजी रे चऊँ कनारे माट्टिया रे टेर लगा ताकि कोई बी बची नि सको। शईरो रे चऊँ कनारे लकड़िया रे बड़े टुकड़े राख, जेते रा इस्तेमाल दुश्मण एतेरिया दवाला तोड़ने खे करी सको। 3 तेबे तूँ लोए रा तवा लई की तेतेखे लोए री दवाल मानी की आपणे ओर तेस शईरो बीचे खड़ा कर, तेबे आपणा मूँ तेतेरे सामणे करी की तेस केरी लओ, ईंयाँ तैं से केरी की राखणा। ये इस्राएलो रे कराने खे नशाण ठईरना। 4,5 तेबे तैं आपणे खूँजे कनारे लेटणा, ये बताणे खे कि इस्राएलो रे पाप तैं आपू पाँदे लई राखे ए, तां 390 दिना तक कष्टो दे रणा। ये तिना साला री गिणतिया खे बताणे वाल़ा ऊणा जो मैं इस्राएलो रे लोका खे सजा देणे रिया तँईं राखी राखे ए। हर दिन जो तां कष्ट सईन करना से तिना री सजा रा एक साल ऊणा। 6 जेबे 390 बुरे दिन पूरे ऊई जाणे, तेबे आपणे दाँणे कनारे लेटी की यहूदा रे लोका रे पापा रा बोज सयीन करी लया, मैं तेसखे बी ओर ताखे एक सालो रे बदले एक दिन, मतलब चाल़ी दिन ठराई राखे। 7 तैं आपणा मूँ दुश्मणा रे केरे दे यरूशलेमो रिया तरफा खे करी की ओर आपणी बाँ सिपाईया जेड़ी चकी की तिना रे खलाफ भविष्यबाणी करनी। 8 देख, मां तूँ रस्सिया साथे बानणा ओर जदुओ तक तेसरे केरने रे दिन पूरे नि ओ, तदुओ तक तूँ फिरी नि सकणा।"

9 इजी ते पईले कि तूँ एड़ा करे, तैं कणक, जौ, फ्रासबीन, मस्सर, बाजरा ओर कणका रा आटा लई की एकी पांडे दे राखी की, तिना साथे रोटिया बणाया करना। जितणे दिना तक तूँ आपणे एकी कनारे लेटेया रा रणा, मतलब 390 दिना तक सेई खाया करना। 10 जो रोटी तूँ खाएगा, से तोली-तोली की खाणी, मतलब रोज 200 ग्राम रोटी खाया करनी ओर से रोटी पूरा दिन बखतो-बखतो पाँदे खाया करनी। 11 तैं पाणी बी नापी की पिया करना, मतलब 600 ग्राम पाणी एकी दिनो दे पिया करना ओर से बखतो-बखतो पाँदे पीणा। 12 आपणी रोटी जौ री रोटिया जेड़ी बणाई की खाया करनी, तैं सेयो रोटिया तेबे बणाया करनिया, जेबे माणूं टट्टी करने लगी रा ओ।

13 फेर यहोवे बोलेया, "ईंयाँ ई इस्राएलो रे लोका तिना जातिया बीचे आपणी-आपणी अशुद्ध रोटी जो बिधानो रे खलाफ ए खाया करनी, जेती मां सेयो जबरदस्ती पऊँचाणे।" 14 तेबे मैं बोलेया, "ना, परमेशर यहोवा! माखे एड़ा करने खे मजबूर नि कर! मैं कदी बी कोई एड़ा काम नि कित्तेया कि आऊँ अशुद्ध ऊई जाऊँ। जेबे आऊँ छोटा था मैं कदी बी एड़ा मास नि खाया जेते की आऊँ अशुद्ध ऊई सकूँ। मैं ना तो मरे दे जानवरो रा मास खाया ओर ना ई एड़े जानवरो रा मास खाया जो दूजे जानवरे काई राखेया ओ।"* 15 तेबे परमेशरे माखे बोलेया, "देख, मैं तेरिया तँईं माणूंआ रे गूओ रे बदले बल़दो रा गोबर ठराई राखेया ओर तैं तिजी साथे ई आपणी रोटी बनाणी।" 16 तेबे परमेशरे माखे बोलेया, "ओ माणूंआ, देख, मां यरूशलेमो ते खाणे खे नज्ज दूर करी देणा, इजी री खातर तेथो रे लोका तोली-तोली की ओर फिकर करी की रोटी खाया करनी ओर नापी-नापी की पाणी पिया करना। 17 कऊँकि रोटी ओर पाणी बऊत ई कम ऊई जाणे। सेयो सारे के सारे डरो रे मारे एकी दूजे खे देखणे लगणे ओर कमजोर ऊई जाणे, ये सब इजी बजा ते ऊणा कि तिना खे तिना रे पापो री सजा मिलणे लगी री।"